Pengawa bersekula


Nadai aset lebih ari pelajar sekula, pengelandik kena ngemajuka nembiak Dayak diatu: Ujang

KUCHING: Raban ari komuniti Dayak ngemeratka pelajar ke tinggi enggau serius, laban nemu semekih ba semua pampang pengawa tauka pelajar endang sigi berat.

Ba apai indai, labur ba pelajar bala anak dipeda baka nyukung pemansang pengerembai mensia, lalu ukai semina ka ngemansang diri sebilik, ku siku orang korporat, Dato Sri Celestine Ujang Jilan.

Ujang ke mega Sapit Presiden Dewan Dagang enggau Industri Dayak (DCCI) enggau bekau menteri kabinet menua madah, sida ari komuniti Dayak ke udah mujur ba pelajar sida iya (graduates) pan udah nambah enggau mayuh.

Kelimpah ari nya, komuniti Dayak bisi enda kurang ari 20 iku orang pemegai PhD tauka lutur falsafah sehari tu, ku iya.

“Pemansang pengerembai mensia siti penguntung tauka aset ti meruan dalam pengidup. Nadai komuniti ke enda nabur belanja ba pelajar sekula ulih mansang jemah ila,” ku iya, lebuh bejaku ba pengawa Curtin University Sarawak Foundation Certificate di Miri kemari.

Ujang diambi universiti nya nyadi orang ke bejaku ngelicha bala mayuh ba pengawa nya ke diatur ba Harry Perkins Lecture Theater Foyer dalam kampus nya.

Maya Brooke kelia enggau maya menua tu di pegai British kelia, raban bansa Dayak nadai kala ibuh ka pelajar ke tinggi, ku iya.

Jaku licha iya kena ngenyungkakka pelajar bala nembiak mayuh ba pelajar munyi tu: “Keterubah iya, awakka aku madah ngagai kita bakani pemaik enggau penusah tau nyadi ba menua ke dikumbai orang Menua Dunya Ketiga.

“Bedau entu lama Brooke abis megai perintah, lalu ba taun entara 1941-1945, Sarawak di pegai Jepun.

“Aku ada ba bulan 14 Julai 1947, dua taun udah Sarawak nadai agi dipegai Jepun, lalu maya nya menua Sarawak nadai agi dipegai Brooke mega, tang diserah ka iya ngagai perintah British.

“Baka mayuh nembiak bukai ke ada ba Menua Dunya Ketiga dalam taun 40an, peneleba pengidup aku ba rumah panjai di Sebauh, Bintulu nya pedis, tang taja pia, bisi pengerindu mega dikingatka maya nya.

“Nadai orang ulih ngasaika pemedis diau ba menua ke nadai ditemu orang di Borneo tu, iya nya nadai jalai, nadai endur berubat, nadai jalai bekomunikasi enggau dunya luar. Nadai utai kena merindang ati, mayuh utai dikenadai.

“Taja pan semua utai tu nadai magang, kami ke diau dia ulih ngidupka diri laban mayuh asil ari rampa menua tauka babas; sungai kami beresi lalu mayuh pemakai bukai baka ikan, jelu babas enggau asil ari babas. Tu meh aja ke ngidupka kami maya nya.

“Dunya kami baka kerubung nyiur. Komuniti Dayak nadai kala ngemeratka pelajar maya pegai Brooke enggau British kelia.

“Runding enggau pengidup kami lebuh nya endang udah diajar ngereja pengawa umai – ke nadai ulih ngemansangka kami, lalu sida raban bansa Melayu endang dipadu gawa ba perintah lalu komuniti Cina ngereja pengawa dagang.

“Kami ke ari komuniti Dayak, endang baka diajar idup bansa nya maya pegai British kelia.

“Taja pia, aku beruntung bebanding enggau nembiak Dayak bukai laban apai aku suba bisi pengawa dagang ke mit ba rumah panjai. Enggau duit ari nya meh kena iya melanja aku sekula.

“Lebuh dua iku ini aku ninga rita aku dianjung apai indai aku sekula, sida iya enda nyamai ati.

“Ini aku endang enda setuju aku dianjung sekula, endang enda nyagi aku sekula.

“Baka ketuai Dayak bukai maya nya, sida iya meda pelajar tu baka enda ulih nulung kami laban ku reti ba sida iya, nadai orang ulih nyambung pengawa sida iya ke diau ba rumah panjai, baka bumai.

