Novel Iban


Novel iban keterubah di pansut ka aku ba blog tu..terima meh..

Tajuk novel : Pengingat Lama Dikenang Selalu

Jaku Tangkan : Semua lekajaku enggau sepir ke dikena dalam NOVEL tu ukai jaku stindit ke dipelajarka. Sepir enggau lekajaku mega digaga nunda jaku pasar lalu nitih ka jaku anembiak rebak baru. 

BERI MEH KOMEN MIMIT DITU..

Novel pengerindu

GENTERAN 1 PENDIAU PENGIDUP SIDA ENTAKIT SEBILIK

Taun 2010 tu, genap tujuh taun pengudah tudah Entakit ningal ke menua diri, tegal nitih ke apai sida ka mindah gawa ke menua bukai. Apai Entakit ti benama Entinggi tu siku orang ti gawa kompeni, mangku pengawa nyadi operation manager laban ti bisi pelajar pangkat master degree. Kompeni enggi sida apai ia dipegai kompeni menua tasik, siti ari palan ngaga cip elektronik. Laban ti landik serta cakah bejalai ka pengawa, dia deh apai ia dipinta bala pemesai mindah serta gawa ba menua landon. Seninjik bendar apai ia endang lama ngembuan ati deka mindah gawa, lebih lebih agi enti ngagai menua tasik, ti mansang serta moden. Dini enda apai ia deka deh, gaji ga tinggi, diau nyengulai bala ribai dikangau ka bala aki enik kitai munya “Tuan”.  Tu meh peluang kitai ngemasang ka diri ko munyi jaku apai ia labuh ti makai lemai sida sebilik ba menua sida. Tang sebedaunya Entinggi enda ga nekan bala anak iya ngambi ka enggau. Barang sapa ti deka tinggal, tinggal meh di ibun enik sida.

Taja pia, enik sida, Icut enggai enggau sida mapai nurun mindah ka menua bukai, laban ngenang diri ti udah tuai, ukai nya nemu bejaku ribai. Takut nepan bilun meh ko enik sida, tambah mega sayau ke utai tupi seduai iya niang laki iya suba, iguk. Tuai-tuai baka tu dini nya ulih bekaban enggau enik bala sida ribai deh ko iya nyaut. Enik sida nyau manggai 70 lebih taun, lalu agi pengeregas pendiau.  Sida sebilik baka orang bukai mega, sama bela bisi nupi manuk, jani, mayau, ukoi enggau burung meh nya. Enik sida rindu ke pengawa betupi enggau betanam besayur. Agi bedau niang laki iya iguk suba, seduai sama-sama besaup nangkani nupi nya. Enti nurun ke kebun, sama ke kebun. Tang meh diatu iya kediri, nya alai iya enggai ninggal ke semua pengingat seduai niang laki iya menya. Pengingat tanda penyayau idup bepuluh taun, segulai sejalai tegal pengerindu, laban seduai jadi ari pengawa bergayap nyabung diri, nya alai seduai ngembuan chinta sampai ka tuai, sampai ujung dunya. Nyadi apai Entakit, nadai mayuh jaku ninga indai iya nya enggai dibai iya mindah nitih ka gawa. Entinggi enda irau ka indai sida nya laban bisi menyadi sida ke biak ke bernama Jipah nyaga ngemata. Tambah mega indai sida nya enda tentu rindu ka iya, ketegal enda ibuh ka raung bilik, lalu tinggi jaku ,unyi ko leka lagu david key mey, lawa-lawa udah kaya. Sida Entakit menyadi nadai mayuh jaku, nurut aja apai sida iya.

Nyadi sida Entakit menyadi bisi 3 iku, Entakit ti tuai, nangkan iya Ensibun lalu ka biak Entagi, menyadi indu sida. Entakit enggau Ensibun enda tentu jauh takah ada, Entakit ada maya ngetau lalu setaun udahnya Ensibun ada ka dunya lebuh maya manggul. Seduai takah setuan ada. Tang Entagi takah 3 taun biak ari Ensibun. Laban ti enda jauh takah ada, tubuh seduai bela deka sama besai, Entakit enggau Ensibun ka endar belaya lebuh ti agi mit. Sama enggai alah, ulih aki sida ngerara belama. Tang nyau udah mansang besai, Ensibun nyadi orang mereti tang Entakit selalu ngaga ulah. Entagi pia mega, nyadi anak asi. Nya ti ngasuh Entagi enda tentu mending ka jaku rara enik enggau aya sida. Gawa ba dapur pan iya enggai, enda ibuh ka masu gari ulih enik iya masu ka iya. Engka endang udah selatan anak urang kaya, selalu ngembuan perangai ti enda menuku.

Tang ukai setegal nya aja, pemindah Entakit mai diri mega, laban pengerindu enggau chinta ti di rejik endu dara anak aya pengulu. Miya nama ia, nama dalam tingki Aliscia Miya Anak Panggau, indu dara biak setaun dua ari Entakit. Miya tu indu ti bajik kulit burak sampama tayak, kuyu pepelu lesung pipit, buk panjai merundai paras bau, pejalai ayun lundai, punggung paras gitar, tinggi penumbas iya, lalu nadai endur nyema munyi ko jaku sida ti mabuk pengerindu. Ngembuan jejuluk endun lengayun dara mereti, enda besulu ngapa enti enda keran jadi. Taja pia Miya enda kala sumbong ka pemajik diri, iya ngembuan budi basa serta imun gaya, lalu kala menang pekit kumang pelilih menua sida empu. Ukai nya aja, Miya mega landik belagu serta pandai dalam sekula. Nya ti ngasuh ati sida lelaki ti serambau labuh pengerindu, lalu enda kurang mega sida sanggup nulis surat ngagai Miya. Semua surat endang di rejik iya magang. Ari penyampau sida ti ngutus surat, entakit siku ari sida nya. Laban ti berasai malu, dia deh Entakit mutus ati nitih ka apai iya 7 taun ti udah mindah ngagai menua London. Ukainya aja, Entakit berasai malu laban Miya maya nya nuduh iya orang nadai pendiau lalu kempang ati milih kaban Entakit empu nyadi ka ambai ati. Enti orang bukai nadai ngawa ga ko dalam ati iya din.

GENTERAN 2 TERENGKAH BA AIRPORT KUCHING

Dalam bilun Airasia boing 737 – Penerbai ari Kuala Lumpur nuju Kuching. Entakit terdani ninga pramugari berjaku ba curong ribut bilun. Pengelama sejam empat puluh lima minit cukup alai iya tindok. Lelak buntau pejalai jauh ari menua londan sehari ka udah. Indu laut siku sepiak iya enda ngetu-ngetu malik nyengok ari jendela bilun peda Entakit, engka tak baru nepan bilun ko randau ati kediri nengali. Indu laut nya peda iya umbas iya pemajik, tang jangka iya udah belaki, laban meda tunjok jari bisi tichin perak. Entakit enda memunyi, laban indu laut nya tak baka ka enggai berandau enggau iya. Pengelama sejam lebih nya seduai nadai terpansut ka jaku, tak semadi ka pramugari nanya baru nyaut. Ngumba endar ga indu laut tu ko iya, enggai di bai berandau ko iya muchau dalam ati din. Ka ga Entakit nguji nanya dulu, tang indu laut nya peda iya megai mp3 Player, nejar pending ninga lagu, ngaga diri meh nya, ngambi ka enda dibai berandau.

Ninga tak meredup munyi tayar bilun gegetar mimit temegah nyimbing ka sayap nagang pengelaju diri, sangkai terengkah ba dada pulau borneo bumi kenyalang. Pengudah nya bejalai belubah-lubah ngelawa siku mensia gawa pada padang bilun, ti ngelambai meri tanda kepai ngagai pilut bilun. “Terima kasih kerana memilih Airasia untuk destinasi penerbangan anda dan sekarang kita berada di lapangan terbang antarabangsa kuching” ko pramugari bilun didinga Entakit. Jaku bukai iya enda ingat agi laban bala mayuh kachuh ragak ukai nya deka ninga ka leka lalau leka tesau, ukai nemu nguing limpang mendingka jaku penerang. Peda Entakit sida kebukai baka ka enda sabar ka nurun ari bilun. Bertejengau nyengok ari mua empelua bilun engkabang. Engka ngicha diri bisi terpeda ka bala diri meh nya tauka ambai ati peraja mata, nengau ari jauh ngelambai ngepai enggau tuchum pengabis manis. Engka ngicha ka bisi tepeda ka apai indai bala madi nganti mai ati rindu ka lama enda bergulai. Ninga ada chapuh meh dalam bilun, bala sekeda berebut nurun ka kantung gari ari kebin bilun, baka ka takut ditaban ka bilun terabai baru. Entakit duduk dulu, merati ka ulah kitai anak mensia anak uda ti begaut nurun chapuh berempit-empit enggai ka diselepak nurun. Bisi nya ngena kot, engka sida tu bisnesman kini, bisi nya bekena ka baju lawa-lawa, engka tak pulai ngalu ari kuala lumpur, bisi nya berkena ka tanchut pandak engka tak dipeda cool kini, lalu macham ragam kitai mensia dipeda Entakit. Iya lalu enda angkat enda kekebut ngawak ke sida ti berumban dulu.

Dia deh ati Entakit berasai sinu, asai ka ditarit daya graviti tanah borneo. Pengelama tujuh taun nadai nyengok pulai sangkai. Tujuh taun ti udah Entakit endang nat ka diri sigi enda pulai. Berasai enda nyamai ga tudah ati Entakit laban ti ngenang diri mansang pulai ke menua diri, laban ngenang diri ti nadai kaban, ngenang diri ti enda ulih nyelat bangsa diri meh ketegal ti udah terbuai adat sempekat bangsa diri nadai lekat. Ninting taun ka diau ba menua tasik kekesit meh ati iya deka pulai, ngabas pendiau sida serumah ti diau ba rantau lelenggau, sungai ulu kanowit julau, tang bangat enggai nyadi, sida serumah enggai meda iya. Nama menua sida dikumbai Nanga Pusai, di pegai aki tuai Rumah Meringgai. Naka meh pengelenggau ati iya din, asai ka nyabak lebuh maya kaki nyingkang nurun negu tanah pulau borneo. Ati asai ka ditekan dienyak ka laban ti ngetat ka ai mata ti chimit-chimit nerutu lembut mansut ka diri nujah melap kuyu Entakit. Seput asai ka enggai pansut, degup-degup ngeregau jantung enda kebut-kebut. Pejalai singkang kaki terpagang enggai nyingkang tersekat asai ka bisi batu lekat , tang dipajak ka nitih seripih raban bala sida ti sama numpang bilun tadi. Nama meh utai asai tu ko dalam ati iya din. Nadai siku urang peduli ka tudah Entakit, sama bejalai nyingkang sesingkang nama ka diri ngagai perabong atap Airport. Bejalai berumban-rumban laban panchar mata panas berasai angat maya tengah hari raya, baka ka ngelalu ka penatai bala temuai datai.

Peda Entakit padang bilun kuching nyau mayuh berubah, makin manah makin besai ari ti udah. Tujuh taun ti lalu dini nya padang bilun tu memesai tu ko iya nengali bejaku kediri, nengah nujah lif. Datai ba kuanter imegresin disua ka Entakit tingki lalu terus nuju palan nuntut beg. Pansut ari nya, Entakit gining-gining meda urang sebelah airport, ngicha ka bisi tepeda ka orang ti dikelala, tang nadai ga. Iya nuduk ka diri ba kerusi, berunding ka kini tunga pejalai udah tu. Peda iya bala penumpang ti sertai enggau iya tadi, pansut lalu diambi bala diri empu, pansut ga siku peda tak lalu nepan kereta lalu ngejang. Bisi ga sekeda agi berdiri nganti pangan ti ngambi, enda kurang mega betalipun engka minta ambi. Nyadi enggi tudah Entakit lain mimit ari urang bukai, pemulai iya nadai urang peduli, nadai urang ngipa, nadai nganti ngambi lalu kediri-diri meh. Kampar meh tudah tudah tuai. Dalam ati din asai ka nyabak ngenang diri baka nya.

GENTERAN 3 TENGAU PENGINGAT ENTAKIT

Pemuas berunding Entakit lalu nuju aya dribar teksi. Minta anjung ngagai kuching, nuju hotel ti murah ko iya madah ngagai driber. Chek-in ba hotel RM120 semalam. Pengudah makai lemai, Entakit berjalai nguji meling pasar lama kuching kediri-diri, nitih ka singkang kaki, ujung-ujung datai ba waterfront. Naka meh pemanah endur nya maya malam. Api lampu nyau bertusun berintai nisi sungai sarawak, nyau kelip-kelip ngumba ka malam. Ba seberai bisi dipeda kubu nanda ka perintah brooke suba lalu enda jauh ari nya siti bangunan ti baru ti enda dikelala Entakit, engka baru digaga kini ko dalam ati iya din. Nyau majak mansang meh menua tu. Duduk Entakit ba tangga, ngenat ka lelak. Mata Entakit majak enkining nengkila ka pemanah panchar lampu diserumba panchar senayau bulan terang. Tungga muak ka ili, apai tuai siku bisi dipeda nginti. Jalai alun agi sekut laban kereta enggau motor, nyau beterenggung munyi didinga. Enda jauh ari nya, bisi peda Entakit urang diting. Nya ti ngasuh ati iya geledi, laban kala ngereja ulah bakanya maya sekula menya. Tuchum meh Entakit kediri nengali. Entakit lalu ingat ka ulah iya maya sekula ba SMK Julau menya, ti rindu amai beduan sida ti indu. Bepangan enda lama, dah leju leka. Runding Entakit lalu terkuing ngenang pengingat lama ti enda langkang ari kenang dalam dada, ditaruh teguh dalam ati nyadi mimpi, munyi ko lagu hilary- pengingat lama dikenang selalu.

“sapa nama sulu dek diatu kaban, enda ngelala aku, ni ke suba dah ditukar” ko tanya Josep kaban Entakit, sama sekelas maya pom lima.

