Tusun Tunggu @ adat


di ambi ari mySarawak.. sharing is caring..

Tusun Tunggu endang dititih nyadi lalau sereta ‘tungkat’ kitai bansa ba rumah panjai nyentukka saritu

Rumah panjai kitai Iban tau dikumbai nyadi ka batang pendiau kena ngempung kitai Iban ari kelia ngagai kemaya haritu. Iya mega nyadi ka pengempung semua batang pengawa Iban.

Kelimpah ari tu, rumah panjai meh ke nyadi pun enggau panggau penempa adat asal Iban dalam pengawa bumai betupi sereta mega semua pampang pengarap asal Iban dikena bumai, pengidup ngemerankan ruang bilik, pengidup enggau pengawa bukai ba rumah panjai, adat enggau atur pasal pengerai enggau semua utai bukai mega.

“Nyadi ketegal tu setiap iku orang ke nguan siti rumah panjai nya mesti kena serangkung atur penyerakup, nadai ngira tuai biak. Kaul diri menyanak, diri sebilik endang siti ari utai ke beguna.

“Kebuah pia laban tiap iku mensia ba rumah nya enda tau enda bebasa ka pangan diri,” ku niang aya Tuai Rumah Bran Saka menya lebuh ke bekenang enggau penulis dalam taun 1997 menya maya ke begulu ba bilik kami di Kedap ba siti pengerami.

“Bran nyadi tuai dua ba dua buah rumah, iya nya Lubok Bundong enggau udah nya di Nanga Assam, sama dalam Malupa.

“Pia mega baka sida anembiak endang dilalau awak ka bebasa ka orang ke tuai agi, lebih agi apai indai, aki ini diri empu. Nya kebuah semua orang serumah menya endang mayuh agi bala diri sebilik. Sida kiruh amat ka pengidup pangan, senang tauka tusah. Enti senang, semua senang.

“Enti bisi penusah, semua sama besaup ngelempungka iya. Enti bisi bulih ngasu, bulih jelu, sigi d’emparu sama enggau diri serumah, lalu pia mega enti bulih ikan bulih undang enggau pemakai bukai endang selalu bebagi enggau diri serumah, nadai kala d’empa nengali,” ku iya.

Ka tambah nya, ku iya nambah, enti bisi buah baka engkeranji, sibau, kembayau, rian, pakan enggau buah bukai, bala orang ke bempu pun buah nya menya seruran sama bebai bala sida serumah bukai niki, lalu bebagi sama bela.

Ba pengidup rumah panjai dulu menya, lalu agi mega dikena sekeda orang rumah panjai sampai ka diatu, semua atur gawa, turun enggau bumai, endang sama bela besaup ngambika jampat tembu tauka teputar.

Orang menya gagit bendar deka beduruk enggau pangan diri laban rindu gawa bebala mayuh, sereta mega kena negutka agi tanggam tali kaul enggau diri serumah.

Nya kebuah orang rumah panjai balat ngemeranka pemanah kaul sereta basa enggau pangan diri. Ari tu sida udah selalu diberi petara ke nyaga sida pengelikun sereta mega pengelantang begulai enggau pangan diri.

Nya alai datai ka seharitu rumah panjai endang nyadi palan ke dikesayau semua kitai Iban, lebih agi iya ke endang agi angkun ka pendiau begulu baka ba rumah panjai ke mai mayuh penguntung ngagai semua.

Kitai mega ngasai, enti lebuh maya bisi pengerami, lebih agi Gawai Dayak ke d’intu ninting taun, bala kitai Iban ari nengeri sigi gagit deka begawai ba rumah panjai, laban dia meh alai ke andal sereta angkun ati berami. Mayuh agi pengerami Gawai kitai ba nengeri nadai banding enggau Gawai ba rumah panjai, laban intu rumah panjai numbas ngemeranka pangkat, renggat umur enggau pemisi, tang dikira sebaka magang.

Semua anembiak redak endang nemu sida mesti bebasa sereta sama besukung ka tuai rumah ke nyadi pun semua pengawa ba rumah. Taja pan ukai reti nya iya enda tau enda nemu semua adapt asal, beburung enggau utai bukai.

Tang selalu kitai tetemu ka tuai rumah endang sigi nemu adapt asal Iban.

Nyadi ba pengawa bukai baka beburung enggau utai bukai nya tau enda ibuh nemu laban tu endang bisi orang ke nemu burung enggau mimpi. Pia mega baka mela burung enggau mimpi nya tau dikereja orang bukai, enda ibuh tuai rumah.

Nyadi tuai rumah endang dikarap ka ulih megai, nyaga sereta nanggam adat ba rumah panjai. Iya mega dikarapka ngadu laya enggau penyarut ke bisi nyadi antara nembiak iya.

Ketegal tu tuai rumah enda tau enda sikar lalu nemu atur enggau adat. Iya endang orang ke ngatur laya, chara enggau utai bukai ngena jalai lurus. Nadai ulih baka ke bisi betiki pinang bisi betiki nibung.

