PENGERAWANG ATI – RENTAP


Pemerani Rentap patut ka chuan semua, ku peturun iya

 

RENTAP

KUCHING, 22 Ogos: Siku peturun Bujang Berani Iban Panglima Rentap ke tebilang ngelaban perintah Rajah Brooke 163 taun dulu menya, minta nembiak rebak baru diatu bechuan sereta beteladanka pemerani niang Rentap beserimbai enggau menua kitai nyambut hari merdeka ke-50.

Kenyau ari menya, maya Luyang Bansang, 48, agi umur bebelas taun, iya sigi suah ninga jerita ari apai iya empu pasal siku raja berani perang bansa Iban ke enda kala nunduk nyerah diri alah ngelaban Rajah Brooke dalam tiga kali betempuh besai dalam taun 1857, 1858 enggau 1861 di Bukit Sadok, Ulu Layar ke diatu dalam kandang menua pegai Betong.

Rentap ngetanka kuta iya di Bukit Sadok enggau chukup pemerani ngelaban perintah Brooke.

Iya parai tuai dalam kandang taun 1870 di Ulu Wak, Julau ke diatu dalam sitak Sarikei.

Taja pan dikumbai Brooke nyadi tuai rayat ngelaban perintah iya maya nya, aku sigi temegah ati bebasaka pemerani niang Rentap ke berani berambunka nyawa ngetanka menua ari diperintah orang datai, lalu nyadi siku raja berani ke ngerak bala mensia mayuh ngerembai semengat nasionalis,” ku Luyang, siku pemesai ba Opis Pemadah ngenang ngagai Bernama ditu.

Iya madah, Rentap tu pangkat aki ini iya lalu semua orang ba rumah panjai iya Rumah Ujar ke panjai 26 pintu, nemu pemerani enggau legasi iya bekelaika “Tawak Sadok,” siti tawak ke disimpan sida nyadi lanting ka tanda diri peturun Rentap pengelama lima serak (generasi) k’udah.

Nitihka tulis ba lumbung Rentap di Bukit Sibau, Pakan, siti tanda pengingat ke digaga baru ulih perintah menua, bujang berani tu datai ari menua Skrang, lalu kala enggau ekspedisi belayar maya agi biak, lalu maya tuai angkat nama pegari tebilang nyadi tuai serang ngelaban Rajah Brooke.

Lebuh James Brooke nyadi Rajah Brooke Sarawak kena 25 Sept 1841, iya ngumbai bala Iban di Batang Saribas enggau Skrang lanun tauka perumpak tasik, ngujungka Rentap beperang enggau Rajah ba Kerangan Peris, Skrang dalam bulan Ogos 1844.

Ba Rentap empu, Brooke meh ke nyadi lanun, laban keran ngerembai kuasa iya ngachau pengidup bansa Iban.

Luyang madah sida sekaban ke peturun Rentap chukup gaga ati perintah udah ngelar tuchung Bukit Sibau nyadi “Lumbung Rentap” kena ngingatka pemerani Rentap ngetanka menua enggau chara idup bansa Iban.

Lumbung Rentap ba Bukit Sibau tu digaga perintah baru dalam taun 1989 ke alai sida mindahka semua tulang enggau baiya iya ari lumbung lama enda jauh ari nya ngagai lumbung mendam ke digaga ari semin.

Rentap dikumbai raja berani menua Sarawak ulih perintah menua kena 27 Julai 1993.

Patut bisi chara kitai ngasuh nembiak diatu belajarka pengeran ati Rentap ke berambunka nyawa ngetanka pengidup bansa diri enggau menua ngelaban Rajah Brooke, ngambika pemerani enggau pengeran nya nyadika chunto bala nembiak diatu,” ku apai bisi anak tiga nya.

Ngambika mensia mayuh mudah agi datai nyenguk Lumbung Rentap ba Bukit Sibau, Luyang minta perintah nambah pemanah infrastruktur nyengkaum langkau alai ngetu sereta jalai trek nengah babas nuju ngagai Lumbung Rentap ba Bukit Sibau.

Lebuh ke ngelumbung Rentap dalam taun 1989, Sapit Kepala Menteri Datuk Patinggi Tan Sri Alfred Jabu anak Numpang nyimpul pengawa ke ngaga lumbung kedua Rentap munyi tu: Bukit Sibau tinggi gegiau kena tenggau lampu tampak, tanda Rentap ti benama Libau Keling Panggau Anak Sarawak.

diambi ari siti laman web.. enda ingat aku.. sori meh..ukai aku sengaja ka ngupi article nya.. tang kelaba aku manah amat enti kitai bekungsi ka nya..

enti salah aku minta ampun..