“Siku ni ko nuan sep. Bertukar-tukar sulu nya perkara biasa nya, baka ka nukar baju baru” ko Entakit nyaut

“endai ka tundi tua kemari maya makai mihun ba kantin. Ka dek tu nyu selusin sulu, ni nemu bagi siku ni, siku ni” ko timbal josep

“O nya endu dara peraja mata, maria nama iya, dikuntik aku maya pengerami lumba minggu nyin kemari” balas Entakit

“laku amai dek ney unggal Entakit, mayuh amai sulu dek, uji tak magi enggau aku neh, anang tak nengali kediri” jaku josep sebana ti nadai sulu.

“eh nadai nya baka nya deh, dah ga sida teperasa enggau penyigat aku,hehe. Ayat tu penting” Entakit mantai ka jaku lawa. “ukai nya laku tauka enda deh sep, nya ari pemandai nguntik deh, baka dek tu, uji tak pos ka mayuh surat cinta ngagai sida lusi sekaban, komfom bisi balas.hahaha nyaa…” sambung Entakit.

“senang meh ngepos surat, tang enti di rejik, dini meh alai aku nyimpan pemalu mua aku tu, ukai nya bisi penyigat baka pananyi Eddie Kuwing deh.” saut josep baru.

“enti pia beguru ba aku dek tu, tang geselan makai mee kampua ba kedai nangup ba pasar, hehehe” ko tundi Entakit ngeso ka diri landik berkuntik ka urang indu.

Ujung minggu Entakit mai maria diting ba taman bungai ba pasar julau. Ka pasar nepan bas aja, tambang 50 sen siku.

“amai bajik ga gamal nuan endu wai sulu” ko Entakit mantai jaku meraya ngasuh ati sida ka indu terajuk.

“bula dek nya. Anang berendu-endu arr.., ukai di nya bangat tuai bisi lesen ngendu ka aku” ko maria ngengai nemu diri di luyar

“amai aku wai sulu, sema jaku ka ditaban ka aku lari langit dek enti tua enda jadi ila”

“anang ka bula-bula, nama aku ninga dek mayuh pangan, romeo lah konon..kada enda spir pat dek aja aku deh.”

“dini ka, sida nya semina kaban aku aja, nadai bersangkut-paut enggau chinta aku, mina dek aja diiktiraf aku nyadi sulu aku naka kediatu”

“auk, enti dek bula, aku tingko pala dek nya ila”

“apu, anang pia wai sulu, sakit aku, sapa tusah, dek ga tusah, nadai sulu.haha”

“eh..kapa peduli ka dek nya, lantak bilun dek nya enda meh aku ngambi, enda meh aku peduli”

Maria enggai ngelayan iya. Laban nemu Entakit enda beramai ka ngemai iya bersulu, tang iya nerima laban ati endang sigi udah tersangkut ke penyigat Entakit, ukai nya aja Entakit mega anak urang permisi, bisi lah seponsor makai mee kampua maya raun ka pasar. Ni nemu nasit engka seduai bisi jalai niri ka rumah tangga ke dudi ari ila. Sapa enggai jadi enggau iya tu, bula ngumbai diri enggai. Siti da agi kena maria nguji pengelaku diri, reti nya sapa-sapa ti bepangan enggau Entakit endang bajik meh nya.

Maya kawin bala menyadi iya, Entakit bekelala enggau siku da indu dara, Felicia Dia nama iya. Seduai betemu maya ka berjoget ngalih ka pagi, ngena lagu dangdut ari penanyi Diana Nini, betanda sambil berpinta ka no talipun. Indu asal ari sibu, pom 4 biak setaun ari Entakit. Taja umur agi biak, tang Felicia baka udah dara, laban ti pandai berfesyen berkena ka baju ngayan ka punggung, tanchut jean ketat nungkat paras buku kaki. Urang diau ba pasar dini enda pandai ngesip diri deh. Entakit terkait lalu mai berkelala. Seduai selalu diting ba pasar sibu, makai segulai ba market sepengelama sebulan. Chinta seduai enda lama, laban Felicia bisi ambai bukai. Nyadi Entakit mina ambai lalai iya aja. Benung seduai bejalai bepegai tebing ai, enda mukai datai deh laki siku lalu mukut Entakit, laban ngerampas pangan iya. Entakit laban ti keruk pendiau, malas lalu berjamah enggau laki nya. Naka nya aja kisah seduai felicia pandak jalai sulai pia aja.

Maya nya mega Entakit ingat ka ambai bukai iya baka sida Rose enggau Catherine. Seduai nya sulu Entakit maya pom 5, seduai enda nemu diri dikeduan dikongsi ka Entakit siti pengerindu. Seduai nemu diri sekungsi ka pangan maya ke nepan bus sekula pulai ari pasar. Seduai laban ti manah pendiau enggai belaya tang mina enggai agi bepangan enggau Entakit jai. Endang ari pun pan seduai sama nemu Entakit tu sigi playboy, tang laban ati ke keran jatuh cinta ko melayu, nadai ko enggau meh. Nadai nya ngawa ko dalam ati din, cinta monyet aja.

Ba sekula, Entakit sigi keruk gaya, sigi baka anang bujang baru setaun buah jagung, ulah nyau ka sebaka enggau anak kera, udu pemanchar. Ukai ka dirara, lalu deka ngerigang ka diri mantai ka buku lima, baka gerama ngaga diri ka, kering kenu ko. Ukai nemu reti lebu, empai ulih deka di ulih ka, sebelah batu deka dikerebuk, puchuk tapang deka ditiki, dalam ai deka diselam, dalam lubang ngaga ka jerpang kena ngulih ka. Ti bedau nemu deka nemu, tang enti udah nemu deka balat agi ngeso ka penemu diri, endang jegak gak gak baka sa ukoi ka beranak, kasak-kasak kulu kili.

Enti udah pom empat lima enggau tujuh kitai sama nemu nembiak indu enggau lelaki tu nyau bau rengut baka buah binjai panjai tampuk sera kumang- nyau belabu begenuk pemegah ini manang, nyau baka pisang betungkul engchekuk betanduk. Nembiak sekula ku kitai. Dini dini pan alai nudukka diri bejaku enggau bup pemantup seranyat penyayat tulang penemu ti tau nyuruh begeliga megai menua pengidup diri empu. Endang semua bakatu, engka nya udah nyadi adat turun menurun ditaga ka bala aki enik menya nyadi ka andau penepan anak uda.

Entakit enda tinggal mega, sigi semampai minta puji diri berani, keruk ngapa. Ulah entakit bangat di ka-enggai ka sida berserimbai pendiau enggau iya ianya, nadai berbasa ka bala pengajar dalam kelas. Udu lepak sebelah pasar, nginsap ngapa-ngapa lalu selalu main judi daun sekupong. Iya mega nyadi tokey nyual ngidar insap ba sekula, nyadi chung main judi. Enti bisi orang berekah iya sigi enggau nyaup. Buk sigi disimpan beriku-iku, ngakun dipeda. Jai enggau manah tu nadai dikira laban pengeka, pengisin enggau pengeransing kitai sama sebaka. Maya ngingat ke perkara nya, Entakit endang nesal udu. Bisi sekali iya ditangkap cikgu Hendry main judi ba asrama, iya dibai ngagai opis PK hem sida.

“Nama ulah dek tu bangat enda ubah, kati dek tu nadai runding baka jelu” ko PK hem sida ringat.

“Aku ni ko aku meh, urang bukai main meh, nama aja aku aja kena” Entakit nimbal.

“dek ga amat salah, dah ga mayuh penyalah udah digaga dek, kena palu belama enda ga berubah, kati apai indai dek nadai ngajar” PK Hem mantai ka baru ulah udah dikerja iya ngelama tu. Lalu megai rutan deka malu.

“enda ar”

Meda PK Hem sida bakanya, iya lalu ngelaban mantai ka kuntau jet li iya. Enda chamang-chamang lalu mukut PK hem sida ba kuyu. Nama daya PK hem enda tebalas ka diri, laban Entakit lalu rari. Kati ke ka malas deh enda alah dikumbai urang PK hem berekah enggau anembiak sekula. Udah bekau nya iya lalu digantung sekula 2 minggu. Ukum ka baka nya nadai ngasuh iya tusah ati, tang ngasuh iya rindu agi.

Kelimpah ari nya, enda tau meda indu dara ka bajik, sigi deka dikuntik siti ari ulah romeo Entakit ti enda ulih dibuai iya. Enda alah pujuk ditulis ka surat, unggal iya raymond sigan enggau endu teresa nana nyadi mangsa diasuh nyadi posmen nganjung surat karung berbungai. Dua iku nya sigi deka laban bisi setem diberi Entakit, setem ti ko sida ia nya belanja makai ba kedai alex. Entakit endang enda kisah, laban ti mayuh duit diberi apai iya ti berpangkat tinggi. Pengabis iya pom 5, Entakit bisi bulih koleksi ambai 7 iku, ia nya baka sida rose, catherine, felicia, Vanessa, Goergina, Stefenie Gani enggau Rheka Lia.

Malam majak tuai setuai, nyau enda berasai nyau pukul 9 malam, kira bisi 2 jam pengudah Entakit duduk ba tebing ai ba waterfront kuching, mulai ke pengingat lama, ngenang ulah maya sekula suba menya. Entakit terkenyit laban ka ditanya polis budu ti jaga malam nya, ti rerayau reragau ngelinggi tebing waterfront.

“encik, encik apa polah ko duduk sia lamak-lamak, ngenang gerek ka. Ibuh duduk sia lamak, kelak orang kacau encik, balit bilit gik” ko jaku melayu serawak polis budu, nyapa Entakit malam nya.

Entakit malik nganguk ka pala aja tang enda nyaut lalu mupuk berjalai bergadai-gadai mulai kediri ngagai hotel di suwa iya tadi. Di tisi jalai meli napau asi lemak ka di empa iya ba hotel, engka tak lapar, tambah mega nyau tertenguk ka makai asi lemak ti nadai ditemu di menua london dedin. Dalam bilik pasang ka TV, gali meda berita. Pasang ka TV 3 pansut berita ngundi di pelilih menua sibu, bala parti BN enggau parti pembangkang sibuk kimpin. Ngelama tu, Entakit nadai kala enggau urang muai undi. Kapa nya deh ko Entakit bejaku kediri. Ukai nya tau ngachau pengerai ngachau pengidup aku. Muai masa bejaku ka sida bala YB, legi besengkang penemu tau ngasuh nyadi laya tumbuh pisa ba siku-siku.

GENTERAN 4 KAHWIN PETUNGGAL MIYA

Limpang mimit ngagai tudah Miya ka agi mekang tinggal ba menua diau mendam ba sarawak nadai mindah ke bukai. Taun tu umur Miya manggai 25 taun, dara penumbas iya tang ko bala kaban ka serambau sekula menya, ditundi sida enggau leka jaku “tinggal bas”. Kaban iya ke bukai ke serambau suba baka sida Nelly, Empenai, Jeliah enggau Bangi endang udah niri ka rumah tangga memagang nitih ke laki sida belelang bejalai sebelah nengeri ngadu pendiau diri. Liah pengabis pom 5 lalu terus belaki jadi enggau sedadu, Empenai belaki tegal atur apai iya ke keran berambu isan enggau kaban iya, laki iya pangkat Cikgu, kira ok meh nya ko jaku apai Adut. Nelly kawin maya gawai empai lama enggau laki temu iya ba pasar sibu, sama kerja supermarket ba wisma sanyan. Ngenang Bangi mega, ti jadi rari enggau urang laki di mengeri, pengudah iya nitih ka bala ibu iya kerja kilang ba johor, taun tu udah bulih anak siku, ada bulan 2 tu kemari. Miya laban ti anak tuai endang ngasai ka diri patut mantu apai iya nyengula ka bala adi iya, 3 iku da agi ka agi bersekula. Taja pia Miya udah bulih diploma pentadbiran awam ari Uitm, 3 taun ba kota semarahan. Ditu Miya mangku pengawa nyadi pemantu pegawai ba opis perintah. Semak 6 bulan Miya menganggur nadai pengawa lepas diploma suba, tang laban dibantu sida serumah, iya terulih ka pengawa baka ke diatu.

Pengelama ke sekula ba Uitm suba, Miya endang nadai rindang enggau pengawa ti ngemai iya tau labuh terpawing limpang ari pengawa belajar. Tuju ati sigi bulih diploma, degree engka enda alah ketegal ti enda chukup belanja, nya pan semadi bisi bantu duit jali PTPTN. Maya nya mega iya nadai ka enggau urang bukai betawing diting baka pangan iya ke bukai. Miya enda sanggup ka ngelebu apai enggau indai ti udah bendar ngiga belanja kena iya nampung pelajar. Dalam ati din sigi ka meh nya, tang ngaga diri enggai. Suah meh bala sida James, sida Edward sida Jiram nguji nundi ngemai iya bepangan, tang ditulak iya magang. Ukai enggai tang belajar dulu, bulih kerja baru tau berambai ko fikir runding Miya, ngemula ka ati diri. Mulut madah enggai tang ati terajuk kena panjuk jayau empelanduk. Nya meh penanggur alai Miya enda nyanggup diri ka besulu nanggam pengerindu enggau sida ke bujang.

“Miya oh Miya, lapa alai nuan nulak James nya. Penyigat umbas iya ga, manah ulah budi basa tak tau direjik nuan. Enti aku, sigi aku terima iya nya, nadai mayuh fikir. Urang bukai mayuh berebut ka iya, tang nuan siku dipilih iya” ko pangan sebilik enggau Miya, kelibak anak abun, indu asal ari betong.

“enti enggai, enggai meh nya. Nadai juduh kini munyi ko jaku indai Dampur..hehe” ko Miya ketawa gaga dipuji siku nya sambil mangkir pisang gureng ti dibeli seduai ba cafe tadi.

“mehinsa ga nuan tu, enda ngelala reti bepangan. Kitai patut enjoy maya dara baka tu, ngiga pangan enggau ngisi masa lapang ” ko melisa nyempelah ari atas katil. Nunda jaku jilan ka pirur sambil megai talipaun.

“eh, urang ka gali enda ibuh masuk campur” ko Miya nyaut melisa ka gali ari tadi. Empai abis jaku iya, kelibak lalu mutong bejaku baru.