Orang ke dichiri nyadi tuai rumah dulu menya endang orang ke nemu tusut sereta mega nemu pasal asal penatai enggau semua pengawa enggau atur bumai betupi.

Taja pia kemayatu, rebak ke dudi agi tuai rumah ke nemu tusut udah nadai tentu agi.

Taja pia, sida mayuh agi orang ke udah besekula, lalu bisi pemandai macha enggai nulis. Sekeda ari sida nya endang orang ke nemu pasal adat asal kitai Iban.

Lebuh ke ngatur leman tauka penyarut, laya sida serumah, tuai rumah enda tau enda nemu tusun tunggu nunda ka adat Iban.

Ba senentang tu iya tau ngulih ka atur penyampai ukum tauka tunggu ari bup.

Nitihka bup ke digaga niang Benedict Sandin Iban Adat & Augury, tuai rumah dalam menua Bagi Kedua ulih nunggu orang ke salah enggau penyampau ke enda sebaka enggau ukum tunggu baka ba opis pelilih menua enggau atur pengulu.

Ukum ari tuai rumah siti nadai tentu sebaka enggau tuai rumah ke bukai. Tang enti laya tauka penyarut nya dibai ngagai pengulu tauka opis pelilih menua sida ngena atur penyampau ukum baka ke sigi ditetapka dalam Tusun Tunggu

Enti penyalah nya besai baka salah nyadi tauka baka anak beleman enggau apai, tauka enggau indai, enggau diri menyadi, enggau aki tauka ini, pengawa nya tau ngudika menua.

Kudi tu reti nya menua dipangka kabut, nyitar, kilat tauka tasah laban bah besai.

Iya mega tau ngerusak utai tupi, ngampuhka rumah, ngerusak utai bukai sereta munuh mensia. Ba Kut Mejistret seduai ke ngudika menua nya tau dukum sepikul setengah siku.

Tu nitihka rekomen bala Pengulu. Dalam bagi menua bukai, baka ba Batang Rajang, Tuai Rumah enggau Pengulu ngukum tauka nunggu orang ke salah ngena Mungkul. Siti mungkul nya sama rega enggau seringgit.

Enti penyalah nya lempung agi, Tuai Rumah ngena jalai ukum tauka tunggu ke lempung tauka mit agi baka enggau penyampau telu manuk, paku lawang, mangkuk, chapak enggau pinggai.

Tunggu nya dikumbai se-uta iring manuk. Nyadi selalu dikena nimbang penyalah ke lempung sereta mega dibayar bala pengari baka bala pangan enggau kaban belayan orang ke empu penyalah.

Ba sekeda menua ulu, mayuh kitai Iban agi bisi meri ukum Sigi Jabir enggau penyampau duit 50 sen, iya nya setengah ari penyampau seringgit.

Nyadi iya dikumbai Jabir Iban. Nyadi seringgit nya dikumbai Jabir Perintah. Tang diatu utai tu jarang dikena.

Nyadi ukum nya pulai ngagai Tuai Rumah tauka dibagi bala Tuai Rumah ke ngatur.

Enti nyema ka penyalah orang nya udah ngasuh ari kudi, seduai dua iku tauka sebarang sapa ke ngudika menua enda tau enda munuh dua iku babi sepa tauka babi lelaki ke udah tumbuh taring. Nyadi darah babi dua iku nya lalu ambi ka genselan menua ke udah kudi.

Sida ke salah nya enda tau enda ngemansutka sebilah duku, kebuk enggau beliung. Kebuk nya empu Tuai Rumah. Duku enggau beliung nya empu orang ke nyemelih babi.

Nyadi dulu menya enti orang bisi tebunuh ka siku mensia bukai ketegal saru, orang ke munuh nya enda tau enda mansutka pati nyawa iya nya dua igi tajau lama.

Enti nadai tajau iya enda tau enda nyerahka ulun sida ngagai orang ke empu pemati kena nganti nyawa iya ke mati.

Bala peturun iya lalu enda tau enda nyadi ka ulun orang empu pemati enti sida enda ulih mayar tauka nyendia utai nya tadi. Sida iya tau lepas ari nyadi ulun enti orang ke empu pemati nya ngampun penyalah sida lalu ngelepas sida ari ukum nya.

Bakanya mega enti lebuh maya ngayau bala diri sebala bisi tebunuhka pangan diri ari tegal saru tauka kebuah bukai, iya mesti meri pati nyawa dua igi tajau lama ngagai orang ke empu pemati.

Enti enda, iya mesti nyerah ka diri nyadi ulun orang nya datai ka iya ulih meri pati nyawa munyi nya tadi.

Bala peturun iya pan sama nyadi ulun orang nya mega.

Lebuh maya bisi orang ditemu butang, Tuai Rumah enda tau enda munuh manuk ambika enselan tekala nya.

Utai tu enda tau enda diaduka enggau jampat. Kebuah pia, takut ka laki tauka bini seduai ke udah ditemu butang nya malas tauka ngemedis enggau jalai kasar seduai ke salah butang.