“Nyadi pelajar ba sida iya baka senjata ke deka ngetas kaul apai indai enggau anak.

“Enti nitihka tradisi tauka ulah pengawa Iban, bala anak patut diau enggau sida apai indai sida iya, lalu ngintu apai indai sida iya lebuh sida iya tuai.

“Enti nganjung anak sekula, ba raban bansa Dayak tu baka ngelaban peneka sida iya, nya kebuah pengawa deka nyengulaka anak endang ditagang, ukai semina nya aja, enti nitih enda ibuh sekula.

“Semadi rebak diatu, pelajar ke tinggi ukai dipeda ulih komuniti Dayak baka melabur ba pelajar bala anak sida iya, tang semina ngulihka pengawa perintah.

“Enti nitihka adat, semina nembiak lelaki aja dianjung sekula, nyadi sida ke indu nulung apai indai sida iya di rumah panjai.

“Tu meh sekeda kebuah nadai mayuh nembiak Dayak rebak aku bisi sekula.

“Taja pia, kebuah bukai, laban menua pesisir Sarawak nadai mayuh sekula lebuh nya.

“Taja pan dua iku ini aku nagang aku besekula, aku endang ransing ati lalu bebendar belajar, datai ka aku bulih Gred 1 ba Peresa Senior Cambridge ba taun 1965.

“Maya nya, peluang deka sekula nadai mayuh, lalu laban aku udah tulihka Setipikit Senior Cambridge, nya pan udah pama lalu ngasuh aku temegah ati.

“Diatu kita bala nembiak beruntung laban mayuh peluang ba mua kita.

“Udah aku bulih Setipikit Senior Cambridge ba taun 1966, aku diasuh belajar ngambi kus Diploma ba Pelajar Akaun di Kolej MARA, Selangor – siti peluang diberi ka aku ulih Tun Abdul Rahman Yaakub, ke lebuh nya agi megai pengawa Sapit Menteri Pelajar ba renggat perintah besai.

“Aku nadai ngambi peluang nya laban aku berunding ka dua iku ini aku ke tentu sakit jantung enti seduai iya nemu aku belajar ba ???menua jauh??? di Semenanjung Malaysia din.

“Lalu dalam taun 1966, aku milih pengawa perintah nyadi SAO (Sarawak Adminsitrative Officer) tauka Kunsil, lalu gawa ba Bintulu, Baram enggau Lubok Antu.

“Lebuh nya kira ke besai pengawa nyadi SAO laban orang masa nuan. Orang ba rumah panjai enti sida nyambut nuan ngagai rumah panjai sida iya, nyambut nuan baka menteri.

“Tu meh selalu dikingatka aku. Dalam taun 1971, aku dipadu nyadi (Personal Assistant) ngagai Opis Menteri Adat enggau Main Asal Sarawak, lalu ba taun 1972, aku nyadi Pribet Sekiteri ngagai Opis Menteri (Welfare and Culture).

“Enti meda ari pemandai aku ke naka Setipikit Sekula Senior Cambridge ke ulih mai aku gawa datai ngagai pengawa perintah nya kira udah siti pemujur besai.

“Bekau Presiden United States Lyndon B. Johnson madah lalu aku nyebut nama pekara ke disebut iya: ???Kitai udah masuk ngagai umur alai pelajar tu ukai semina pekara ke bisi pemisi, tang iya ngasuh bisi semekih entara mensia. Iya (pelajar) diatu siti pekara ke enda tau enda, laban enti nadai pelajar orang nya enda ulih ngemansangka iya empu kelebih agi ba komuniti industri ke kompleks….kitai udah tama ngagai abad alai semua orang ngiga pemandai.???

“Maya Aku nyadi Menteri ba Perintah Menua dalam taun 90an, aku enggau ketuai Dayak bukai nemu lalu ngelala pemesai reti pelajar sekula, lalu endang patut dikereja enggau jampat, bala komuniti Dayak nganjung bala anak sida iya ka sekula kelebih agi ba pelajar ke berat laban penyampau graduat Dayak agi mimit endar.

“Aku selalu madah lalu enchabar komuniti Dayak ngasuh tiap iti rumah panjai ba Sarawak tu ngasilka pengabis mimit 10 iku graduat ka siti rumah panjai sebedau taun 2010.