“amat nya Miya, ukai nyamai ngiga lelaki ngenyigat James nya, dah ga ngembuan pelajar degree, kitai tu nama ka diploma aja. Enti jadi enggau iya tak enda ibuh kerja kitai tu ila, diau aja, enda ibuh irau ka isu pengangguran kemaya ari diatu, awak iya melanja nupi kitai” ko kelibak bejaku panjai. Jaku bercampur-campur enggau jaku melayu. Kelibak sigi deka nyabung iya enggau James, laban enggai meda sikunya nadai tawing.

“emmmm..enti seduai bangat ka, tak seduai bepangan enggau iya, ukai nya penyigat ulih diempa, ukai nya degree iya nya tau ngasuh bahagia” ko Miya nyaut nyu buring berandau ka laki nya.

“endai enti iya ka aku, diatu ka meh aku jadi, hahaha” ko kelibak ngeranjur.

“aku enggai nyadi deh, enda masuk channel seduai ka kawin, aku dah bisi apai tuai” ko melisa nyaut ari atas.

“dah dah badu berandau ka James agi kitai, enda alah tak dibai ka jayau legi” ko Miya ngelimpang ka tupik sida tiga.

Baka nya meh pendiau sida ka indu maya begulai, sigi selalu berandau ka pendiau siku-siku lalu ka mai berandau ka laki-laki ka sigat, bisi ajenda ka ngenyam ketupat. Ni enda sida ka enda sigat, begigit lidah laban enda laku, enda dipalik ka sida endu dara temaga, dara entimun sebelah jalai, dalam ati din mujuk diri nadai ngawa ga enti urang enggai, sapa meh aku tu ko a. Sida ka sigat endang muchung idung dipeda dijeling sida ke dara, laku meh ko jaku. Anang agi enti lelaki ke gemuk, dikumbai “mu” tauka “bob” ulih sida ke dara, dianggap kaban aja mina diguna maya ngadu ka asignment aja. Sida nya bisi meh asai ati mabuk chinta, tang apa bulih buat, urang enggai nguna munyi ko lagu James jacob “enggai nguna aku”. Ngumba ga sida endun buah rungan, milih lelaki enggai enda meda penyigat dulu, peda ba luar aja tebelunga, nya ti ngasuh bujang buah engkabang selalu tegepang tusah ati, di empang tuduh enda nemu diri, mua jai mati enggai, enggai enda nundi. Tang gamal enda sigat, enti dumpet enggau bank penuh enggau duit, gohit aja lah ko sida ka dara taja ukai cinta sejati, engka amba tekena jayau kunci lipan, tekait laban besi kunci kerata kancil.

“Bangat ni penyigat ambai ti dikemeranka dek ba menua dedin, ti ngasuh dek kempang nulak pengeran ati James nya” ko Melisa majak nanya laban meleba ka Miya ti bisi ambai sulu ati tinggal di menua.

“ Mel, ni aku tu bisi ambai, anang ta nimbak guyap ngapa, ukai aku enggai ka James, tang laban aku bisi tanggung pegawa ti besai, belajar, kerja dah nya melanja bala madi aku, enggai nyadi belaki ngapa enti empai tegap penatai permisi. Sekula empai abis ni ari ka belaki” Miya meri penerang

“ nama seduai pangan dek abel selalu belaya, nya kumbai dek bahagia” ko Miya nambah kena iya ngalih ka randau sida 3 enggai ka rahsia iya majak terkusai dipansai seduai nya.

“at least aku bisi pangan lah” saut melisa.

“bahagia meh nya, bisi enggau makai mee teow ba kedai first famliy cafe” tambah kelibak, ngamin ka runding siku nya.

“eh dek nya kelibak, ka endar berandau ka aku, lapa deh nuan nulak jacob ari nya deh, baka nya meh aku” ko Miya

“kati ka aku nguna jacobs nya, laki gemuk, no class lah , nyu baka tong deram, ba nama iya Bob..Enti baka Bob AF nadai gawa ga pandai belagu, bisi endur ngait ka ati.. tang enti baka James nya nadai ngawa lah, bisi class” balas kelibak.

“amat ga nya, nyadi ka laki tau jacob nya ney, tang ka pangan engka berfikir 10 kali aku” jaku kena Miya mujuk siku nya..

“nemu ga dek”

Taun 2010 tu pengidup sida Miya sebilik nyau berasai berinsur senang, laban Miya empu dah bulih pengawa kerja ba opis perintah, tambah mega madi Miya ke bersapit rudy seduai riky sama udah diterima nyadi sedadu darat 2 taun ti udah. Lempung mimit ga tanggungjawap apai enggau indai laban bisi orang enggau besaup ngiga belanja. Ina ke pangkuan sekali dah mujur masuk matrik kena belanja perintah menua sarawak laban pemutus spm A memagang. Kira diatu iya nadai beban agi, lantang serta ulih ngelepas ka tanggungjawab iya nyadi anak tuai. Tang Miya ngasai ka bisi aja utai ti nadai kurang ba pengidup iya. Puas ga Miya berunding nama meh pengidup iya tak enda tentu nyamai, taja pan beban dah nadai, ngelama tu alasan iya sigi beban melanja sida sebilik, tang diatu ?..

Miya agi cuti ba rumah panjai sida ba nanga Sekara, sitak menua Julau. Cuti iya setegal petunggal iya Merry kawin jadi enggau benjy, lelaki bangsa bidayuh. Benjy kerja nyadi jutera ba kilang elektonik ba kuching. Seduai jadi setegal cinta ti ditanggam pengelama setaun ti udah. Jauh meram dalam ati Miya din berasai jeles meda petunggal iya kawin tumu ari iya, dah ga bulih lelaki kerja menyana basai gaji tinggi sekula. Suba seduai sama bejanji, enti kawin mesti sertai, tang diatu merry dah kawin dulu ngelepas ka diri ari semaya,kawin umur 23, ni enda ngasuh ati Miya kena regau takut tinggal nyadi dara tuai. Sekali lebuh sida meda Tv ba ruang tamu sida, apai indai iya nanya.

“nama utai ka tanya seduai apai”

“ endu, kati nadai laki nguntik dek ba endur dek kerja ba kuching din” ko indai iya mansik muka randau sida menyanak enggau jaku ti enda bepampur terus terang.

“enti ngiga laki, giga ka baka enggik endu Merry, bisi pangkat, ngambi senang pengidup dek ila, enda alah baka tua indai dek tu, majak ngereja umai, mutung getah, nupi manok, nengkani jani..enda alah ga dek nupi laki ti nadai pengawa, baka indai simai setak nyin, gawa nyadi cikgu laki nyaga anak dirumah, nyau tekalih tunsang dunya” ko apai iya berjaku enggau meri chunto. Kira meri syarat meh nya, syarat laki ti di kedeka ka seduai. Miya enda tersaut ka apai indai iya.

“ kami duai apai dek ukai nya milih menantu, ni ko dek meh, ni ko chinta ati meh, tang kami enggai ka dek merinsa begulai enggau laki ti nadai pemandai baka enggik dek nya. Anang tak sengapa pilih, kami munya suba enda alah tunda, tua apai dek suba jadi setegal atur aki dek, tang diatu dunya udah jauh nyingkang berubah, pemilih aja iya sebelah mengeri. Endu ukai nya agi biak, peda bala petunggal , bala kaban dek bukai dah belaki magang, udah bisi anak dua tiga meh nya” panjai jaku indai iya. Ati indai sapa enda irau meda anak dara sida lalu empai tetap pengidup diri, tambah mega nyau jeles meda urang bukai udah nukar nama diri nyadi enik sanu, enik sanu, tang enggi indai Miya, agi pangkat indai, empai mali nama. Munyi ko jaku aya apai Rabai ti nyebut “ nama aku keterubah apai rabai, dua bali nama aki sebi”. Reti nya udah bulih pangkat aki, nukar nama kangau ka lama.

“apai..indai..lapa tak ngenyit berandau ka pekara tu, nemu aku ngadu kediri deh, aku udah besai, nah ibuk Senah, empai meh belaki bahagia meh iya” ko Miya enda ambis nguji mampur ngelamun rahsia ati.

“ehh..kati deh, peda dek endu Rosmerry dah tetap pengidup, tang dek, agi baka selama nadai pengujung, enda patut ga dek enda tegiga ka laki di menua kuching, enti bangat enda tergiga kediri, tua apai dek ga ngiga ka dek, nya cikgu jimbat nya agi bujang, iya nya satup dek, gaji cikgu besai meh. Enda malu dek jadi enggau iya, kereta pruton pan bisi meh iya taja agi diau rumah suwa” saut indai iya enggau sada ati enda nyamai.

GENTERAN 5 PENGINGAT MIYA

Malam nya Miya berunding ka jaku apai indai iya nya tadi. Jaku nya tadi berasai bendar negu ati iya din, endang amat iya nyau udah tinggal bala kaban iya ke bukai. Kaban iya baka sida Nana, anak nyau udah tegal bejalai memagang, nya ngasuh Miya dah Bulih nama baru “auntie miya” ari bala anak Nana. Ka meh ati iya belaki tang nadai siku ke deka ati, kala suba ditanya urang, tang iya madah ka diri empai sedia. Nadai siku bisi nitih ka syarat dalam ati. Nyau pemuas berunding, enda berasai pengingat lama ngundang baru. Tujuh taun ti udah lalu, ba sekula sida Miya baka indu ti bukai, sama keran ke Entakit, sama nyimpan pengerindu, tang Entakit enda ulih dipercaya, udu pengindu. Terubah seduai betemu maya nepan bas sekula sida, ka alai seduai duduk berimbai. Maya nya Entakit enda teringat ka dumpet duit iya tinggal, nyau salat-salat tudah tuai ngiga dumpet deka mayar tambang tang nadai, nyau dianu kondukter bas nya iya. Tang Miya enggau ati manah nambang ke seduai. Ngelama tu dini Entakit kala enggau urang nepan bas, tang sari nya motosikal iya rusak lalu bedau ba bengkel, nya alai iya nepan bas. Enti enda pia kapa iya nepan bas, Entakit madah “no class nepan bas”, laban Entakit anak urang permisi.

“terima kasih wai endu dara bajik” ko Entakit ngena jaku pemadu manis ti ngasuh indu dara nyau labuh pengerindu. Sambil malik ngagai indu nyendi iya sepiak.

“nadai nya ngawa deh, kitai patut nulong kaban kitai ti tusah” ko Miya

“auk pia, kati aku tu kaban nuan wai” ko Entakit ngelikuh

“eh..kemaya aku bekaban enggau urang baka dek tu, anang ber-nuan-nuan dek” ko Miya nagang.

“ apu amat pama dek tu wai , tak meri waning ngagai aku. Empai nemu sapa aku dek tu..emmm anyway, nama aku Entakit mit nyumpit mudik nanga engkalait, pulai mai dara bungsu naga ka disimpan dalam dada” ko Entakit mantai jaku sebubu ngapa.

“em..enggai aku bekelala enggau dek, enda dikelala. Kada enda samseng dek tu, kada enda dek tu bisi mai ati jai ngagai kami ti indu. Gamal baka dek tu, ukai nya ulih pecaya, keruk gaya” ko Miya ngenyumbong ke diri. Kebendar Miya sigi ngelala lelaki romeo nya. Iya pan bisi nyimpan pengerindu ngagai lelaki nya, tang pengudah nemu laki nya pengindu, iya nyurut kediri. Ko dalam ati iya din “cinta tak semesti nya memiliki”. Iya endang lama nemu sapa Entakit, tang sengaja ngaga diri enda ngelala siku nya.

“sumbong amai dek tu wai dara kumang, nadai ngawa ga, peda mata aja, enti bepansa anang enggai nanya “ ko Entakit meraya, taktik ngumpan.

“kapa aku nya..nama dek menteri mesti ditanya” ko Miya ngemilut ka mata, bajet mahal lah.

“kati deh. Engka bisi juduh kini..auk baka tu meh, ila aku mulai ka duit tambang ngagai dek baru auk, ila aku ngiga dek” sambung Entakit. Ke bendar laban Entakit ka betemu enggau Miya baru, laban iya baru betemu bepansa, bedau nemu nama indu nya meh. Nya ngasuh ati bekira-kira ka nanya ngiga, mansik mutik pendiau indu nya. Laban ti baru meda, dini meh alai indu tu belalai ngelama tu, enda dipansa channel aku.

Miya agi ingat maya Entakit negah iya maya pulai makai lemai ari dewan makan sida. Siku nya enda ngelala iya tak ka nundi iya. Nyau tekenyit pama Miya ditegah Entakit. Singin ka ningko pala Entakit jai nya.

“ nama nadai pengawa bukai dek tu, tak negah urang sengapa, tingko enggau pala dek nya legi” Miya ngaga diri nganu Entakit ke lekik-lekik ketawa rising-rising ngayan ka ngeli nyau betingka.

“ nadai ar, nya meh pengawa aku. Sepi asai dek nyamai, nya anang ngenyumbong ke diri” ko Entakit agi tuchum lelegup, ngicha ka indu dara tekait ati, mantai ka tektik nguntik, ambi dipeda manis enti tuchum.

“ ba dek Entakit, manding ka nama diri, nadai pendiau, rindu nundi urang aja. Patut lisa ngetik ka dek” ko Miya nyeling laki nya

“ aik, ukai iya ngetik ka aku, aku muai iya. Sepuluh kali indu baka lisa nya agi ulih giga aku meh.haha…aik, tadi dek nyebut nama aku enda ? kati dek ngelala nama aku wai indu dara, peminat aku kah” tanya Entakit

“ ehh..urang baka dek tu, sapa enda ngelala, samseng sekula, keruk, pengindu..kati ka enda ngelala romeo popular baka dek tu”

“ pia, kemaya aku tu bangat jai baka nya, anang ninga berita sebubu ngapa, enti nadai bukti. Uji peda dalam ati aku tu, urang ti ngembuan ati tuchi beresi. Sida ka enda ngelala aku aja nyebut ngapa nya. Uji enti dek bekelala enggau aku, tentu dek nemu enggau dalam agi’’ tektik Entakit sambil bejalai ngerimbai indu nya, nadai peduli ka urang meda.

“ kapa aku nya, ukai dek nya manah ulah. Kada enda bisi utai julok dalam ati dek tu ba aku. Kada enda ka beduan aku dek tu” ko Miya ngetis ati urang laki sekali ka nya beduan tauka amat.

