KAPAL TITANIC – Pengerawang Ati


Bala sida ke nembiak nyangka suah ninga leka jaku TITANIC. Kala mega leka jaku TITANIC ayan sebelah chap baju, ayan sebelah majalah bansa bukai kelebih agi meniga empat taun ke lalu.
Nama Titanic balat dipesebutka bala nembiak laban Titanic nya meh penama cherita tauka filem ti kala tebilang, ngerembaika industri dunya filem Hollywood lalu ngerekai serata dunya. Filem ti tebilang nya beheroka Leonardo D’Caprio lalu beheroinka Kate Winslet.
 
Ba sukut pengerawang ati kitai serak tu kitai ukai deka mantaika pengidup selebriti bajik Kate Winslet enggau lelaki sigat D’Caprio. Ukai nyerungkai filem nya tang jauh agi kin laban kami deka mai bala pemacha nyengkubang ari ni filem tu berindik, tauka ari ni penatai idea bala sida direktor filem nya bulih runding laban ketebal agi kitai semina nemu Titanic nya nama kapal ti lalu nyadika nama filem nya mega.

Ke bendar iya, Titanic iya nya penama sebuah kapal penumpang ti digaga pemadu ‘mewah’ ngambika dikena orang ngelayang tasik atlantik maya nya kelia. Iya mega kapal ti pemadu besai lalu digaga ngena teknologi ke pemadu changgih jeman nya kelia.
Pemanjai kapal Titanic tu 269 meter lalu pemesai buka ruang iya bisi 28.2 meter. Injin iya dipejalaika ngena kuasa stim (ai ti dipanduk ngena arang batu, gesak lalu musinka injin). Kapal Titanic mega disikap enggau perengka ke baru ke nadai dikena ba kapal bukai rambau nya. Nya alai orang mayuh bendar deka nguji ngena kapal nya, nyengkaum bala orang ti tebilang kaya mega.
 
Kapal Titanic berengkah digaga kena 31 Mac taun 1909. Iya digaga kompeni Harland and Wolff ba menua Belfast, Ireland lalu kos ngaga kapal tu maya nya dianggarka bisi $7.5 million duit menua nya kelia. Titanic tembu kena 31 May taun, 1911, disikap enggau ‘swimming pool’, gimnasium, bar, pub, restoran, teater, librari lalu bisi mega tempat bemain squash.
Nitihka sejarah ke bisi kala dibacha, penyampau orang ke enggau ngaga kapal tu suba bisi 15,000 iku. Ari dek siti ngagai dek siti ba kapal nya bisi disediaka lif lalu semua perengka baka mija enggau mangku nya endang perengka ti mar rega. Baka nya mega barang ti dikena ngias semua tempat, endang iya ari barang pengias ti mar memagang.
 
Kapal tu dibagi ngagai tiga kelas alai penumpang. Reti nya kelas ti kesatu iya nya alai ti pemadu manah lalu semina ulih dibayar sida ti kaya-kaya aja.
Enggau pengada kapal nya mega nama kompeni ti ngaga kapal tu chukup tebilang laban kompeni bukai bedau ulih telabanka pengelandik kompeni tu ba pengawa industri ngaga kapal.
 
Kena 10 April taun 1912, kapal Titanic keterubah iya belayar mupuk ari Southampton, England nuju New York, ngelayang tasik Atlantik mai lebih 2200 iku penumpang nyengkaum bala krew.
Rega tikit (mansang aja) maya nya iya nya – First Class (parlor suite) £870/$4,350 (Kira bisi US$69,600.00 duit diatu), First Class (berth) £30/$150 (US$2400 diatu), Second Class £12/$60 (US$960 diat), Third Class £3 to £8/$40 (US$172 ngagai US$640 diatu).
Dikena mandingka pengemar tambang nya, dalam taun 1912, orang ke gawa ba industri kapal nerima gaji £2 (US$10) seminggu.
 
Ke mayuh agi penumpang nya rayat menua Amerika ti pulai ari England. Ke mayuh agi mensia di menua Amerika enggau England jarang enda nemu pasal kapal tu laban iya diberi publisiti ti balat bendar.
Bala kaban belayan sida ti nepan kapal tu mega endang besemaya nganti pemulai orang ti dikesayau, di pengkalan kapal di New York.
 
Empat hari pengudah bekejang ari Southampton, England, iya nya kena malam pukul 11, 14 April 1912, kira-kira 400 batu ari tebing pantai Newfoundland, Kanada, dia enda mukai-mukai kapal tu lalu telantak ke gumpal tauka tuku ais ke bemunggu.
Dada kapal lalu bumbus ti ngujungka ai tama. Kurang ari tiga jam pengudah ke ngelantak munggu ais nya dia kapal Titanic nya lalu tengelam nabanka lebih 1520 iku nyawa mensia! Taja pen iya tengelam beseranyat tang mensia ke bela bepadat nyelamatka diri.
Nya ti nagsuh sida mayuh bebadi. Nambahka nya mega, perau kena napi penusah nya (lifeboat) enda chukup napi pemayuh penumpang. Kapal penyelamat datai ngesah nyau laun iya nya kira pukul 4 pagi tang sempat mega ngumpul sida ti agi idup empikil sebelah sebarang papung utai ke bisi sempat dijapai lalu nyelamatka sekeda sida ke betelepu teganggam ketegal penyelap.
 
