sapa kitai iban ti pemadu pintar


Dunging ke mungkal urup Iban mega ngaga mayuh utai nyelaie dikena gawa ba rumah panjai

KUCHING: Berita Iban gaga bendar ati ninga urup Dunging udah dipasuk nyadi font komputer, nya alai terima kasih ngagai Prof Madya Bromley ari Unimas ke bendar amat ngaga pansik pasal raja tengkebang kitai Iban.

Pengarang Berita Iban engka dulu agi ari Bromley ngaga pansik mimit pasal Dunging, iya nya kenyau ari taun 1982 kelia. Taja pia, uji kitai mulaika pengingat mimit.

Bakejang meh Raja Menua Sarawak, pia ku jaku kenang bala sida di Nanga Ulai dalam menua Debak lebuh Dunging anak Gunggu parai dalam tengan taun 1980an menya.

Kebuah pia, laban pintu bilik penaik Dunging ba rumah panjai nya betulis ‘Raja Menua Sarawak’.

Ku orang ke nusui, bilik penaik Dunging jauh nyulut manah ari enggi orang bukai ba rumah nya, laban ke digaga ari teras magang, sereta diyas enggau ukir sereta rengka bukai digaga iya empu, enda salah baka rumah mijum.

Kaban aku, ke mega bekau kepala pengajar ba sekula primari Morris Unong – enda nemu dini alai iya diatu – ke sama serumah enggau Dunging, lebuh ditanya, sigi ngamatka berita nya.

Ku Morris: “Niang Dunging nadai utai dikenadai ba dalam bilik baka rengka pengidup rumah panjai endang bisi magang, muti nadai mayuh diri sebilik enggau betupi.”

Terubah penulis tu nemu rita Dunging tu kena taun 1964 menya. Nyadi lebuh Gawai Antu orang ba rumah panjai Sungai Belong ba dalam batang Malupa pati Krian di Saratok dia Dunging tu bisi nyadung utai chelak iya. Nyadi nya bisi ngundan gambar dero iya empu ngena ngepan Iban.

Ba tisi gamal dero iya bisi diselitka tulis roman sereta dalam alphabet Iban ke ditengkebang iya empu. Utai ke ditulis iya nya ke ulih bacha aku dalam ayat romanised, iya nya pasal tusut turun temurun Dunging empu ari Sengalang Burung.

Ba reti tusut iya mansik tauka nentu berapa serak sida sebilik nya semak tauka ngejang ari Sengalang Burung, ke nyadi petara bumai betupi ba pengarap lama Iban.

Siti ari utai ke dichelak iya – sangka aku ngena injin penyelak gaga iya empu – iya nya pasal ‘carta organisasi’ ba sekula ti endur iya ngajar bala sekeda anembiak rambau nya kelia pasal urup tulis Iban ke digaga iya empu.

Sekula nya, nunda ba utai ke disadung iya nya, diberi iya nama Sekula Sera Gunting (Sera Gunting School) iya nya ngangkatka nama uchu Sengalang Burung, anak Menggin seduai Dara Tinchin Temaga, iya nya anak tuai Sengalang Burung, ke disebut dalam leka main sereta jaku tuai Iban Aki Lang Sengalang Burung, Aki Bejugu Menaul Tuntung.

Bepun ari sekula nya meh Dunging ke lalu ngerembaika sistem urup Iban nya ke bisi ngundan 59 iti bansa urup munyi ke udah dipansik Bromley nya tadi. Nyadi bala sida ke endang sama belajarka urup iya nya, sama nemu macha sereta betulis surat enggau pangan diri ngena urup nya.

Aku empu dua kali meda Dunging, iya nya sekali dalam taun 1968 di pasar kayu Saratok enggau sekali berandau enggau iya empu di Sarikei dalam taun 1982.

Tang entara 1964 – 1985, mayuh ga utai udah didinga pasal Dunging, tang iya ke nyemetak agi nya ari tusui Stephen Sembilan anak Ambas ari Nanga Tut, Rimbas. Nanga Tut tu enda jauh ari rumah panjai Dunging ba Nanga Ulai dalam Rimbas, pati Batang Saribas.

Utai ke ditusui tuai aya nya enda bangat silik tang iya udah nyidi sekeda pengawa enggau utai ke udah dikereja Dunging datai ka iya nyau tebilang rita lebih agi ba genturung pendiau menua di Rimbas, Layar, Batang Krian, sekeda menua ba Batang Lupar, Bintangor enggau Sarikei.