“ auk ga enda aku nundi dek agi, bye. Ila betemu baru” ko Entakit berumban lari enggai ka siku nya majak meri iya jaku.

“alai meh..kapa bye dek nya”

Seminggu bekau nya, Entakit endang enda putus asa, iya majak mansik sapa nama indu nya. Nya ngemai nanya angela, indu ka sama kelas enggau Miya. Mula-mula engela enda entu ka madah, tang majak diumbuk Entakit, nya baru iya ka enggau syarat belanja makai skelin /aiskrim.

“hai Miya” Entakit nganti siku nya ka benung duduk nganti grace nganjung bup ngagai bilik cikgu.

“Sorang ka, nganti aku pia” tampung Entakit baru

“eh dek tu, kapa nganti urang baka dek tu, uji ubah perangai, anang majak ngachau aku, uji kachau urang bukai neh. Nya sida Gina, ka nya dikachau dek, indu jegit setipak enggau dek urang jai” saut Miya nyeling tajam.

“apu…jai amai jaku dek deh wai Miya. Uji bersopan santun mimit deh”

“ supan kunon..dek nya lebih agi..sapa madah dek nama aku” Miya ngalih ka jaku.

“rahsia.hahaha..bisi lah sumber sumber yang boleh dipercayai” ko Entakit jaku laut

“manah meh nya, dah nemu badu ngachau aku agi”

“enda aku ngachau dek deh..mina nanya aja, budi bahasa budaya kita, hehehe..kitai mesti saling tegur menegur ko jaku PM kitai, aku endang nitih ka ajar PM” ko Entakit mudi siku nya.

“wai Miya, enti aku berubah ka dek bekelala enggau aku deh”

“emmm..meda baka dulu lah..ni tahap dek berubah..enti dek no. 1 dalam kelas baru tau bekelala enggau aku”

“ok..peda dek aku berubah ila”ko Entakit

“ehem..ehem..nya seduai diting” ko grace tuchum meda ulah seduai.

“ eh..kemaya aku kala diting enggau urang jai tu”

“apu amai jai jaku dek wai Miya, ka endar ngelar aku tu jai..enti pia mupuk dulu aku” jaku Entakit lalu mupuk nuju asrama sida.

Sekumbang ka labuh pengerindu tepuruk penemu, ketegal dara tichin temaga, dara umang benung memekang, Entakit endang nyau ngudar penemu ari urang bukai, bakani deka ngulih ka madu jauh ba puchuk tapang. Ngumba ga ai madu indu nyeruan, enggai enda jauh ba puchuk lelegit dedin, uji tak gaga ba baruh dan buah sikup neh, ngambi ka nyamai nguru iya. Entakit ngiga penemu seribu guna, jayau batu maram, ari sida kaban, tang siti pan nadai ngasi. Udar ka penemu ari sida ti landik ka agi. Nyadi bakatu ka penemu ti dituntut Entakit, maya ngetu rehat jam 10 pagi, Entakit selalu ngirum ai sirap enggau mee teow, kueh ngagai Miya ngicha ka siku nya ngumbai iya mentas enda bekira lalu diterima nyadi ka ambai.

“ Miya oh Miya..kini ka dek tadi”

“ek..ditu meh aku, nembu ka kerja rumah beri cikgu Raymond ar..lalu empai tembu..”

“ ngaga kerja tang niru ..haha”

“ek kape peduli..janji siap..enda alah asuh cikgu bediri ba luar legi”

“emm Miya..tu bisi urang meri dek kueh”

“sapa meh bangat masau ari melanja aku tu”

“ek eleh..tak ngaga diri enda nemu..sapa agi enti ukai sulu ati dek Entakit nya lah”

“eeee…kemaya aku tu besulu enggau samseng nya.. “

“uk..reti nya dek enggai makai tu lah..enti enggai beri ka aku aja lah..rezeki..haha”

“apu dek tu jeti..ada ka tengali iya siku aja..kungsi tua meh..dek ga nemu aku empai ngatu tu..”

“tapi tu beri samseng nya ..”

“ka ia samseng..perut udah lapar..suap aja..”

“Miya..aku fikir kan..manah aja dek bepangan enggau Entakit nya, bisi lah sponsol tua ninting ari..hehe”

“eee..nemu deka ngiga ulih dek tu neh..kapa aku bepangan enggau iya nya..tangkap cikgu nama penyadi..nama dek enda jera ka ditangkap cikgu Franchis suba..dah ga surat seduai di tantai ka papan kenyataan..huhu..sedih nya..” ko Miya ngemeli ka siku nya..

“nya seduai berandau ka aku”

“ huk huk..”ko Miya batuk tekenyit meda Entakit ba tisi pintu kelas sida.

“ek kappa kami berandau ka dek nya, ukai bangat nama, enti atis bisi penyigat baka Eddie kuwing, nadai ngawa ga” ko Miya

“ nyamai mee teow beri aku tadi wai Miya”

“ nyamai pan ukai meh panduk dek”

“tang beli aku lah, khas untuk dirimu”

“ nama kebuah dek datai kitu, ukai tu kelas dek”

“nadai ..ka ngabas Miya aja..” ko Entakit mengambil konon.

“ udah ngabas pulai..terima kasih laban melanja, ka agi ila badu nganjung ka aku agi setakat mee teow enggau kueh baka enggi dek tu, aku pan bisi duet kena meli”

“bedau datai aku, dah di asuh pulai, iga dek enda kasih ka tu lalu empai duduk..nyin ari jauh aku datai, semata-mata deka ngabas dek kitu”

“sapa ngasuh dek kitu deh, nya anang kitu”

“auk meh, pulai ga aku..see u again”

“don see me again”

“see u again”

“ i don’t wan to see u again..alai pulai”

“apu amat bendar seduai melaki bini tu belaya” ko jeti ka duduk nyendi Miya, ari tadi enda bejaku ngemata ka seduai iya. Jeti endang ka nemu-nemu seduai sama bisi ngembuan pengerindu ngagai siku-siku. Tang agi kakang ati ka pengerindu dalam dada.

“kapa ngelayan iya nya..”

Maya betemu, Entakit endang selalu bisi aja ajenda leka jaku kena berandau enggau Miya..

“hai Miya seurang ka..”

“eee..gamal dek jai..anang ber-hai-hai”

“enti ukai hai, nama agi deh.. hai daling pia..hehe”

“ku pulas pending dek nya legi..enda nemu jaku..samseng”

“ Dini bisi samseng ditu.. wong sam seng bisi lah. Sekelas enggau kami. Seng bisi meh enti dek ka, nyin cikgu seng..haha”

“dek lah samseng..urang jai enda nemu malu..nama enda idup ka enti enda ngachau urang”

“auk..enda idup enti enda meda Miya..pujaan hati”

“uwek…ka mutah ku ninga jaku romantik bula dek nya”

“apu amat pama dek tu neh..jual mahal endar-endar .. empai ku jayau dek tu..”

“enda meh aku takut” ko tudah Miya ngaga diri enggai belama, ngenyumbong ka diri.. iya agi takut ka Entakit, dalam ati endang keran tang sapa sanggup bepangang enggau lelaki jai ulah baka Entakit. Enda ulih di perchaya.

Malam nya Miya tuchum kediri ngenang ulah Entakit ti amai berubah maya nya suba. Miya agi ingat maya Entakit enggau urang bejalai ka pengawa khimat masyarakat ba kampung sebauh, laban ti deka nujuk ke diri amai-amai deka berubah ngagai Miya. Maya nya Entakit labuh ngagai lutak laban tembu meda Miya maya kerja ba tengah laman. Urang nyau ketawa ka iya memagang, tang laban ti udah berubah, Entakit enda ringat ke sida. Miya agi ingat mega Entakit bulih lumbor 2 dalam kelas sains tulen sida ba pom 6 maya nya, mina enda talah ka siku anak cina ti seruran-ruran belajar. Maya nya mayuh alasan Entakit madah ke sigi enda alah agi enti peresa sekali da agi. Miya agi ingat mega maya Entakit ka berekak laban disangka Suwi ngachau pangan iya, tang Miya laban ke nemu cerita ke bendar sempat nagang Entakit ari ke berekah. Entakit enda nyadi ngerekak siku nya ketegal Miya. Tang laban Suwi ti ringat bendar lalu mukut Entakit ba kuyu, nyau telentang tudah Entakit laban ti enda ngadang. Pengudah ari sari nya Miya nyau rindu deka begulai enggau Entakit. Ko dalam ati iya din entakit nyau udah berubah, entakit ukai urang ti bangat jai, dalam ati Entakit din sigi bisi ngembuan ati badas.

“agi pedis bekau bukut Suwi sari nya wai Entakit” tanya Miya maya seduai betemu ba pasar ari minggu depan market.

“enda lah, nadai asai aku bukut iya nya, asai ke gigit nyamuk aja nya” ko Entakit madah kediri kering minta puji.

“ anang ka bula-bula dek wai Entakit”

“ auk ga, amai pedis meh nya, tang ketegal bisi Miya maya nya, nyu enda pedis.haha”

“ eeee..bula dek nya” ko Miya lalu nempik bau Entakit.

“akai ah, dah ga aku sakit, tambah ka dek agi ga”

“nya anang mayuh macham deh”

“nya salah ga, ukum ga aku, ukum nama ka dek wai Miya”

“emmm..belanja aku makai me kampua apai kiki din”

“bah auk meh..aram meh”

“kini seduai Miya” ko sida jenet sekaban. Jenet sekelas enggau Miya.

“Entakit ka melanja makai mee kampua”

“apu..enti pia kami ka enggau”

“wai Entakit, nya sida nya ka enggau bai meh, enti ati dek badas munyi ko dek” ko Miya ngumbuk siku nya enggai ka kumbai sida nya ka diting enggau Entakit.

“emm..aram meh” ko Entakit, dalam ati din endang enda berapa ka, laban ngachau peluang iya ka begulai enggau Miya.

Nama deh sida 6 iku nya dibelanja Entakit memagang. Pengudah nya Entakit enggau Miya selalu bergulai. Entakit majak rajin nitih ka Miya belajar, tama perpustakaan. Seduai selalu dipeda begulai. Entakit badu gila enggau indu bukai agi. Tang Miya selalu ngelimpang ka randau seduai enti Entakit berandau ka pasar pengerindu. Miya sengaja ngaga diri enda labuh pengerindu ngagai siku nya. Enggai ngelayan ulah Entakit. Tang Entakit semampai nyimpan pengerindu iya ngagai siku nya, enda putus asa. Maya nya seduai endang kin kia begulai, dini dini endur seduai endang dipeda nyengulai pangan diri tang enda bepangan. Entakit pan nyau nemu malu madah kediri keran, enda baka selama. Pengelama nya Miya endang sengaja ngaga Entakit baka nya, kena bejera ka siku ti udah beduan indu bukai. Ngambi Entakit nemu asai dikeduan urang bukai. Taja baka nya, Miya endang lantang ati enti Entakit bisi nyedi ngerimbai iya ba tisi, laban ngeso ka urang bukai siku nya terunda-runda keran ka iya.

Hari betukar hari, ama malam ama ga siang bekalih nunda ka pejalai pusin bumi, pengelama seduai begulai, seduai nyau di peda baka ka enggai jauh pangan diri. Enti siku bisi dia, siku gerenti bisi. Amat mula, miya ngengai ka diri begulai enggau entakit, tang sapa enda labuh pengerindu enti majak begulai, belaya, betundi enggau begagai ninting ari. Ari jeling mata seduai, chukup udah dikena madah ka pengerindu diri. Maya begulai jam nadai berasai, utai digaga semua nyamai memagang. Tiap hari di anti-anti maya begulai, enti siku nadai dipeda, digiga ditanya. Maya makai enggai enda sertai, sama bepeda tuchum enggai bebadu. Lauk ti enda nyamai dipanduk indai sekula, tau nyamai nadai di tampi. Enti ulih selalu deka begulai, selalu deka berimbai betunga mua betentang mata. Tang seduai sama enda tepadah ka diri, udah labuh pengerindu, udah jatuh cinta ko melayu. Sama-sama nyalam ka diri, ngemula ka ati diri empu, malu tanda penyanyau udah setangkai.

GENTERAN 6 MIYA NGERIJIK BUAH ATI TANGKAI NYAWA

Sekali da Miya teringat ka kali penudi iya begulai enggau Entakit lebuh maya iya ngasuh ati siku nya enseriban. Miya teringat ka perkara nya nyadi maya ujung taun pengudah seduai iya Entakit ngabis ka peresa, Miya ngambi SPM lalu Entakit ngambi STPM. Abis peresa nya Entakit endang mutus ati deka madah ke siku nya pengeran ati iya ngagai Miya. Iya ngarang sepuchuk surat. Disua ka nengah posmen baru iya freda.

Begau darah Miya lebuh tebaca ke surat nya, bisi nya gaga bisi nya takut dalam ati din. Ngeremang bulu pegu laban tegepang meda penatai surat nya. Enda panjai isi surat nya tang udah chukup ngasuh ati Miya kesal. Kesal laban Miya enda nemu nama agi utai ti patut di gaga, empai besedia meri pengerindu. Mayuh ga indu bukai tang nama ga kebuah iya deka milih Miya . Ke bendar Miya maya nya agi nangi ka Entakit sekali amai deka ka iya tauka deka beduan aja. Kelimpah ari nya, miya selalu ninga jaku petenah jai ari bala kaban ti segulai enggau iya baka sida Linda. Sida selalu nyindir miya ngumbai miya beli laban begulai enggau lelaki nadai tuju baka entakit, sida mega ngachuk Miya, anang nerima Entakit. Ukainya aja, urang tuai iya selalu nagang anang bepangan maya sekula. Linda laban ti mulut engkerasak, nuduh Entakit bisi pangan bukai serta udu nusi penyai entakit. Ari jaku asut bala kaban iya nya tadi, ngasuh runding miya nyau tekuing, taja ngelama tu iya nguji nerima semua enggau ati tebuka. Ukai nya aja, pangan entakit ti dulu nyau ngelaya Miya, ngumbai Miya tu indu pengerampas ambai urang. Miya maya nya enyau kakang ati, nerima tauka enda. Miya pan mai Entakit betemu ba taman bungai ngerimbai pejabat pos menua sida ba luar sekula.