Enti utai bakanya bisi nyadi ari tegal Tuai Rumah laun munuh manuk sereta laun madah ngagai sida serumah bukai, Tuai Rumah nya empu tau kena ukum. Kelia mayuh orang bebalas ngena jalai kasar datai ka bepantap.

Bisi di rumah panjai Mendas di Saratok kurang lebih 30 taun ke udah tu orang siku kena jil ketegal iya mantap siku lelaki ke ditangkap butang enggau bini iya.

Lelaki ke dipantap iya nya lalu mati dia. Tang iya ke mantap enda kena ukum bunuh, tang kena jil lima taun aja.

Kebuah iya enda kena ukum bunuh laban seduai ke butang nya kena tangkap maya seduai iya beleman in flogrante delicto. Nyadi lelaki ke ngeleman bini iya nya kena pantap lalu mati ba endur seduai ke butang.

Advertisements

4 comments

  1. bisi ke bedau engkeman bendar senentang enggau tusun tunggu tu.. taja pia manah laban bisi ga informasyen e agi ulih dikena… terima kasih ngagai blog tu.

  2. hi!manah amai penemu ba blog nuan tu…ulih nuan nambah ke jaku pemali dalam bahasa iban baka ba dalam bahasa melayu…kadang-kadang disebut tabu/kata larangan…laban mayuh bala anembiak maya rebak baru enda nemu pekara ke besangkut paut enggau pemali…

  3. manah pangau peningat enggau tusun adat serta atur nuan labannya endang udah sedia ada. Mina kemaya aritu kitai iban patut ngiga jalai siti aja dalam atur adat tusun tunggu nemu ni bagi menua. Jangka aku orang ti dikumbai Iban tentu nemu lalu mereti jako iban. Arinya nadai kebuah kitai tau enda sama agi. Kelimpah arinya, badu enda meh munya krlia ari pemakai enggau pengawa (bumai taun/penerami/rabat) tetap begutung ruyung laban jalai pengidup sama. Kemaia aritu pengidup bisi berubah ketegal pengawa kitai ditancang ketegal pengarap,majikan enggau kaul kereja ti enda ulih mai bergulai.

    Siti jalai perintah mega nyerara ka kaul kitai iban ngambi kitai ngelengka ke rumah panjai lalu milih diau di taman perumah (ketegal infrustruktur cukup) tang kitai nadai kaul laban sistem idup di taman maioh agi mai diri lalu sumbong ke rumah panjai. Maioh diatu kitai bansa nadai menua agi lalu enda nemu kaban belayan kelimpah ari diri sebilik ke betul semak aja. Makin pandai kitai iban idup nunda bansa orang makin nadai penyerakup. Makin tinggi pemandai sekula makin enda nemu adat agi (baik ke basa/adat bansa). Makin kaya agi kitai iban, makin sumbong agi lalu enggai berkunsi penyuntuk lalu nyalah ke pemerinsa orang bukai enggau kedalih tinggal pemansang ari runding enggau pemebadr gawa. Kitai iban enda ulih megai pengawa tinggi tauka megai dunya (istilah aja) laban orang ke dikarap pandai, ngemeli ke orang ke enda pintar. Orang ke tuai dalam dagang tauka politik nemu ngidup ke mua diri. Orang ke pintar dalam tusun Lawyer nyau nyadi apai pengerakal. Orang ketuai-tuai nuduh nembiak redak enda nitih ke tuai, orang nembiak ngai nyukong orang ke tuai laban TUAI tau dikarap agi. Manah agi kitai iban idup ngati ke diri, adat tusun tunggu bisi undang-undang perintah. Politik kitai numpang aja, amat meh senang pengidup, gerai lalu lantang. Tanah nadai ga kitai, sungai nadai ga kitai enggau kampung dah nadai. Semua utainya enggi urang magang. Kasih aki Rentap munya encheremang ke jari lalu bejako munyi tu ” tu sungai, tanah enggau kampung endur peturun kitai idup”. Enti baka diatu enka munyi tu jako aki ” tu Insuran Nyawa, Permit Tanah, Geran Rumah enggau Permit ngambi asil ari sungai. Iaaaaaa sapa asoh kitai deh nyaut nya. Ni kuasa kitai?

  4. manah pangau peningat enggau tusun adat serta atur nuan labannya endang udah sedia ada. Mina kemaya aritu kitai iban patut ngiga jalai siti aja dalam atur adat tusun tunggu nemu ni bagi menua. Jangka aku orang ti dikumbai Iban tentu nemu lalu mereti jako iban. Arinya nadai kebuah kitai tau enda sama agi. Kelimpah arinya, badu enda meh munya krlia ari pemakai enggau pengawa (bumai taun/penerami/rabat) tetap begutung ruyung laban jalai pengidup sama. Kemaia aritu pengidup bisi berubah ketegal pengawa kitai ditancang ketegal pengarap,majikan enggau kaul kereja ti enda ulih mai bergulai.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s