Dunging endang orang ke ditemu mayuh penemu enggau pengelandik. Kelimpah ari ke nengkebang urup Iban nya, iya mega ngaga mayuh utai nyelaie ari enggi orang bukai, enda sesalah baka reti Leonardo Da Vinci menya ke tau dikumbai ‘master inventor’ tauka ‘raja pengkebang’.

Sekali tu, kitai nguji nilik, nama sekeda ari pengawa Dunging ke udah ngasuh iya bisi berupai nyelaie sereta nyulut pengelandik ari kitai Iban ke bukai.

Kenu ku tusui aya Stephen, Dunging tu endang udah bujang ba taun 1925. Iya endang udah bisi pengelandik jari baka ngukir, ngambuh, ngaga chapak mangkuk, ngaga sugu ari kayu tapang. Iya udah nguji ngaga ruding ari selung enggau ari takang aping. Iya mega bisi ngaga kesuling ari buluh. Siti agi utai ke bisi digaga iya nya engkerurai ari labu selaing enggau buluh lapan iti, lalu dilah iya digaga ari temiang.

Kelimpah ari rengka tebah musik asal nya tadi iya mega bisi nguji ngaga rebap ari tachu nyiur. Dunging mega bisi ngaga enyakun (nyau ka baka sapek) ari kayu empalaie betali dua iti ari rutan. Semua utai ke disebut nya tadi endang perengka dikena bemain musik asal kitai Iban.

Ba taun 1930 lebuh Gawai Antu di Nanga Ulai (rumah sida empu), Dunging bisi ngaga kipas angin ari kayu. Kipas tu tau bepusin ari kuasa injin kaki ari jauh. Iya tau bepusin ari sadau lalu nyepu pala pengabang lebuh ke duduk tauka mansa ruai iya.

Iya mega bisi ngaga gasing kena nabu ubung. Dulu ari nya iya endang udah bisi nanam kayu taya. Buah taya ti udah mansau lalu diketau, sereta lalu dipalu ba tikai ngena rutan ke digaga iya ambi ka pemalu taya empu. Nya baru digasing ngena gasing nya tadi sereta lalu nyadi ubung. Ubung Dunging tu mayuh udah dikena bala indu sida semenua kena nenun kain, pua kumbu enggau utai bukai.

“Kelimpah ari nya, Dunging udah mega ngaga ketupi ari kayu empalaie enggau ari kulit kayu tekalung. Iya mega ngaga pua, baju enggau tanchut ari kulit kayu tekalung. Utai ke digaga iya nya endang dichunto ba iya empu lalu gari nya dikena iya kulu kili. Orang bukai ke bisi pengerindu meda utai nya tadi ulih ga meli ari iya sereta lalu meri chunto sukat diri empu,” ku aya Stephen Sembilan madah ngagai pengarang dulu suba.

“Siti agi utai ke bisi digaga Dunging iya nya minyak wangi. Tu digaga iya ari rakit bunga kayu enggau daun kayu babas champur enggau bunga tanam. Nyadi bunga tanam ke dikena iya baka Bungai Kapu, But, Ruku, Gerempung, Rajang, chekur enggau lia. Sekeda ari kayu tauka bungai kampung ke dikena iya baka sida Bungai Seminggu, Empaka, Kepudak, Inus, Mutik, Kemarik, Kupi enggau Pakan. Bisi 40 bansa utai dichampur ka iya kena ngaga minyak wangi,” ku Sembilan.

Iya madah, semua utai nya tadi lalu dichampur enggau tepus, paku ikan, paku lilin, kayu garu, buah kayu balung, kupak pau enggau buah kepayang lalu dipegulaika iya semua utai ke disebut nya tadi sereta lalu dibalut ngena gari utai tauka pua. Panduk ngena periuk temaga, lalu ditumbak ka ba dalam tanah. Periuk nya tunsang lalu mua periuk nya diselap enggau batang tepus ti udah dipalu enggau daun paku nya tadi. Burit periuk ditunu enggau api, lalu mua periuk nya diterima ngena mayang pinang tauka kulit kayu. Udah nya kaus iya labuh ngagai tadu nya tadi lalu diterima ngena tachu nyiur.