Entakit gaga amai ati ninga siku nya ngemai betemu. Ari jauh peda Entakit siku nya dah nganti.

“ lama dah nganti wai Miya” Entakit muka randau seduai sambil merati ke mua siku nya enda tuchum baka selama.

“Nuan nemu nama kebuah aku mai nuan betemu baka ke lemai tu?”ko Miya. Majak panjai sintak seput Miya laban iya, enda nyaut tanya siku nya.

“ Ka madah pengerindu ka nuan ngagai aku enda, aku dah nemu dek sigi deka ka aku ari mula, haha..” ko Entakit nguji ketawa tang enda lama meda siku nya nadai respon/reaksi. Mua siku nya memperengut dipeda.

“wai Entakit, dek udah salah anggap ngagai aku, aku nadai nyimpan pengerindu ngagai dek. Tua mina bekaban aja, enda lebih ari nya. Enti dek majak baka tu, badu aku bekaban enggau dek, badu meh ngiga aku agi. Anang masau jam nundi aku agi. Nya aja utai ka padah aku…..” ko Miya serius sambil mua malik ke bukai.

“nama ko dek nya wai Miya” Entakit minta penerang, engka tak salah dinga.

“Start ari sehari tu, tua nadai apa hubungan agi, badu meh dek begulai enggau aku agi, aku nadai pengerindu ka dek. Reti nya dek bertepuk sebelah tangan aja. Pia mega ku arap dek terima meh semua tu enggau ati ti tebuka.” ko Miya.

“ Aku udah bisi pangan, ti chukup manah pendiau lalu mega urang permisi, anak kepala pengajar. Jauh manah agi ari dek. Nama dek penyigat aja ti ulih diguna, ukai nya ngasuh senang, kada enda nuan mina deka ngayah ka aja. Badu meh..badu meh..ati aku udah diempu urang bukai..enti dek ka nemu, wilson nama lelaki nya..aku bahagia enggau iya, enda baka enggau dek asai ka ba neraka, selalu takut berari..ke penudi, aku minta ampun..lalu minta nuan madu ngachau aku agi..anggap meh aku tu urang bukai..anggap aja ngelama tu mimpi aja..anggap meh tua enda kala begulai, lalu dek nyadi urang asing ba pengidup aku. Enti dek amat sayau ka aku, badu agi meh ngachau pengidup aku, doa ka bahagia.” panjai jaku siku nya, jaku ke penudi ngasuh enseriban ati. Miya endang sengaja nempa jaku carik baka nya nelih ka ati tangkai nyawa ngelama tu, ti ngelalai ka pengerindu majak ngerekai.

Entakit enda terpansut ka jaku ninga jaku miya nyau baka umbak tsunami, enda ulih di seliah ka agi, terima aja meh nasib diri. Ai mata asai ka neritik asai ka enda, mua iya merah malu ditulak siku nya, iya enda ngadang diri direjik pia aja. Ukai nya aja, iya mega disema siku nya enggau urang bukai, dituduh nadai pendiau, jai ulah. Entakit nemu nya endang amat, tang anang meh ngunkit perkara nya baru. Jari enggi Entakit pen majak getar-getar bai penusah ati. Enda iya nyangka ngelama tu siku nya nadai ati ngagai iya, kempang ati madah iya mina mimpi Miya aja. Entakit mupuk bejalai nadai mayuh tanya, ngemai ati ti anchur lebur. Siang malam iya merampau, iya nyau kurang bejaku. Mulut senyum tang ati merinsa. Udah bekau nya Entakit enda entu pengerah agi, iya nyau amai-amai berubah. Kapa nya enti urang enggai ko dalam ati iya, kena merindang ati tusah. Ukai nya nadai urang bukai ka deka nerima iya. Tang Entakit endang landik ngelalai ka penusah ati iya din.

Miya empu nyau labuh ai mata, iya enda nyangka iya bangat kempang madah ke diri nadai pengerindu ngagai siku nya, kempang ati milih urang bukai. Dalam ati iya din, siku nya aja diau betaruh ngeregau ati iya din. Siku nya meh aja chinta iya. Entakit meh first love iya, urang ti ngasuh iya rindu nerus ke hari-hari buring ba sekula. Enti nitih ka ati, siku nya meh sulu iya ba dunya tu..siku nya meh nyadi laki iya enti kawin ila. Tang nama meh penyadi, utai dah enggai nyadi baka pukat burung enda alah di tusut agi, ka pan enda tinggal buai pia aja meh, ila tau meli baru. Ngepun ka jalai pengidup baru baka urang bukai munyi jaku melayu “ mencintai bukan nya bermaksud memiliki, memiliki bukannya maksud mencintai”.

Seminggu udah nya, Miya ninga rita kaban rapat Entakit, Remy mati tegal esiden ngena motosikal, naka meh penusah ati Entakit maya nya. Iya meda Entakit nyau baka urang ka gila nyabak ngenang penusah diri. Penusah direjik Miya empai lenyau padam, kaban iya ningal ka iya ari dunya tu ga. Miya nadai daya, peda iya aja Entakit. Dalam ati iya din, iya deka ngaum, meri peransang ngagai siku nya ngambi nerus pengidup enggau cakah tabah. Maya nyengai Remy ba rumah sida Remy, Miya semampai meda Entakit ari jauh, iya ukai nyabak ketegal remy, tang ketegal meda penusah Entakit. Puas iya ngendas ai mata ti semampai mansut ka diri enda alah ditagang Miya empu, kasih amai iya meda Entakit baka nya. Enda iya sanggup meda siku nya tusah merinsa kediri. Udah nya, linda ka ngachuk iya suba minta ampun ngagai iya, iya nusoi semua nya mina petenah iya aja ngambi Miya enggai ke Entakit. Miya laban ti nelap, madah nadai ngawa. Tambah mega semua cerita linda nya endang bisi pengamat.

Pengudah nya, Entakit nadai ditemu Miya rita ngemai diri. Sebulan udah nya Miya nemu Entakit udah jauh nyemerai tasik besai ningal ka iya ngagai menua tasik ba London. Maya nya naka meh penganchur luluh ati Miya, baru iya deka narit jaku iya suba ti enggai ka Entakit, baru iya deka minta ampun ke penyalah iya, siku nya udah lenyau ningal ka iya, enda temu penunga di menua urang nadai bepadah. Dalam ati nyabak sinu ngenang, ai mata labuh keberai tanda penyayau nyau udah jauh dalam, sulu ati udah pegi jauh enda temu penunga naban ka pengerindu tebunsa ngapa. Anchur luluh dalam dada ingat ka pengasih enda terbantai, diatu ila enda temu ulih di tusut baru pengerindu danji lama. Kesal dalam ati ketegal pengerindu enda tepadah. Telih ti ditempa diri pedih agi ari telih laban urang bukai.

Pangkung luceng jam sida Miya berting-ting, ngasuh iya terkenyit ari ngenang pengingat lama kisah chinta enda nyadi nyata enggau Entakit. Jam dinding nunjuk ka jam 11. Lapa meh pengingat nya datai baru, engka ketegal lemai tadi apai indai nyebut pasal kawin ko dalam ati Miya. Ai mata iya berasai nerusur nengah kuyu mimit, nyabak kekisi dalam ati ngenang iya ti udah nulak Entakit 7 taun ti udah. Dalam runding Miya din, kati meh gaya pengidup Entakit diatu. Kada meh Entakit agi ingat ka Miya. Kada meh Entakit agi sayau ka iya baka udah. Naka meh penyesal dalam ati iya din. Engka nadai juduh meh nya, engka dah atur petara.

Selalu tudah Miya bersampi ngagai petara ngicha ka seduai tau bertemu baru enda ngira maya, jam enggau alai. Ati iya din majak berandau kediri…

 “Kasih meh ka aku tuk wai sulu ambu ati. Sampai mati beraie ngiga pengerindu ari nuan, lesi tubuh layu sulai nganti maya ulih begulai. Dinga meh sebana kumang ati nuan suba ti enda ulih mutar ke maya ulih begulai baru, sulu nuan ti udah dulu ngemula. Ditu aku selalu bersampi ngagai petara ngajih ke pengerindu tua bepun baru ari mula. Dini meh alai aku ngiga ganti pengasih sama baka nuan, penyiru ati baka nuan tajau disayau, dini meh aku ulih tetemu ke perening mata ti siru penuh enggau pengerindu dikembuan nuan. Taja nuan diatu nadai dipeda mata tang pengerindu nuan mengkang menuh ke peruji ati aku. Taja dunya bebali, pengerindu aku ke nuan enda putus enda luluh. Sema panjai seput idup ba dunya tu, aku agi tetap nganti, pulai meh wai sulu peraja mata. Ampun meh penyalah aku, ukai sengaja aku dulu ngemula ngelaya nuan suba. Amat tua enda betunga mua, enda betimpai mata tang nuan meruan diati… dikenang aku ninting ari.’’ Ko dalam ati iya din.. nyau enda berasai mata Miya nyau lelap tindok, ngujung ke pengingat lama iya malam nya padam tekala nya anyut di telan mimpi, nuju dunya ti enda nyata.

GENTERAN 7 GAWA NYADI LUTOR BA SPITAL SPESELIS NORMAH

Kerebak ka mua empalua, mata panas udah jauh tinggi, perenching nyilau ka mata,  bala mensia udah bekesegau bejalai kin kia. Nya ke tanda pengawa udah datai, duit ringgit mesti digiga, tanda mega siti agi hari endur begiga ka anak duit ringgit. Nya mega ka tanda seput tali nyawa siku-siku mensia agi redup-redup panjai umur. Kedai kupi mayuh udah terbuka tumu hari begiga ka anak jereki, berebut rebut ngelalu ka penatai sida pelangan. Sapa-sapa aja ka datai ngapil ngagai menua kuching, segi enda tau enda nguji ka pemakai ti pemadu popular menua sarawak baka mee kolok, laksa sarawak, Kek lapis enggau ikan terubuk. Enda tinggal mega mee kempua ka di kerindu ka mensia mayuh, kena ngering ka tulang ngirup pagi. Kereta nyau betusun ngalun ka kediri nengah kota kuching ti sibuk, nyau betekijap api kemudi tanda nekan brek ngetu-ngetu semut. Keda ka enda mereti enselepak masuk kanan kiba, nya ti ngasuh pagi ari chapuh inggar laban hon kereta. Nyangka nya ka berumban meh kini, enggai ka di anu bos datai ba upis. Sida ke bejalai kaki berumban-rumban nisi jalai, bisi nya gap, bisi nya enda endang bisi ajenda kediri empu. Bisi nya betekedayau beraban-raban bejalai menuh ka pasar kuching. Nya meh ke tanda Bandaraya Kuching udah chukup maju ari dulu, udah mansang nitih ka singkang arus dunya ke maya ari tu. Menua ditutu mensia di kelinggi reta pengaya, penyamai pengerai, pemerindang serta endur begiga anak penemu diperebut ke mensia rebak baru. Nya alai pasar ba kota Semarahan di sebut Desa Ilmu. Kati enda baka nya deh, laban pasar nya penuh enggau kolej swasta, politeknik enggau universiti perintah. Sapa sapa aja ke diau mendam dia deka ngasai ke penyamai idup. Ukai nya aja, Desa Ilmu enda entu jauh ari pasar kuching serta semak ari pasar-pasar bukai. Nyamai endur berbeli kebarang, begiga ke barang ka mudah serta narit ati. Nya alai mensia berebut berbeli ka rumah ti semak enggau genturung pendiau nya.

Tisi nya bisi bangku sofa ti disedia ka bala hutel, kena sapa-sapa ti nginap nyuwa hutel sida. Nyau kepuas-puas dedegi Entakit pan duduk, ngenang nasip diri pengudah tu, berunding ka jalai pengidup ti enda sama enggau sida ba london din. Baka ka menua sarawak tu ukai menua iya agi, ukai alai iya ti ada ka meda dunya. Nitih ka ati sigi ka netap diau ba london, netap jadi kawin enggau indu urang putih. Beranak betelesak nyentuk ke ujung tali seput ba menua london, kota ti nyadi ka buah mulut semua mensia, laban kenu ka menua nya nadai utai ka nadai. Tang pengidup entakit berasai enda lantang bisi pengurang mayuh penimpang enti majak ka diri nguan kota london nyin. Enti ka purih anak iban chulin, ukai nya nadai bala iban ka nguan menua london, laban mayuh udah bisi ditemu entakit empu bangsa iban ka diau bisi rumah ke diri empu. Ukai nya nadai indu iban empu ka di ambi ka buah ati tangkai nyawa enggau nerus ke pengidup nampung seput ninggal ka purih pantih nitih ka adat dunya baru, dunya daya idup iban ke maya hari. Panjai anak runding bujang sempurai ke baru datai ari atas panggau mahligai ke nurun ka dunya nyelat sida bungsu megat peturun raja berani.

Pegai siti sampul surat. Offer letter ari sepital HOSPITAL PAKAR NORMAH. Siti ari palan ti pakar tauka cakah dalam bidang perubatan ba kuching. Mangku pengawa nyadi lutor bedah. Setaun ti udah, Entakit udah bulih sijil master ari university of London, ditaga ka urang nyadi lutor pakar. Ari nya tadi nama tudah tuai dikalih ka nyadai Dr. Entakit Entinggi tauka Dr. EE. Dalam ati endang bangga, laban julok ati nyadi urang beguna udah alah pegai, udah sangkai ba tebing tanah seberai ka ngelama tu dikumbai aki enik enda alah gagai. Enda nunda ka sempama aki enik munya, baka tekura mantup ke diri ba bandir, reti nya utai ka digagai nyau enda alah, kira naka nya meh, tang ba runding entakit empu, sempama nya salah laban nadai utai enda alah ba dunya, munyi ko jaku aya tuai rumah, nuting imposiba.

