LEKA SAMPI AI ANSAH IBAN


 Tu ai tusu tanah madu,
 beri antu Raja Sempurai,
 ai keruh tanah tumbuh,
 ari entigis ulu sungai.

 Ti udah ditanam dara Ngancam,
 alam emperan tanah landai,
 Padi pan nyadi,
 ari kaki nyentuk ke serarai
 lalu dibai iya pulai,
 ke perentang rumah panjai.

 Di jembi Dara mereti,
 di atas tikai ari pagi sampai ke lemai.
 Ari nya, lalu dipusin ka injin dua berintai,
 peda beras naka pemadas.
 Udah nya dipanduk dara gauk,
 ngena periuk tiga berintai.
 Digaga dara Lenta,
 ngena bingka lia pulai,
 lalu di pandi ka iya,
 ba gelanggang gelumbang bebungai.

Nya alai ke lemai tu,    
ai tu di kumbai ai Keling seduai sempurai, 
malikat seduai nabi Awai.   
Ai pengayu ku antu,
Bunsu Sempandai. 
       
Enti kelia,
teleba ngerebah ke gajah beganding dua; 
Dikena Rentap Guntur Menua,
nunduk di sadok ngelaban Raja,
Endang ke buah jaku sida ke indu,
dikegaga ka sida ke dara;
Di kenang sida ke bujang,
dipuji sida ke lelaki. 

Tang diatu
enda ga iya bakanya wai, 
Laban hari udah bebali,
dunya ga enda sebaka,
Laban diatu enti di seradak ke sida ke biak ;
tak enda berasai sida betejengkak ngenjun geladak
papan pelangka   
Enti dipakai sida ke tuai,   
 tak enda berasai panjai umur nguan menua,
     
Enti ditegu sida ka indu,   
 enda berasai sida nabu ubung benang jera,
Enti dirasa sida ke dara,   
tak enda berasai bulih peruji ati sulu di mata,
Enti dituang sida ke bujang,   
enda berasai beteridun sida Endun minta no. telepon,

Laban tu ga ai pengayu,
ngasuh kitai gayu guru,
lantang senang nguan menua. 

DIGAGA KABAN AKU ; CIKGU TU INGGANG