Dalam taun 1936, Dunging nguji ngaga injin kena ngaga ngeli. Pengawa iya tu enda entu mujur. Enam hari iya udah nguji injin tu, iya pan lalu enda nyadi. Malam hari keenam nya iya tinduk lalu bisi mimpi ti munyi tu:

Mimpi asai ke benung ngaga injin ngeli. Dia iya berasai tusah ati ensepi pengawa iya enda mujur. Lalu asai ke datai indu orang putih, bansa ribai. Indu nya lalu nanya nama kebuah iya tak kelalu tusah gamal. Dunging pan lalu nerang ngagai indu nya madahka pengawa iya lalu enda nyadi-nyadi. Nya ngenusah ati iya. Dia indu nya lalu ngasuh Dunging nelentangka tapa jari iya. Indu ribai nya lalu bejaku: “Nuan Dunging, semua orang nadai pelajar nadai pandai ari nuan, laban jari kanan nuan tu bisi dengkah Jesus pijar.”

Dunging pan lalu tedani.

Udah mimpi nya iya lalu beperansang ngaga mayuh agi bengkah utai. Injin ngeli iya pan lalu nyadi. Ari nya iya lalu berengkah ngaga ngeli. Siku ari orang ba pelilih menua kami bisi ngena ngeli gaga Dunging niang aki aku bilik sepiak menya penama Jerampang anak Saat ke bensumbar ‘Pintu Batu Nanga Igan, Indu Balu Tengah Malam’.

Enda nemu pemanah niang Jerampang menya ngena ngeli gaga Dunging. Ngeli nya bisi kuning mimit enda tentu burak baka ngeli batu gaga ba China. Tang manah amat dipeda. Kenu ko cherita iya nyabut ngeli ngena anggup besi mit tang enda pedis laban iya ngena puchau pemenat.

Sebengkah ari pengawa iya ti agi bisi dipeda sampai ka seharitu iya nya kebun getah iya ti bisi nyelaie agi ari enggi orang bukai. Iya endang bisi mayuh kebun getah ke alai sekeda bala sida serumah nya bekereja bebagi dua enggau iya. Nyau keleju iya pan nanam baru kayu getah bisi 25,000 kayu.

Nitihka padah iya empu agi iya idup suba utai tu dikereja iya dalam taun 1932. Nyadi semua getah ditanam ba tanah ke bisi renjan mimit ba serantu jalai ari rumah panjai orang Danau ngagai rumah panjai Ulu Bayur.

Kira ke ba tebiang meh endur iya nanam getah nya tadi. Laban ke suah bendar nengah menua nya ngagai menua Bayur entara taun 1988 ngagai 1992 suba, sinu endar meda getah ke bebesai nadai dikereja. Iya ga renjan endar laban Dunging ke deka nguji tengkebang ngena chuban siti.

Ko cherita Morris Unong, udah getah nya tau dikereja iya pan ngaga panchung ba tiap batang getah nunga awak ka nitik ngagai siti batang payan ke udah dibelah dua. Nyadi payan nya baka tungga lalu nitik ngagai siti beledi besai ke nyadi chuban. Datai ka bepuluh iti pun getah ke bekunsi ka siti chuban beledi nya tadi.

“Pengawa tu manah amat laban iya ngurangka jam muat sereta awak ka enda ibuh ngaga chuban mayuh. Tang utai nya enda nunda ka ati iya.

Nyau ujung-ujung orang ke gawa dia nyau ngurangka pemayuh batang getah ke bekunsika siti chuban laban enti kelalu panjai batang payan ke nyadi churung ai getah mansang ngagai chuban, ai getah nyau meku serantu jalai apin datai ba chuban. Nya alai enda tentu mujur projek getah ba tebiang bakanya,” ku Morris.

Dulu ari tu, apin ke nanam kayu getah ke ngemayuh nya, Dunging udah bisi ngaga injin getah ari kayu kering. Nyadi injin tu ambika kena nginjin getah sida iya empu. Laban getah endang sigi mayuh, nyadi Dunging kira ka bulih amat duit ari getah. Orang ke ngereja getah iya pan mayuh ga. Nya alai ba menua sida Nanga Ulai endang jarang ke bisi bulih agi belanja ari Dunging.

Cherita pengawa iya ke bukai lebih agi ke ngajar bala anembiak ba menua ke besemak dia urup jaku Iban ke ditengkebang iya nyangka deka ditampung ba renggat dudi ila.