Sapa-sapa aja ngumbai pengidup entakit menyana, ngumbai pengidup iya lantang serta gerah. Amat pan baka nya, pengidup Entakit endang sibuk enggau pengawa belajar aja, nadai tau gagal ari pun sampai ka ujung. Ni tau gagal bala lutor, enti salah mimit nyawa mensia tau lenyau sulai nengelai lemai, tau midang mupuk lelang nitih ka aki enik ba menua batang madai, ka penyakai semua mensia. Pengapus seput anak uda endang di jari sida lutor, taja pan petara nentu ke semua. Nya alai pemandai penyikal enggau penemu lama bala lutor enda tau dibuai lengka ka sida pia aja. Udah graduation tauka nerima sijil, Entakit diterima nyadi lutor ba London. Ari pengelaman ngelama tu, mayuh macham pembedahan dah digaga iya. Apai iya meh chukup gaga maya majlis konvokesyen iya, ni enda anak iya udah sama taraf baka anak urang putih ka bukai. Anak pandai, megai pangkat lutor nya meh ko julok ati iya menya, nadai utai pemadu ke deka iya dalam dunya tu, enti enda deka meda bala anak iya pandai memagang, senang lantang lalu idup menyana. Enda ibuh meh pengidup iya tusah, nadai pendiau ketegal ngulih ka belanja kena ngulih ka duit ringgit, ati iya udah chukup lantang meda bala anak iya diatu udah mujur megai dunya nyadi mensia ke beguna.

Dalam surat nya, Entakit dipinta ngejister diri enda tau laun ari ujung bulan tu, ujung bulan lima. Dalam surat mega madah ka iya udah disedia ka rumah ungkup bala lutor, sebarang maya ulih pindah. Sebarang maya ulih ngenatai ke diri lalu enggau bala lutor ke bukai mutar ke penusah menua diri empu. Semua utai tu endang sengaja ditempa bala pemesai sepital, lebih-lebih agi bala menteri ke selalu meri peransang jaku tesau ngagai bala anak menua sarawak pulai gawa ba menua diri, ngambi sama besaup ngemasang ngadu ke menua sarawak ka agi benung mansang. Lutor baka Entakit endang lama udah digiga sida. Selalu ngelama tu, bala pemesai spital selalu ngambi lutor bangsa urang putih datai gawa, tang maya tepeda ka nama siku anak iban ENTAKIT ANAK ENTINGGI, asal ari pelilih sarikei, top student ba universiti london, sida bela alit ati deka nemu pendiau anembiak siku nya. Maya tepeda ka profail Entakit, sida endang nemu nya urang asal ari sarawak, sekali ka bangsa iban tauka bangsa bidayuh, kati deh laban nama Entakit bisi ngundan “ANAK”. Berunding deka narit iya pulai gawa ngagai menua sarawak empu. Taja pia sida enda nemu bakani deka narit iya, laban Entakit nadai ati deka pulai, deka terus netap gawa ba din. Tang bala pemesai spital tetap madah kediri deka nganti pemutus ari iya, sebarang maya tau meh iya melapor.

Angkat ari nya, Entakit mupuk begadai nuju bilik mandi. Lembau isi dibai mandi pagi, asai ka tinduk agi, laban tubuh iya agi nitih ka gaya hari menua london de din. Enti menua Malaysia siang, menu london malam. Nya ti ngasuh iya lubah amat deka nunda nitih ka pendiau gaya hari menua Sarawak. Pengudah nya, iya nurun ngagai restoran hutel, ngirup pagi kena ngering ka isi. Palik ka dinding, bisi di kait ka sida jam dinding berimbai enggau gambar indu megai ai Tsingtao, iklan ke tau ngerusak pengidup bala pengirup. Jam nunjuk ka jam 7 pagi. Bala ke gawa agi kisuk ngelayang bala ke datai kia, servis endang di kembuan kompeni ke bedagang ka hutel. Ba tengah di sedia ka palan endur engkah pemakai pagi, bisi nya mee, asi gureng, ruti enggau ai irup. Pagi nya ngirup pagi endang nadai berbayar ditaga ka hutel ngagai sida ka nyuwa dia. Ulah mensia ka ngirup endang mayuh macham, bisi nya ke diri diri, bisi nya ngemai tawing lalu kedua nya sampal diri sebilik. Dinga Entakit apai tuai cina siku enggai badu-badu bejaku ngena talipun, dah ga nya full volium, inggar bendar asai ka ninga radio jaku cina, nyau kucau-kucau munyi semalau capuh. Sepiak iya siku indu urang putih, tengan umur megai surat khabar lalu ngirup teh tarik, kediri-diri baka iya nyangka iya nya pelancong ke deka meda rampa menua sarawak ditu.

Kira jam 8.30 ka alai Entakit mupuk ari hutel. Sari nya Entakit ngena gari baju formal, reti nya ngena tali rekung, baju kot chelum, kasut kulit enggau tanchut panjai jenama polo. Saritu iya deka ngerejister diri, buring ga enti majak kediri-diri ba hutel nadai urang enggau bekaban. Depan hutel bisi kereta suwa udah nganti.

“ selamat pagi encik, saya boleh tulung hantar encik pegi mana-mana” ko apai tuai driba teksi

“pagi, hospital Normah” jaku Entakit seleka dua aja.

“beg encik”

“oh. ya” ko Entakit nyua ka beg iya ngagai driba

“encik mauk buat apa pegi spital sana” ko apai tuai driba meda Entakit tak duduk enda memunyi, ngemai siku nya berandau.

“kerja” saut Entakit pandak baru

Dalam kerita pasang ka radio Cats fm, jaku melayu. DJ hamzah kucah-kucah bejaku, ama jaku melayu ama nya jaku melayu sarawak. Bisi nya temu Entakit bisi nya enda. Empa pengelama enda kala jaku melayu. Enda lama udah nya, lagu iban di putar ka DJ cats ba churung ribut. Dinga lagu “hilary-pengingat lama dikenang” , taing-taing mechah ka sunyi dalam kereta.

“encik bansa iban ka”

“em iya”

“pia, aku pan iban mega, nama aku john, john rambor” ko apai tuai driba nya tadi ngelakun ka diri kena iya merindang Entakit ngambi ka dibai iya berandau.

“ pia aya rambor, hehe..emm..aku urang sarikei, nama aku Entakit..aya tu urang iban mega pia”

“auk, sangka aku urang laut dek tadi, nya meh jaku melayu. Kerja nama dek ba spital igat” ko apai tuai nya tadi ngena jaku basa bansa iban, ngigat ka iya. Enti tadi encik tang diatu laban sama nemu bansa diri jaku iban meh kena.

“ empai kerja aku tu aya, deka melapor aja”

“pia, enti udah melapor kerja nama nya ila” ko john ituk majak ituk nanya

“ aku kerja nyadi lutor bedah, tauka lutor pakar”

“apu…amai pama dek tu igat, nadai kala nemu kitai iban bisi nyadi lutor bedah baka dek tu, puji tuhan”

“ nadai nya deh aya, aku agi baru tu”

“ni nya enda igat, dek tu meh patut dipuji anak iban, tau gelar no.1 “

“haha..anang bangat muji aku dek aya john, engka ka nya enda ibuh dipuji, mayuh agi urang manah agi ari aku”

“kati ka enda deh igat, ukai nya nyamai ngiga lutor bansa iban baka dek tu. Ngelama tu lutor urang putih, ukai nya nemu jaku sida, lutor laut ni enda ambis kena anu sida ka enda nemu jaku sida. Enti bisi bansa diri nyadi lutor, ni enda nyamai tak jaku iban aja meh kena kami ka aki urang tu. Dek tu meh chunto anembiak iban ka dudi ari ila”

“terima kasih”

Bakanya meh randau mimit seduai dalam kerita sampai ka datai ba spital. Sua Entakit rm100 ngagai aya nya taja tambang enda ngenyampau nya.

“encik, tumpang tanya, mana pejabat opis hospital ini. Maksud saya main office” ko tudah entakit bejaku melayu enda betul. Endang ka semua kitai iban bejaku melayu ngena jalai ti ngena. Nya meh dikumbai sida ke nemu, jaku melayu iban. Tang nya nadai ngawa laban nya jaku diguna ba sebelah pasar, dini-dini alai, lalu semua urang mereti ka jaku nya.

“emm..sebelum tu, apa tujuan encik maok datang pegi itu upis..” ko pak cik ka duduk ba mua alai tama spital

“saya maok melapor diri. Saya dapat kerja disini”

“oh..ok-ok..mari saya boleh tunjuk kan..ikut saya” Munyi jaku sida ka pejabat, ti enda entu ka ngelayan urang ke enda dikelala.

Datai ba upis. Entakit lalu ngelanda kerani ka benung kisuk nunga komputer, engka nya meda facebook kini. Kerani nya ngam-ngam duduk ba pun pintu masuk upis, nya meh Entakit ngiga jalai muntang nanya dia.

“halu, selamat pagi. Boleh saya tahu di mana pejabat pengarah hospital ini. Boleh saya jumpa dia sekarang”

“u means Datuk Dr. Robert. Di sana, u jalan ikut laluan ini, belok kanan. Lepas tu dihujung sekali ada nampak pintu warna biru. Itu lah dia, dekat-dekat dengan bilik mesyuarat”

“terima kasih”

“jap-jap..kalau encik nak jumpa dia sekarang, dia mungkin masih ada meeting sekarang. Tapi encik boleh jumpa PA dia dekat-dekat dengan pintu masuk bilik pengarah”

“ok”

Tuk..tuk..tuk..ketuk pintu serta nyilak ka daun pintu lalu nyenguk ke pala ngilah selepak pintu. Iya madah ka diri deka betemu enggau ketuai besai spital nya ngagai PA dia. Di peda PA nya natuk lumbor talipun ba mija, lalu bejaku madah ka bisi urang deka betemu.

“good, morning sir”                  (selamat pagi tuan)

“morning”            (pagi)

“im Entakit, today i have to..” jaku Entakit enda apus, udah diputung Dr. Robert, bos besai spita normah.                (aku entakit, saritu aku deka..)

“are u Entakit anak Entinggi”   (dek entakit anak entinggi pia)

“yes..i am’’   (auk..aku meh )

“owh..now u really come here..so nice to meet u”   ( owh..diatu dek nyadi datai kitu..rindu betemu enggau dek)

“nice to meet u too” ko saut Entakit ( rindu betemu enggau dek mega)

“are u iban”           (dek iban ka)

“emm”

“nama berita nuan, Entakit” ko dr robert kelalu gaga nyambut penatai Entakit. Ni enda gaga, laban enda percaya Entakit amai-amai setuju pindah ngagai spital sida. Laban udah bendar iya mujok entakit suba, ngambi nyadi team iya gawa dia. Nya tanda spital sida deka majak pakar agi, laban kenu ko iya Entakit ngemai penemu ari menua London. Ngemai penemu ke baru ti tau dikongsi ke sida lalu ulih mantu spital sida tebilang agi ditemu mensia mayuh.

“manah, nemu jaku iban pia nuan tu ar..”ko Entakit enda datai laban empai nemu nama siku nya

“ just call me dr Robert” (kanggau aja aku Dr. Robert)

“em.dr robert” sambil ngulur ka jari ngemai betabi jari ka tanda baru betemu.

“nemu ga ga mimit-mimit, well…welcome to the club…and thanks because u come and join us here as a dr. Entakit..” saut Dr. Robert ti berbangsa cina, laban teleba jaku iban enggau bala iban ti datai berubat dia.

“thanks”

Ketungkah ari sari nya Entakit nyadi lutor ba spital nya ba bahagian pembedahan. Iya diberi siti rumah enda jauh ari nya. Pengidup besari-sari nyadi lutor endang udah nyadi asam garam ba pengidup iya, ninting ari endang sibuk, ninting ari gawa nyengulai bala bakih baru iya ti bukai. Entakit endang pandai ngereja pengawa, iya mega lutor bedah pemadu biak. Entakit sempat bekelala enggau bala sida ka gawa dia baka Dr. Lawrance, Dr. Wong, Dr. James enggau lutor indu urang putih dr. Jessica villary. Sida tu sama bela nyadi lutor bedah sama opis enggau entakit. Seminggu udah nya, baru entakit tetemu ka siku indu misi iban. Ari umba pendiau peda entakit, umur kira 23 agi biak. Asal ari kuching empu. Indu misi nya madah ka nama diri Vanessa, terubah seduai betemu maya makai lemai sida Upis. Vanessa tu umbas iya ga pemajik, maya tuchum ayan lesung pipit, ti ngasuh entakit geram meda deka nyubit kuyu ke pelu-pelu senaya bulan. Dalam ati enda kempang, nyangka bungai udah lama ditutu kesulai, takut ka tapang udah diwan rembia, enda alah di laya bujang kempang sulu urang. Ko dalam ati din nadai ngawa, peda aja anang ngempu.

Taja entakit bulih kontrek gawa ba spital Normah, iya ukai tak gawa dia aja, ama di bai, di panggil urang medah ba hospital besai kuching, laban enda chukup lutor ti landik ba hosptal nya. Kekadang suah mega entakit dipinta urang medah ba spital sebelah sarikei, sibu, bintulu enggau miri. Nya ti ngujung ka jam enda berasai jauh beputar, hari enda berasai jampat ngalih, tang entakit lalu empai ga tetemu ka indai iya ti lama udah jauh midang lelang nadai temu rita. Deka ga tudah bepesan dalam radio nunda ka leka lagu sebana penyanyi jenarino jeraki, bepesan ba radio, padah ka dini alai nuan diatu. Enda ga ati kempang minta tulung bala pulis begiga ka indai iya, enda alah di kumbai pulis mudi sida, laban tudah ka nadai rekod indai iya. Nya meh penusah ati anak ke udah tebuai ari pengasih indai, kia enggai kin pan enggai. Puas udah iya nyabar diri, medis ke pala ngasuh gila ngenang diri tak beli, bisi pemandai enda tegiga ka indai iya empu.

