TIMANG AI ANSAH


OooooHaaaahhhhhh!!!!

Tu aku temuai baru datai ngabang ngabas menalan kita ditu!

Nyadi rumah kita? Bisi disempulang pagar api, dianti penti pemali tu?

Ni ai ansah deh? OhhhhhHahhhhh!!!!

 

Timang Ai Ansah

Ai sempuli padi nibung, tanam jayah di tanah matah langgung.
Dijereki dara tinggi enggau chandung.
Enti agi kelia mula menya, dikena Rentap apai Tambung ngansah perapang pedang bejengkung.
Tembu iya ngansah bai iya ngayau ke Batang Rajang langgang lepung.
Ngalah ke Kayan ma lesung, abis mati lesi ilang pumpung. Abis tingkil patung kena pansa orang ti mansang nyerang.
Tang nuan anang ga lemi dipati pala patung, sekut di perut kandung dabung,

kesal dijungkal kandang babung laban ai tu kena aku ngansah terinting puting ujung dabung ngambi ke nyawa nuan nekis nyaris inggar berengangung.
Di sema kami ditu munyi nyawa kapal lambung ngalun gumbang tasik besai leledung.

Ai datai ari ujung tanjung pagar belampar tuat lada,
Bedaun kelat buah angat tauka ubat seri masam.
Nira bunga ngesai ke tangkai nensamka tandan.
Ai datai ari nipah apung balu, lelendu nuduk manyang.
Ai ulu panchur biru sedam dalam lalu ditambah enggau ai buah padi mudah lentur ke tanah matah emperan.
Japai ambi dara tinggi lalu dapi di pendi tundan nepian.
Ruah tikam rempah chukup macham lalu dikurung benung benda pelawan entara purnama tiga malam.
Bealu-alu bau nesu rampang beram.
Jamah japai bujang besai lalu duduk di kedai mua penyawan.
Tu ketungkah arak manah ulih ngudar ari menua England.
Beri angka tumbuh tangan enggau jayuk kitai ti besaruk duduk betipan.
Perenchit ke aku mimit enggau changkir besuran.
Sua aku enggau tapa jari kanan kena aku ngansah tatuh dabung geman ngambi nyawa nuan nekis nyaris inggar dederam.
Digela aku munyi pusin injin bilun american suntuk malam tegayam lama petang.

 

 

ENDA DITEMU SAPA PENULIS ASAL LEKA MAIN TU..TAJA PIA AKU MERI BESAI TERIMA KASIH NGAGAI SAPA-SAPA KITA TI BISI UDAH NULIS TU..