PENEMU RAMA


Diambi ari borneo post

Pemandai penentu kualiti pengidup
Ulih James Ling

Peninggi pelajar siku-siku jamin pengidup lantang dalam dunya moden

KAPIT: Perintah Sarawak baruh pegai Kepala Menteri Pehin Sri Abdul Taib Mahmud sigi balat ngemeranka kualiti pelajar bala nembiak iya. Kebuah pia, laban pelajar sekula penentu pengelantang pengidup sida dudi hari sereta peninggi kualiti pengidup dalam dunya moden tu.

Menteri Pemansang Tanah Dato Sri Dr James Jemut Masing mansutka jaku nya lebuh bejaku ba pengerami nyua perais ngagai bala nembiak ke bulih pemutus peresa manah dalam peresa perintah sida ba taun 2007 suba ngena siti pengerami ke dikumbai pengerami nyua perais Nembiak nyulut Yayasan Sarawak 2008 ba Hotel Meligai ditu apin lama.

Pengerami nya digulu pemesai kanan opis pelajar Shuib Maknum, Sapit Residen Emang Oyo Emang, Tuai Pelilih Menua Simon Japut Tiok, Walikota kapit District Council Philimon Nuing, bala pemesai ari Opis Residen enggau DO Kapit, pengetua SMK Kapit Ananthan Subramanian sereta kepala pengajar SJK © Hock Lam Frankie Sim enggau kira 200 iku bala bukai.

“Insentif mata duit tu ari perintah Menua diberi ngena Yayasan Sarawak, sigi ka perais bala nembiak ke bulih pemutus peresa chukup nyulut dalam peresa perintah baka UPSR, PMR enggau SPM 2007. Lalu aku ngarapka perais kita tu ulih balat agi meransang kita belajar,” ku Masing ke mega pengari rayat KN Baleh.

Iya meri besai terima kasih ngagai bala pengajar ke ngajar bala penerima perais nya, sereta minta sida bejalaika pengawa sida ti manah bakanya, laban pengajar meh ke besai bendar guna sereta tanggung pengawa dalam pelajar nembiak sida kelimpah ari apai indai nembiak nya empu.

“Kelimpah ari ngajar dalam kelas, bala kita pengjajar sigi nyadi tuai matak jalai bala nembiak, peransang tulang sida enggau penyanding sereta pengelalau penemu bala nembiak kita dalam sekula,” ku menteri nya.

Iya mega madah, Yayasan Sarawak bisi siti perais ‘Anugerah Khas Ketua Menteri Sarawak’ ke diberi ngagai pengajar ke chukup manah pengawa sereta besai budi ngagai dunya pelajar sekula di Menua tu.

Maya nya Masing madah ngagai bala apai indai pemesai reti sida enda tau enda sama bela kiruh enggau dalam pelajar sekula anak sida. Apai indai, ku iya, enda tau enda naka ulih nentuka anak sida ngaga pengawa sekula sida di rumah.

“Pelajar sekula siti pengawa nabur belanja kena beranakka puku, lalu siti chara pemadu ngasi kena ngemansangka mudal mensia enggau pengerembai penemu. Semina ngena pelajar sekula aja kitai ulih ngangkatka pendiau diri, kelebih agi bala rayat menua pesisir,” ku iya nampung jaku.

Ngenang pasal pemayuh orang ke nerima perais, Masing madah dalam taun2007 suba bisi 77 iku penerima, tang taun tu bisi 92 iku. Bala sida ke nerima nya nitih siti-siti peresa nya nyengkaum

UPSR (45), PMR (27) enggau SPM (5) dalam 2007 lalu dalam taun 2008 bisi 44 iku ke ngambi UPSR, 41 ngambi PMR enggau SPM 7. Reti nya bisi 15 iku penerima nambah dalam taun tu.

Iya lantang bendar ati, meda nembiak di menua pesisir ulih mujur dalam pelajar sida enti diberi peluang, lalu ulih mekit bala nembiak di nengeri.

Masing madah, pemujur tu datai ari disiplin sereta pengeran deka belajar enggau bebendar, sereta bisi visi sereta juluk ati ti nyemetak dudi hari ila.

Ku iya, pandai dalam akademik apin chukup, laban sida mesti ngembuan ulah ti manah sereta bisi disiplin. Enggau tu, iya madah bala apai indai enda tau enda bebendar mula ngajar nembiak kenyau ari sida mit ngambika sida teleba bisi disiplin lalu ngemeran ulah manah sereta nyadi mensia beguna.

“Nya alai kita nembiak enda tau enda belajar enggau bebendar, ngulihka penemu enggau pengelandik baru baka dalam dunya ICT, laban dalam era global tu, penemu ICT tu beguna amat.

“Kita anang enda nguji nyapai tikas ke pengabis tinggi. Laban udah SPM enggau STPM kita anang enda nguji nampung pelajar ngagai universiti. Diatu di Sarawak kitai mayuh universiti baka UNIMAS, UPM, UiTM, Swinburne University of Technology, Universiti Teknoloji Curtin enggau mayuh agi,” ku iya meransang.

Masing mega ngenang pasal pemayuh biasiswa ke tau dipinta nembiak kemaya haritu.