Kerja baka enggi entakit nadai tau ilap mimit, enti ilap nyawa tau lenyau nitih ka sida aki enik ba batang mandai. Ama nya pedis, ama ga senang. Maya ti mujur bejalai ka pengawa bedah, ati dalam din chukup pengaga, tang maya enda mujur sida deka dituduh enda ngereja pengawa enggau manah. Kerja kekadang kena anu bala sida ti datai berubat, laban enda nitih ka utai ko sida, baka sida ti lebih nemu agi ari lutor. Bisi nya datai lalu ngelaya, bisi nya datai minta enggau sabak-sabak, bisi nya ngundang enggau tusah ati. Sida ti kaya, datai lalu ngulur duit ringgit, ngasuh ngintil diri jampat ka agi, alai diau pan bisi class, mandang ka dunya tu enda adil ko munyi jaku melayu. Sida nadai permisi, nganti dulu, nganti bisi sida ti sinu nulung mantu, sampai sanggup ngaga iklan ba surat khabar minta penyinu minta bantu. Ba spital siku ti sakit sampal siti bas datai ngundang, ngabas sida ti sakit. Ni enda ambis di anu bala misi laban ragak berandau, menuh ka wad spital. Ni  enda, datai siku nanya, datai siku nanya lalu ngelaya, nuduh tudah ka sakit tak beli enda nyaga diri. Bujang bungas tauka bujang apai urang, mata sigi gining nengkila ka indau misi ka gawa, ko dalam ati din, bajik amat ga misi tu, sayau meh enda bempu. Maya malam betegaring bala mensia tindok ba kaki lima spital, seraya ka nguan bala diri. Macham ulah dipeda entakit ba spital. Ama sinu meh dalam ati iya din, kasih meda diri sebangsa di tuntong penusah.

Entakit nyau enda pengerah baka dulu, mayuh agi iya fokus, kurang bejaku lalu serius. Entakit ke diatu nyau jauh berubah, iya ukai Entakit ti dulu, iya diatu nyau smart, nadai cincai bekena ka jeans carik sebelah patung, buk nadai agi becurak perang panjai sampai rekung baka ka udah-udah. Gamal enda memusu agi, nadai baka ringin pulai mansai, tubuh dijaga manah, ninting ari enti ulih ngagai endur Gym. Perut nadai rerutu baka perut ikan buntal. Diatu iya mega nyau nadai mayuh macham agi umba udah megai pelajar pangkat master degree. Pendiau iya lebih di tuju ngagai kerja. Iya nyau enda masau jam lepak sengapa. Kereta dikena endang kereta menua tasik, lawa-lawa nunjuk ka diri urang pemisi besai gaji. Baju gari enda sengapa endang semua bejenama, ngambi manding dipeda.

Enti enda di pejal apai iya suba, enggai iya nyadi lutor, ka agi iya belajar pengawa dagang. Nyau pemuas Entakit majak nendur runding diri, nerima aja peminta apai ti ngasuh iya nyadi lutor. Ari pengeransing diri, diatu iya udah bulih nama baru Dr. Entakit. Sapa-sapa aja nemu nama nya, endang temegah ati laban kenu ko ati sida din, sida tu tau merubat urang ti sakit. Tau ngidup ka sida ka nadai daya agi. Tau nemu macham penyakit ti enda di temu urang sengapa, penyakit ke nyau enda alah bala manang. Bakanya meh pengidup Entakit, iya nadai ngembuan pengidup normal baka urang bukai, iya mesti ransing ati gawa, enda ulih tentu enjoy sebarang endur . Sebarang maya deka di kangau pulai ngagai spital, enda ngira nya malam, pagi , ujung minggu enggau cuti. Ka enda nyawa ga di intu sida. Idup enda tentu bebas.

GENTERAN 8 PENGINGAT PENGASIH INDAI

Pemulai Entakit ka menua sarawak endang ngundan reti ti amat besai ba pengidup iya. Iya ke bendar ukai nerima tawaran nyadi lutor enggau ati ti amat-amat. Iya sengaja mindah ka sarawak laban ti deka ngiga indai kandung iya empu, ukai pulai setegal deka gawa, kapa iya gawa menua sarawak ditu, gaji ukai nya sama besai enggau menua tasik. Tambah mega ditu ukai nya maju endar, enda sebaka menua London. Beberapa bulan ti udah iya bisi ninga berita ari kaban iya ngena emel, indai iya bisi di temu diau ba kuching. Tang dini alai iya ngenduh enda ga temu. Nya meh ti ngasuh ati Entakit berasai deka nemu, deka ngiga, deka mansik gaya pengidup indai iya.

Maya umur Entakit manggai 12 taun, apai enggau indai iya sarak ketegal apai iya enda tejaga ka ruang bilik sida, selalu enda betah diau ba rumah. Seduai suah belaya nyau enda sepenemu. Sida 3 madi di bai apai iya, Entinggi mindah rari ari indai iya. Laban ka bisi pemandai bisi duit apai sida ngambi luyar kena ngulih ka kuasa bempu ka sida tiga madi. Ba pengingat Entakit empu, maya nya siku da madi sida ti pemadu biak di ibun indai iya, ti berumur setaun. Udah ke beserara sida lalu nadai kala bertemu enggau indai sida agi. Enti sida nyebut nama indai sida, Entinggi nganu sida.

Sida tiga besai nadai pengasih indai, urang bukai bisi indai, sida tiga bisi enik sida aja. Ukai nya sama deh pengasih indai kandung diri ari urang bukai. Enik pan ukai nya baka indai diri. Suah sida di elak ka enik sida pia aja, ngadu ka diri. Lebuh maya lapar, kin ke kebun begiga ka buah enggau utai empa bukai. Buah lemba, kemunting, pisang gentu, buah letup nya meh selalu digiga kena ngalas perut. Maya bisi kemarau, empulut burung nya endang hubi Entakit, laban kenyang bepakai ka burung, bulih aja lalu tunu empa.

Entakit endang selalu meraya ka kasih sayau ari indai iya, deka makai lauk panduk indai iya baka urang bukai, bisi ngibun iya maya iya sakit lengit, bisi endur bedawa penusah ati diri. Iya ka meh nunda urang bukai betusi ka lekajaku “legi aku nusi ngagai indai aku, dek ngaga aku bakanya” maya belaya diri sebala. Dini tan bakatu belama ko dalam ati Entakit.

Urang bukai enti ba sekula di anu bala kaban kini, bala pengajar, bisi alai endur nusi madah ka diri digaga urang baka nya. Ka nusi ngagai enik sida, enik sida ka agi nganu sida ngumbai sida nadai peneguh ati, kumbai enik sida enda tan ati. Enti maya belaya enggau bala betunggal sida, suah agi sida entakit salah ba enik sida, laban kenu ko enik sida, sida tiga menyadi murih ka apai sida pama memegang. Maya makai suah agi sida di nah ka enik sida pemakai ka enda nyamai, enik sida endang papas ati. Nya alai sida tiga madi besai enggau ati kering laban teleba di tempaya ka enik sengapa.

Apai sida selalu nadai diau ba rumah, laban selalu kerja traveling ngagai menua bukai. Enti sida nusi ngagai apai sida, sida di embal ka apai sida agi. Ni enda sida aus pengerindu indai sida. Nya meh pengidup Entakit berasai timpang ketegal nadai indai. Naka meh pengempang apai sida nyerara sida ari indai sida. Ni enda tudah nyau tergantung kampar nadai indai ngibun ngerekun. Air mata semampai labuh belama ngenang diri merinsa, enti meda urang bukai begulai enggau indai sida, dalam ati din jeles meh nya. Di peda ari luar Entakit endang teguh, kering berani, pintar tegal, pandai jelai rita, kering semengat, senang lantang..tang dalam ati iya din merinsa, puang, lemi ketegal jauh enda segulai enggau indai.

Diatu nyau berapa belas taun udah sida beserara, Entakit nyau ngembuan ati ti deka nemu dini alai indai iya diatu, iya deka betemu betungga mua, bertimpai berimbai  betemu mata, bejaku enggau indai iya baka ti dulu menya. kada meh indai iya agi ngelala iya, kada meh indai iya agi ngambu iya nyadi ka anak iya. Nuai ni meh indai sida diatu, agi gerai ka enda kini, lalu mayuh macham tanda tanya ngerandau ati iya din. Kempang amat indai sida nadai kala nyenguk iya agi ngelama tu. Kempang amat indai sida enda ingat ka sida, enda ibuh ke sida, nadai ngundang midang pia aja. Taja pia sida madi bela nadai siku nyalah indai sida, nyema ila indai iya enggai nerima sida, sida enda ngenggai.

Penatai ba sarawak ati iya asai ka sinu ngapa nadai utai negu, ngenati ka kini penunga indai sida. Sebulan tu, ati Entakit bisi regau laban nyau enda sabar agi deka betemu enggau indai sida. Malam asai ka enggai tinduk, malam di ambi mimpi kemayang lama menya indai iya. Gambar sida sebilik ka suba agi meruan disimpan iya, kena iya ngingat ka indai sida. Tang sayau meh gambar nya makin lama makin pudar, ngumba ka kalih singkang dunya.

Setaun ti udah, ba siti gereja katolik ba London, apai iya Entinggi udah mujur kawin baru enggau indu urang putih. Sida tiga menyadi pan sama bisi datai ngulu pengerami nya. Naka meh pengaga apai iya udah ulih niri ka rumah tangga baru. Mimit nadai meh ngenang temawai lama bini iya suba. Apai iya mega udah netap ka diri deka terus diau ba London sampai ka pengabis seput. Sida entakit menyadi nadai nagang apai sida, tang mina nyukung laban kasih ka apai sida ti lama udah duda. Apai sida pan bisi ati deka bepangan baru, bisi ati deka bisi kaling enggau bekaling, diau serumah makai segulai.

Menyadi entakit, Ensibun udah mujur muka bisnes ka diri empu ba London, lalu diatu nyadi tokey besai, empu kompeni ngaga rumah, andau enggau mayuh macham pengawa ti besangkut paut. Menyadi indu iya, Entagi agi benung nyambung pelajar degree dalam bidang microbiologi dan teknologi. Sida semadi endang purih pantih urang ti pandai. Diatu sida sama bela menyana magang lalu nyau tau ngadu ka diri. Ensibun udah bisi anak siku, jadi enggau indu iban ti diau ba London mega. Entagi laban ti jampat diatu udah bisi tunang, enggau urang putih, alexson nama iya, siku ari pemesai ba kompeni ngaga kereta. Reti nya sida sebilik udah mujur dalam batang pengidup. Mina entakit aja agi terkapa-kapa, agi begantung kediri-diri nadai pangan laban ti kelalu teguh dalam pengawa.

Amat meh bisi indu ribai deka ngemai beambai, tang entakit seruran madah diri empai. Enti nitih ka penyunyi diau ka diri, kekesat meh ati deka ngiga sulu, enggau bungah besari-sari. Tang meh bangat nyadi, kitai deka urang ga enggai. Merinsa amat ga ngembuan ati kelalu milih, enggai enda ngiga ambai kedeka nitih ka pengelebih. Gawa nyadi lutor, mayuh pengawa deka diperunding ka, mayuh utai deka diaduka, nya meh nadai ari deka begiga ka kumang pengibun tangkai nyawa, dara pengawan rumah tangga. Kala maya Entakit berunding, engka empai maya meh nya, nganti taun siti nyin ngiga ambai, datai taun nya, empai ga bisi, udah nya majak nganti meh, kada enda kena keduan antu nyadi bujang sampai ka tuai.

GENTERAN 9 MIYA ENGGAU IBUK JELIA

Kira seminggu miya udah kerja, udah bekau ka cuti empai lama, pengawa iya majak betambah, laban bos sida deka trabeling keluar, mayuh pengawa enda tau enda digaga enggau lengkas, enggai ka nadai urang sain ngemendar ka surat. Tiap hari endang pulai laun belama, tang miya enda ngeransi laban ti selalu befikiran positif, ukai nyenyamai iya minta pengawa nya suba. Iya ukai baka urang bukai, sebedau bulih kerja berdanji setuju gawa lebih masa maya interview tang dah bulih kerja, kerja selalu ngeransi, selalu ngular. Sekali iya pulai laun, iya terkenyit dalam upis bekau ditanya indai tuai siku.

“ Cik..cik” ku munyi nyawa nyapa, datai ari tunga belakang Miya.

“arr..opocot !!!” ko miya terkenyit lalat

“sori..sori..sori” ko indai tuai nya, kerja cleaner dia.

“mak cik ni..terkejut kita tau”

“sori”

“ada apa mak cik”

“tak ada apa-apa. Tadi mak cik tengok anak ni di dalam, jadi mak cik ingat nak hantar ini barang, di mana meja Puan Kartini. Dia suruh mak cik hantar barang dia pada meja dia”

“em..di sana mak cik, tu belakang sekali, sebelah kanan, dekat almari putih tu..” sambil nunjuk ka jari.

Pengudah nya, kira jam 7 lemai, miya pansut lalu nutup upis sida. Bejalai ngagai bas stop nganti bas deka pulai nuju rumah sida, las bas ko jaku maya ari. Nyau semak, Miya tepeda ka baru ibuk nya tadi, duduk kediri-diri, megai kambut kerus ti ngundan sayur, engka baru pulai maket meh nya ko randau ati miya kediri din. Ngelama tu iya enda kala meda indai tuai nya gawa ba upis sida. Pemuas-muas, iya mansang deka nanya, ngemai berandau kasih meda indai tuai nya tadi.

“hi mak cik, boleh saya duduk sini” ko miya nanya seraya ka nguji deka duduk ngerimbai ibuk ka ba mua iya nya. Laban ka nadai urang bukai dia, enggai enda enggai tanya iya meg ibuk nya tadi.

“duduk nak” ko ibuk nya tadi ngasuh duduk nisi iya, nepas-nepas penuduk bangku stisen bas dia.

“tima kasih, mak cik tunggu bas ?” bedau sempat miya ngabis ka jaku, talipun iya bemunyi. “ halu..” miya ngangkat ka talipun.

“dini dek diatu dara jedun..haha” ko Tina, ka serumah enggau iya, nundi miya enggau kangau jedun. Enda nyadi pengawa pama enda betundi ba sida sama dara, ketawa, nundi pangan diri. Jedun nya kanggau indu beli ba sida semenua.

“ek..agi bedau nganti bas tu, nama deh dara jedun, ka endar begiga ka urang”

“nya iya ka bula-bula..kada enda diting enggau sulu ati iya deh. Aku nemu dek ka endar berahsia-rahsia, laban ka ngempu nengali”

“apu..ni aku kala bisi sulu ati. Nah bujang apai urang enggai ka aku tu.”

