BATANG MADAI NITIH KA IBAN


Nitihka pengarap bansa Iban, udah kitai parai semengat kitai pulai ke menua siti ke dikumbai Sebayan.
Taja pia, semengat sida ti nyadi manang enda pulai ke Sebayan lebuh sida mati tang pulai ke tuchung Bukit Rabong.

Bukit Rabong tu tumbuh di tebing Batang Ketungau, pati Batang Kapuas. Bukit tu tinggi sereta renjan.
Bukit tu ulih peda ari menua pegai Sri Aman ke diatu laban bukit tu tumbuh ba garis entara menua Sarawak enggau Kalimantan, Indonesia.
Bukit Rabong tu meh endur Ini Inda Rabung Menua, Ini Inee Rabung Hari diasuh Sengalang Burung mangun Menjaya nyadi manang.
Bukit tu mega alai Engga seduai Challa nabanka anak seduai rari enggaika mati laban baya nitihka ti dipadahka Kumang seduai
Lulung ngagai Engga (Jerita Balang Balai Nyabung ba Majalah Pegari Vol. 5).

Menua ke dikumbai Sebayan tu iya nya di Batang Mandai Mati tauka Mandai Jenuh.
Endur menua Mandai Mati tu kenu ku jerita tuai iya nya ba entigis entara menua Batang Kalis enggau Batang Mandai.
Sungai dua iti tu sama bela mati’ ari Batang Kapuas di Kalimantan Barat, Indonesian Borneo.

Batang Mandai ke ulih peda kitai mensia tu dikumbai Mandai Idup, iya nya Batang Mandai iya ti bendar.
Agi kelia kenu ku jerita; kukuk manuk, ruik babi, munyi gung, tawak, bebendai, engkerumung,
gendang enggau nyawa mensia richah rami suah didinga orang ti nguan menua Batang Mandai tang meh tubuh mensia nadai dipeda.
 Reti nya sungai ti dikumbai Mandai Mati tauka Mandai Jenuh tu endang begulai tauka nyaruk
 Batang Mandai tang meh enda ulih peda kitai mensia diri tu.
Entara menua kitai ti idup tu enggau menua Sebayan semina nebal kulit terung aja.
Kulit terung tu ba pengarap tuai endang iya kulit mata kitai. Nya meh kabuah lebuh mata kitai badu kekesap (parai),
 kitai lalu terengkah di menua baru ke dikumbai menua Sebayan.

Pejalai semengat kitai Iban ke Sebayan endang neresa mayuh menua nyengkaum Andau Titi Rawan.
 Andau Titi Rawan tu kenu ku jerita badas memelan mesai leletan Ini Manang. Iya mega dikumbai orang
“titi begilik dudi diindik dulu lelunggik tesungkang punggang.” Pun iya muak ke Iban lalu ujung tauka puchuk iya muak ke Sebayan.
 Nyangka Andau Titi Rawan tu meh utai ke dikumbai sida ke megai pengarap Islam nya Al-sirat al-Mustakim tauka titian sirat.

Kala enda kitai ninga cherita pasal orang ke udah parai, benung diberi mandi tang ngeleda idup baru?
Tauka benung disenggai di ruai tang udah nya idup baru? Bisi kala ninga orang sakit raya nya udah nadai seput agi,
iya meh benung orang beterauh nyabak, dia iya ngeleda lalu pulai gerai? Pengudah ke gerai, iya lalu nusi pejalai iya ke
 sebayan lalu betemu enggau niang aki ini tauka kaban belayan ke endang udah lama nadai?

Dalam dunya tu semua utai idup ke menseput endang ngembuan jalai keterubah ada enggau mati ti lebih kurang sebaka.
Taja pen orang menua Barat jauh lebih maju ari segi teknologi sains lalu udah ngindik kaki di bulan tang sida mega enda ulih nagang pemati mensia,
 enda nemu nampung seput awakka idup baru baka selama. Nyangka ulih ngetanka seput orang ke sakit raya
 dalam kandang sehari dua aja tang ukai reti ngasuh idup meruan baka maya ke agi gerai. Naka ke diatu,
bedau bisi teknologi tauka penemu sains ti ulih nagang pemati, tauka ngidupka mensia ke udah parai.
Taja baka nya, sekeda ari penemu kitai mensia enda ngumbai pemarai tu pengujung cherita ba pengidup
laban mayuh kitai pechaya bisi pengidup pengudah mati. Pengidup pengudah ti mati ukai nyerangkung
pengidup selangkur tubuh tang meh pejalai semengat berarat tauka ba penemu kitai Iban, iya tau dikumbai pejalai semengat ke menua sebayan.

Dalam pekara pemati ke amat, enda kala kitai ninga orang ke udah dikuburka beminggu tauka bebulan nya idup baru.
Nya meh kebuah naka ke diatu lalu nadai siku orang ulih nusi pengasai sida ba sebayan.
Nyangka bisi orang ke amat-amat udah mati lalu angkat idup baru, ketegal ti
diidupka enggau ‘kuasa’ tang nya agi tau dikumbai semina cherita ke ditempa aja
 laban nadai buti ti nyengala segenda. Ke mayuh agi kitai nya semina kala bemimpi
ngasaika diri meda pengidup orang ke udah parai di sebayan din.
Taja pen baka nya, utai nya tadi mega nadai buti ti konkrit, nadai nyengala.
Lenak tauka panjai agi pasal pengidup pengudah mati nya enda tentu deka nyadi
dipejuraika enggau silik ketegal ti nyerekang penemu pengarap. Nya alai, penemu nya dilempaika ba siku-siku mensia..

ABIS………