temenggung


Dulu menya, “Temenggung” tu pangkat diberi ngagai Paramount Chief of the Iban. Temenggung nya mih pangkat ke pemadu tinggi diberi ke tuai raban bansa Iban sebedau menua kitai nerima adat demokrasi.Iban keterubah bulih gelar Temenggung iya nya Temenggung Simpi Pala. Pangkat tu beri orang ari Panggau Libau ngagai iya. Dikena nyiri iya nyadi Temenggung, orang Panggau Libau meri iya tambai pengayau siti, meriam sebatang enggau tawak selebuan. Semua keresa tu agi bisi dikembuan peturun Temenggung Simpi ke nguan menua Dusun Sadap, Kalimantan, Indonesia datai ke sehari tu.

Iban keterubah diberi “perintah” Rajah Brooke menya nyadi Temenggung iya nya Temenggung Koh anak Jubang ari Nanga Entawau, Balleh, Kapit. Lebuh nya, semina siku aja Temenggung bansa Iban ti megai Iban di seluruh menua Sarawak tu. Nyadi Temenggung Koh tu tadi endang siku ari peturun Temenggung Simpi Pala. Temenggung “Paramount Chief” kedua enggau ke penudi iya nya Temenggung Jugah anak Barieng laban iya dipaduka perintah nganti Temenggung Koh.

Udah Sarawak merintah diri dalam serakup Malaysia, iya nya sepengudah Temenggung Jugah dipaduka Tunku Abdul Rahman nyadi Menteri Penguasa Menua Sarawak (Minister Incharge of the Sarawak Affair), pangkat “Temenggung” lalu dipechahka perintah. Ari nya, every Division bisi Temenggung ke diri empu lalu raban bansa Iban, Bidayuh enggau Orang Ulu mega sama-sama bisi Temenggung kediri.

Pangkat bansa Iban (ari atas ke baruh) : Temenggung – Pengarah/Pemancha – Pengulu – Tuai Rumah. Sida Menteri nya enda dikira laban nya pangkat ulih ari politik lalu ukai pangkat asal bansa Iban/Dayak.

Ditulis olih Nalong anak Buda