“haha ni nemu.. Nadai nya salah deh..anang aja naban ka laki urang”

“Ka iya laki urang pan, enti ati keran..” ko miya, ngeranjur ka siku nya..

“Nama hal dek kol aku deh..nya ka endar kurius ngagai pengawa aku” ko miya ngelimpang ka jaku seduai..Kurius tu jaku pasar ka dikena anembiak baru ngeluba ka diri landik jaku ribai ti ngundan reti curious tauka ulah siku-siku mensia ka endar nemu utai.

 “miya legi meli ka kitai gula dek lagi auk, dah abis gula kitai. Siti dah agi meli lauk ka kitai mega. Beli ka Hotdog enggau ikan tau meh. Nemu ku dek sigi ngetu ba market legi..haha”

“ ee..nyamai-nyamai ngasuh urang..auk meh legi ga aku meli”

“anang auk auk ar ..beli..nadai kena ngirup kupi pagila”

“auk Mem..” ko miya lalu nutup talipun seraya ka malik baru ngagai ibuk ka nisi iya nya. Mantai ka tuchum lelegup, tuchum ti digaga-gaga kena ngenyamai ati urang ka meda.

“iban dek endu” ko indai tuai sepiak iya nya tadi pengudah ninga miya bejaku ngena talipun.

“auk..kati dek ibuk, iban ga”

“auk endu, badu dek ngangau ka mak cik agi..kangau ka aku ibuk aja auk endu”

“emm..auk meh ibuk..nama aku miya, datai ari sarikai”

“pia..aku Jelia Entema.ibuk Jelia tau meh ngangau ka aku”

“pia..dini ibuk diau..ba kuching ditu ka”

“auk endu, lama udah aku netap ditu”

“ibuk..kati aku enda kala meda ibuk gawa ba upis kami ngelama tu”

“aku selalu ga meda kita anak, ngelala kita ba upis, tang enda kempang nanya kita. Aku jarang gawa ba upis endur kita, tang ba upis tingkat baruh aja..nyapu sampah, ngumbul uras lalu nuchi rumah jamban ba baruh aja. Kadang-kadang gawa ba taman mega. Nya alai endu enda kala meda aku..lama aku udah gawa ditu, nyau semak 7 taun”

“pia..amat lama nya ibuk. Patut lah enda kala ngelala ibuk tu..tambah mega aku selalu sibuk ba upis”

“nya bas aku ibuk, mupuk dulu aku” ko miya lalu angkat

“nadai ko enggau meh”

Tengah hari perut berasai lapar, jam udah nunjuk ka pukul 1 ngalih hari, miya empai ga ngetu naip kerja ti disuruh bos sida. Bala kaban upis iya ka bukai nyau udah ngetu memagang, engka udah makai ba restoran kini. Puas berunding miya lalu nurun nengah lif, ngelawa kantin. Datai ba kantin, iya bisi terpeda ka ibuk Jelia ka baru bekelala enggau iya kemari.

“udah makai dek endu” Ko ibuk jelia dulu ngangau seraya ka tepeda ka Miya datai kediri-diri mantai ka tuchum.

“bedau ibuk, ka meli pemakai meh aku tu”

“ditu endu makai enggau aku”

“anang guai meh, nganti aku meli pemakai dulu”

“auk, anang lama, nyau begeriuk perut tu.”

Udah nya seduai sama makai begulai ba siti mija. Ka mimit aja urang makai dia tengah hari nya. Engka nyau leju kini bala staff upis makai dia. Miya laban ti nadai endur limpang, ka enggai pan makai dia aja. Pansut ke pasar makai nunda urang jauh nya, laban tudah ka nadai kereta. Nya meh tiap hari ngetu ba upis belama, enti bala bukai nadai ngemai makai ba kedai cina.

“tu endu lauk bai aku ari rumah tadi, daun kemiding gureng gulai pusu. Tu manuk panduk rebus enti dek ka” Ko ibuk jelia mantai ka Tapau bai iya tengah hari nya.

“apu..nyamai amat sayur tu ibuk..ka ga aku..lama amat enda kala makai lauk panduk stail kampung”

“nya..ngambi endu, enda alah aku kediri nya. Kelalu mayuh panduk endu ba rumah tadi”

“auk ibuk..enggi aku tu beri ka dek ga ibuk”

“enda ibuk endu, udah kenyang aku tu”

Pengudah nya miya bekaban enggau ibuk Jelia nya. Diatu nyau baka ka indai iya ibuk nya. Miya rindu amai nyengulai urang tuai baka ibuk nya, seduai selalu betukar-tukar lauk. Kadang-kadang ibuk nya di bai miya makai ba restoran, nyau abis terbai dagin manuk laban ibuk nya, laban enda teleba bekena ka pisau enggau sudu ba restoran. Nya ti ngasuh seduai sama bela ketawa. Ibuk nya dipeda miya nelap ati, nyamai di bai bejaku, jaku pan begadai-gadai ensuruk. Tang peda miya ibuk nya endang ngembuan ati ti merinsa, agi kerja sampai ka tuai. Ari randau seduai ibuk nya lama udah di buai laki, diatu iya janda lalu bisi anak indu siku ti agi benung sekula. Maya sembayang ba gereja SECRET HEART ba kuching, seduai nyau baka indai enggau anak, duduk ngampun penyalah diri ba paderi.

GENTERAN 10 AYAS KEMAYANG AMBAI BUJANG ATI MIYA NGEREGAU

Lebuh lemai ari, ujan turun mesi-mesi, sida Miya serumah benung kachuh ragak bertundi pangan diri. Dalam parit engkatak majak rauh-rauh ngangau ka ujan, sama bela nyapuh ka lemai ti chelap nya. Burung cap rumah agi ciap-ciap ba atas perabung, chelap lalu ngisai ka ai ari bulu diri. Jauh ujung nyin, agi ulih dipeda senaya kilap api FunFair ujung minggu. Belakang rumah agi bisi di dinga indu ngingit rauh-rauh ngumba ka malam. Rumah sepiak degum-degum, karaoke lagu Timothy-kerimpak kaca lauya. Tv bejaku kediri di lak ka sida ba ruang tamu, ngayan ka cerita bala doraemon benung terebai. Tina agi bebasu ka pingai mangkuk sepengudah sida makai lemai, laban lemai nya gintir iya bebasu. Eda agi mandi ba bilik mandi sambil belagu lagu Joyse Menti-Bujang Simunjan, laban ka benung nanggam pengerindu enggau Jiram, ti benung nyadi sedadu ba kem penrisen kuching. Sida miya serumah bisi 5 iku, ianya Miya empu, Tina, Eda,Levia enggau Susie. Rumah nya di suwa sida kungsi.

“ nama gaga dek dia susie, tak kediri-diri tuchum baka urang gila. Bahagia endar. Bisi endar utai temu iya ba pasar tadi belaba aku, kada enda nguntik apek nyual surat kabar ba stisin bas iya tu kini.haha”

“eah ni ka..meda gambar kitai bejalai ngagai wisma seberkas empai lama”

“pia..endai kemaya dek nuchi gambar tu deh”

“tadi, maya ka ngetu kerja tengah hari tadi”

“mayuh endar ga tuchi dek tu”

“emm sa indai ngasuh ngirum gambar ke menua, sida nyau lelenggau ka aku kini, kedua ka dikirum ngagai sulu ati aku..hehe..”

“auk pia.., iga ga nya jampat amat lelenggau..enda ka dek baru datai cuti sebulan ti udah”

“ba ia sida indai..baka ka setaun aku tu enda pulai”

“meda gambar dek nya ar..bai kitu ka”

“nya peda dek, ablum siti nya, ia ka udah dipeda aku”

Miya lalu ngambi ablum gambar nya. Silak pajak nyilak, meda gambar sida lima dara bejalai nyukat wisma seberkas empai lama. Sida ke bukai nya sama kerja nyadi kerani ba kompeni ti sama, mina miya aja gawa perintah. Peda siti gambar sida, sama bela mantai ka aksi jegit sida, nya ngasuh ketawa. Peda ga gambar siti, tuchum ga meda ulah digaga. Pemuas miya nyilak ka gambar, iya bisi tepeda ka gambar sida ti benung nepan lif tangga. Gambar nya di ambi maya sida nurun. Lama iya merati ka gambar nya. Ba belakang sida, iya bisi tepeda siku lelaki ti sama masuk kena snap dalam gambar nya. Lelaki nya ngam-ngam belakang susie, cun-cun masuk dalam gambar ayan ari paras dada ka atas benung malik ke bukai.

Miya asai ka ngelala asai ka enda lelaki nya. Peda iya ga gambar siti da agi,  lelaki nya malik ka mua. Lelaki nya numbas amai gamar ayas mua entakit di peda iya. Ati miya berasai enda lantang. Dalam ati pan nyima kediri, kada enda entakit nya deh. Enda puas meda nya, peda iya ga gambar siti da agi. Peda miya gambar lelaki nya endang ngam-ngam baka entakit. Runding iya majak berandau kediri betati ka pengingat lama suba. Kena iya ngenyamai ka ati diri, engka ilap mata aku kini, nyangka pelanduk dua sebaka. Dini siku nya bisi ditu agi, kada enda udah ngait ke diri ba lelegit puchok tapang, palan tinggi sida ribai menua london dedin.

Malam nya mata iya enggai tinduk, ayas entakit majak mansut ka diri ba runding ngepai-ngepai minta ambi. Asai tepeda ka ayas kemayang pengerindu seduai iya menya, maya umur agi berangkat bujang dara suba, ngingat ka maya begulai sejalai saum sekunsi siti pengerindu. Lapa meh ayas nya majak beduan iya ko dalam ati iya din. Engka laban pengerindu ati iya din agi nyimpan nama siku nya, agi sayau ka siku nya. Agi ngarap benih lama tau tumbuh nyadi baru, lebat bebuah baka benih padi ti baru. Ukai nya aja, miya udah berasai salah laban udah nipu siku nya suba, udah nelih ka ati siku nya.

Ngelama tu iya endang selalu besampi ngagai petara ngambi seduai tau betemu baru. Miya berasai takut serta malu deka natap betemu enggau siku nya. Iya bekira-kira nama utai patut dikejaku ka iya enti seduai betemu ila, taja iya empai pasti gambar nya tadi amat-amat entakit tauka urang bukai. Tauka mina iya ti nyima kediri. Iya semampai ngarap ka entakit ulih ngampun ka iya, nadai bedendam ka iya. Kada meh siku nya agi pechaya ka iya baru baka ke dulu, baka ka udah rambau sida sekula menya. Tang ari sima ati iya kediri, enda patut entakit agi bujang diatu, nyangka udah bisi bini anak entakit. Pengelama tujuh taun, macham-macham utai tau nyadi, tang laban pengarap ati iya din teguh, sanggup iya nguji nunggu siku nya, biar sampai mati, enda ngira nama utai ti deka nyadi.

Enti nyema seduai betemu ila, Miya deka beterus terang ngagai entakit, taja pan maya nya seduai tuai sama tuai. Taja pan entakit maya nya udah bisi rumah tangga, miya tetap enda peduli, ka dilaya bini urang , iya sigi tetap deka ngerandau siku nya madah ka chinta iya suba. Chinta buah pengerindu seduai menya ukai mina pura-pura, tang chinta udah di tanchang teguh jauh dalam ati iya din. Taja mega maya nya nadai pengerindu dalam dada, pengerindu ti luluh lela nitih ka umur seduai.

Taja tali rutan udah putus, deka ditanchang ka Miya baru, amat ia enda sebaka baka ke udah, jauh beda repa jalai umai. Enda ibuh ka bempu, asal aja meh entakit nemu iya endang amai keran suba udah chukup ba miya, enti nyema entakit udah beruang bilik. Ngambi pangan iya nya suba, nemu rahsia ati iya suba, ka ditaruh jauh dalam lubang batu. Tang kemaya meh seduai ulih betemu baru, kada enda sampai ka parai baru betemu ba sorga. Ba sorga kada meh seduai agi ulih betemu deh, ni nemu siku antara seduai engka nya masuk neraka deh.

Dalam ati miya din majak takut, takut lalu enda tetemu ka siku nya agi. Sampai ni maya agi iya agi ulih nganti siku nya, nganti urang ti nadai semaya pulai baru, nadai danji deka betemu, aum ti nadai pengunjung. Berapa lama agi diri sanggup nganti sekali ka nya setaun, dua taun tauka sampai ka maya betemu. “Enda alah aku majak nganti, umur majak tuai, apai enggau indai pan nyau majak nanya kemaya meh aku tu belaki”. Kadang-kadang bisi asai dalam ati iya din putus pengarap, nerima aja sapa sapa aja lelaki ti amat-amat ka nerima iya ka bini. Nerima aja laki pilih orang tuai iya, tauka nitih ka nasib atur beri petara. Tang ukai nya nyamai deh nyengulai laki ti ukai ka deka ati, kada enda lelaki penyamah deh, kada enda laki enda menyana deh. Enda alah di kemula ka baka sa endu buah rungan, sebedau jadi madah ka diri nyadi sedadu, tang udah jadi nemu nya sedadu bala taukey nio ngaga rumah, kerja kontrek. Puas meh miya ngining meda sida endun buah entimun diting bepegai jari raun ba taman bungai, lalu mansut lekajaku pemadu manis, ti tau ngasuh hari apus enda berasai nyau lemai, nyentuk ka malam enggai pulai.

 BETAMPUNG BARU… SORRY MEH LAMA NGANTI…

  1. kemaya tampung jerita nya pansut ooww?. ..bendar ngiga. ..nang best lha..

  2. Gelson Jang.

    Manah amat sinopsis cerita tu,…gi blala mca iya…enti ulih di ulah gai telemovie mnh gi tox….

  3. Latep Kadun

    apuu..mnh novel tox..jampat gik ka ngga smbung ea..nda sbar asai ati tox

  4. Enda puas ku macha novel tu….kmaya mh smbung genteran ke ila-ila….tapi nang best!….

  1. Pingback: Novel Iban – Pengingat lama di kenang selalu..Tampung 7 | Iban2U

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

Join 66 other followers

%d bloggers like this: