berjudi enda manah


Ulah bejudi diatu tau dikumbai siti ‘universal culture’ laban sigi utai dikerindu mayuh mensia di dunya tu.

Taja pan ukai semua mensia enggau bejudi, ulah tu endang bisi nyadi ba semua raban bansa di dunya, mit tauka besai, mayuh tauka mimit, bekulit burak, chelum tauka kuning.

Ulah bejudi baka nyabung, ambika banding, endang udah lama dikereja mensia. Di menua Rome, ulah nyabung, enggau ulah bentaruhka duit ngena jalai bukai, endang dikereja mensia mayuh kenyau ari jeman kelia, iya nya maya Julius Caesar nyadi ketuai bansa Roma dalam taun 44 BC (Sebedau Christ) kelia. Nama kebuah mensia keran sereta gagit bendar deka bejudi kini?

“Mayuh kebuah orang gagit bejudi. Ba aku siku, ngulihka belanja lebih nya ka batang pengeran deka bejudi, lalu kelimpah nya endang chukup rindu meda manuk bebintih enti maya nyabung. Lalu enti baka bemain daun, siti pengerindang maya ke lapang pengawa. Bisi mega orang bejudi baka bemain daun kena ngerindang diri, kena muai jam enggau mayuh kebuah bukai.

“Bala orang ke bejudi niki ngagai Genting Highlands kin, endang tebal agi deka menang besai, deka ngerindang diri, deka bejudi enggau nadai penangi tangkap polis,” ku siku kaki judi ke enda ngasuh nama iya ditulis ditu.

Ungkup bala orang ke endang rindu bejudi baka nyabung enggau main daun, enggau judi bukai nya nadai takutka ditangkap polis, laban pengeran enggau pengerindu sida ngalahka semua penangi enggau penakut, nyengkaum tengkerap abis duit, abis reta tengkira.