Enggau penengelam kapal nya mega, sekali agi rayat menua Amerika enggau England richah baru, tang pengerichah nya ukai pengericah gaga ati, tang richah enggau sabak sedan bala mensia.
Ukai semina sida bisi kaban belayan ti tengelam aja ke tusah ati, tang mega sapa-sapa ti ngembuan penyinu ngenang, betatika mensia, mit besai, mutuska seput lemas enggau pengabis pemerinsa, bela anchur ati.
 
Ukai semina nyawa mensia ke berega aja ti lenyau maya tasah tu, tang mega nyengkaum bejuta-juta keresa bukai ti berega.
Ba penusah tasah ketegal pengaram kapal Titanic tu kelia, semina 700 lebih iku aja mensia ti ulih diselamatka iya nya nyengkaum anak mit. Kena 7 May 2006 (seminggu sebedau Pengerawang Ati tu dikarang), Lilian Getrud Asplund ke berumur 99 taun parai di rumah iya ba Shrewsburry, Massachusetts, Amerika.
Iya tu iya nya orang ti selamat ari pengaram kapal Titanic ti ditepan iya. Maya nya suba, Asplund berumur 5 taun lalu nepan Titanic enggau sida sebilik. Maya nya iya lenyau apai lalu lenyau 3 iku menyadi mega. Indai iya Selma enggau siku agi menyadi iya selamat tang indai iya parai dulu maya semak ulang taun pengaram Titanic dalam taun 1964.

Kelimpah ari Asplund, bisi mega nembiak bukai ti selamat tang meh sida bukai nya enda ingatka pengaram Titanic laban ti agi kelalu mit maya penusah nya nyadi.

  Enggau penengelam Titanic nya mega menua ke megai kuasa lalu ngaga konvensyen entarabansa, iya nya International Convention for safety Of Life At Sea di London kena bulan November taun 1913 iya nya konvensyen ti netapka undang-undang tasik pasal pengelikun maritime. (SOLAS Safety Of Life At Sea).
Nya alai sida ke teleba tasik tauka gawa ke tasik enda tau enda nemu pasal SOLAS laban nya siti ari penemu akal tauka undang-undang dikena nyelamatka diri enti bisi penusah nyadi di tasik.
 
Ari nya meh penatai nama Titanic. Ke mayuh agi kitai enda kala mansik enggau silik penatai nama Titanic. Beduduk ari nya mega, ukai semina siti aja filem ti udah kala digaga bepelasarka jalai jerita kapal Titanic tang mayuh agi nyengkaum Saved From The Titanic (1912), In Nacht und Eis (1912), Atlantic (1929), Titanic (1943), Titanic (1953), A Night o Remember (1958), S.O.S Titanic, TV Movie (1979), Raise The Titanic! (1980) & Titanic (1997 ti beheroin/hero ke Kate Winslet seduai Leonardo D’Caprio).
Ari kesemua filem nya, Titanic 1997 nya meh ti balat agi narit ati mensia lalu ulih ngumpul duit ti pemadu mayuh lalu udah mega nerima 11 iti Academy Awards.
 
Pengudah kapal Titanic nya tengelam, mayuh mega pansik udah dipejalaika tang tebal agi pansik nya nadai mai pemutus ke nyengala nyemetak nama kebuah kapal nya tau telantak ke gumpal ais lalu karam.
Sida irau laban kapal tu disikap enggau perengka ke changgih. Mayuh mega spekulasi sereta teori pemansik, mayuh penemu ti nyelai. Maya nya menya, kapal Titanic bedau ulih diselam laban tasik ba endur nya chukup dalam.
 
Dalam taun 1985, orang ke landik pasal tasik (Marine Biologist & Oceanographer) bisi bejalaika pansik ti silik ngena teknologi ti baru. Sida tetemuka bangkai Titanic 3800 meter dalam tasik din, 24 kilometer ari tempat iya dijangka karam.
Bangkai kapal nya putus dua, papung sepiak meleka ari sepiak, rarat penyauh bisi 600 meter. Pemansik madahka Titanic ukai putus maya iya karam suba, tang putus nyau betaun pengudah karam. Kenyau ari nya mega, mayuh kompeni bisi bejalaika pansik pasal titanic lalu mayuh tetemuka barang lama mega ke lalu nyadi reta kunsi menua Amerika enggau Britain.
Mayuh perengka bukai bisi ditemu nyengkaum barang ke dibai bala penumpang lalu pia mega barang ke endang dikena dalam kapal nya.
Nya meh jerita Titanic ke bendar. Kapal ti enda disangka-sangka, digaga enggau naka iya silik tang ulih mega tengelam, nabanka betibang keresa, beribu nyawa mensia, indu lelaki, mit besai.