“Respons iya pama ga. Penyampau graduat Dayak nambah enggau mayuh, lalu kelimpah ari nya, seharitu komuniti Dayak bisi enda kurang ari 20 iku orang ke bisi PhD.

“Pemujur pelajar bala anak aku nyadika chunto ngagai komuniti Dayak tu.

” Laban meda pemerat pelajar ke tinggi ba dunya diatu, aku nyukung enggau nulung bala anak aku awakka sida iya bulih pelajar ke chukup sereta tinggi.

” Seharitu, aku temegah ati madah ngagai kita tiga iku anak indu aku semua graduat. Malvina graduat enggau dua iti degree, iya nya Bachelor of Electrical Engineering (Hons) enggau Bachelor of Commerce (Australia), Angelina bulih Bachelor of Social Science enggau Masters of Public Administration (Australia) lalu, anak aku ke biak, Priscilla bisi PhD ba Chemical Engineering ari siti universiti ke besai ba menua England, iya nya Imperial College, London.

“Semua sida tu bisi ruang bilik sida iya empu. Aku nemu bala anak aku ngemeranka pekara ke dikemeran aku kelebih agi ba pelajar sida iya, baka nya mega apai indai kita ngemeranka pelajar kita laban sida deka ngasuh kitai nyadi orang ke menyana jemah ila.

“Suba, nadai orang ulih berunding ba menua Sarawak tu deka numbuhka Curtin University, Universiti Malaysia Sarawak, Swinburne University, Universiti Teknoloji Mara, enggau kolej pribit bukai.

“Tang dalam 40 taun tu, udah kitai merdeka dalam taun 1963, landskap pelajar ba Malaysia udah mayuh ubah, ari pelajar ke mayuh dipegai perintah dataika ngagai universiti bukai ari menua luar pan bisi numbuhka universiti sida iya ditu.

“Dalam politik mega, aku udah nyukung sekeda pemansang lebuh Sarawak udah merdeka.

“Enti kita ulih macha pekara ke disebut aku tadi, aku tu udah ngasai maya pegai orang putih kelia, ada ba endur ke salah, ba maya ke salah enti aku deka besemaka pelajar aku kelia.

“Taja pia, laban komuniti Dayak ke nadai mayuh pandai lebuh nya, bisi peluang bukai datai ngagai aku.

“Maya angin ubah datai ba landskap politik Sarawak dalam taun 70an, aku dipadu nyadi Kaban Kunsil Nengeri ba taun 1974, udah nya dipadu nyadi Menteri Nembiak, Adat enggau Main Asal.

“Berindik ari nya, aku udah megai sekeda portfolio kabinet menua nyengkaum nyadi Speaker, ba Kunsil Nengeri sarawak ari taun 1981 – 1987; dua kali dipadu nyadi Menteri Pengawa Berumah ari taun 1987 – 1992 enggau ari taun 1998 – 2001, lalu nyadi Menteri Pemansang Tanah ari taun 1992 ngagai taun 1997.

“Lalu dalam padu pengawa aku tu, aku mega dipadu nyadi Chermin ba sekeda opis raban dipegai perintah baka: Sarawak Land Development Board (1993 – 1997) enggau Sapit Chermin ka SALCRA (1994 – 1998) enggau Chermin SALCRA (1996 – 1998).

“Taja pan aku udah pinchin ari politik ari taun 2001, aku agi aktif gawa ba Opis ukai pegai perintah (NGO).

“Aku diatu nyadi Sapit Presiden DCCI enggau kaban ba Ahli Lembaga Pengarah (Member of Board of Trustees) ka Yayasan Kebudayaan Dayak (DCF). Kelimpah ari nya, aku mega Sapit Chermin (Bintulu Development Authority) enggau kaban Kunsil Curtin University of Technology Kampus Sarawak.

“Awak ka aku ngingatka kita, endang amat enti kita bisi keratas ke madahka kita nya ulih mantu kita ngiga pengawa jemah ila, tang enti deka ngiga pengawa kemaya hari tu, ukai semina nya aja, bisi keratas ngamatka kita tu udah bisi setipikit nyengkaum pengelandik kita ba siti-siti pengawa.

diambi ari mysarawak.