Adat iban Gawai Antu


sumber rujukan: Panggau Pengidup Anak Iban

Gawai Antu ukai mina naka pemesai pengawa Iban, tang mega siti tanda pengelala bansa

PENGERAMI Gawai Antu tu naka pemesai pengawa kitai bansa Iban. Kebuah pia, laban Gawai Antu tu kena kitai masa enggau ngintu adat pemati ke dikumbai merantu belalu orang ke udah parai.
Di sekeda menua dalam Krian enggau Saribas, bisi ga iya dikumbai orang Gawai Nyungkup, bisi mega dikumbai Gawai Rugan.
Gawai tu ukai mina siti ari tanda pengelala bansa kitai Iban tang mega endang siti pengerami ti chukup ngandal sereta ngerinduka ati semua mensia, tuai enggau biak, sereta mega endang dikelandika bansa bukai di menua tu sereta mega ari menua tasik.
“Tang taja pia, anang ga kitai saru, laban bisi mega sekeda kandang menua kitai Iban ke nyemaka Gawai Antu tu enggau pengawa nirika sempar ti meruan enggau mendam agi ka bala kaban tauka sida diri sebilik ti udah midang,” ku Kadir Ganda, 74, sida ari Tanjung Sikup dalam Malupa, pati Krian lebuh ke berandau enggau penulis apin lama. Kadir tu siku lemambang kelembung timang jalung dulu suba ke mayuh udah alai nimang.

Taja pan bala kitai bansa udah tebal masuk Kristian, lalu udah muai pengarap ka antu enggau mayuh bansa petara aki ini kitai kelia, sekeda menua agi bisi ngintu gawai tu taja pan sida udah masuk Kristian.
Nyadi jalai intu, sida bisi ubah mimit, ari tegal mayuh orang ke tuai sereta sekeda raban ke diguna nembuka gawai nya udah nadai agi baka lemambang timang jalung.
Lalu pia mega bala orang ke tau ngirup jalung enggau ngirup buluh nyau nadai agi. Nya alai mayuh sekeda menua nembuka Gawai Antu enggau jalai lebih moden, lalu enda nunda ka ripih atur intu dulu menya.
Amat meh jalai pengintu iya udah bisi ubah tegal pengarap agama baru, tang Gawai Antu agi mengkang relevan nyentukka diatu.

Kebuah pia, tu udah nyadi siti adat asal Iban, lalu siti jalai basa ti besai diberi ngagai bala diri sebilik ti udah parai nyerumba lemai, udah mati nyerumba hari, udah midang nyerumba petang, udah danjan nyerumba malam, udah nadai lalu ninggalka kitai.
Kelimpah ari basa kitai ngagai bala diri sebilik ti udah ninggalka dunya injau kitai tu, Gawai Antu mega relevan laban iya udah nyadi siti kelaie kitai Iban, lalu siti tanda pengelala kitai bansa, laban nadai bansa bukai di dunya tu ti nyimpan, ngembuan sereta ngintu basa ngagai orang ti udah parai baka kitai Iban.

Iya nyelaie laban nya maya kitai ngangauka semengat orang ti udah midang nya pulai nikal ngagai menua asal iya, datai ari Sebayan.
Nya kebuah ngena lemambang timang jalung, laban nya ngeluluka pejalai semengat orang ti udah parai nikal pulai baru ngagai menua kitai idup tu.
Ba tubuh aku siku, mayuh ga Gawai Antu udah digagai ba mayuh bengkah alai endur, ba mayuh bengkah batang ai enggau menua.

Terubah enggau orang begawai antu iya nya ba rumah niang Pengulu Guyang di Kerangan ba tebing Batang Krian tengah, dalam taun 1961.
Udah nya enggau orang begawai nya di Kawit, ke bepati ka ulu agi ba Batang Krian, dalam taun 1962, iya nya rumah niang ipar aku Pengulu Kandau ak Saguh.

Dalam 1964 sida di Sungai Belong, dalam Malupa mega niri Gawai Antu, ditangkan ka sida Lubok Bundong, enda jauh ari nya dalam taun 1965 lalu dientudika sida aki aku Jembu ba Rumah Tamin, Munggu Embawang dalam taun 1966, iya nya rumah asal niang apai menya. Umur aku maya nya baru 12 taun, tang udah begulai enggau orang ke tuai agi baru ngangkatka diri bujang.
Udah nya lama ga takah baru bisi enggau orang Gawai Antu di Bajau, batang Krian, dalam taun 1971.

Tang gawai ba Bajau enda tentu ngerinduka ati laban enda mayuh pengabang, lalu sekeda bilik orang dia padam api, lalu bisi mega ruai sida petang laban enda chukup lampu gis.
Rumah kami empu di Kedap ngintu Gawai Antu dalam taun 1973 benung rega getah engka 48 sen sakati.
Tang mujur ga gawai didiri taja pan aku empu benung ngulit ka pemati Bruce Lee dalam bulan Julai, 1973.

Taun entudi nya, 1974 sida di Nanga Gayau dalam Rimbas, ke bepati ba Batang Saribas, niri Gawai Antu. Nyadi aku bisi mega enggau begawai dia laban bisi kaban digagai. Nyadi udah nya lama baru ga takah baru aku bisi enggau ngabang ngagai gawai ke sama. Kebuah pia, laban nyau ninggal ka menua kitai belajar ngejang agi ka bukai.

Nyadi Gawai Antu ke bisi kala digagai aku, iya nya ba Sungai Bakong, Btg. Rajang, Bintangor (1982); Ulu Bayor, Rimbas, Btg. Saribas Debak, (1988); Batu Matop, Julau, Kanowit (1989); Bebangai Kanan, Layar, Btg. Saribas, Betong (1993); Ensurai, Layar, Btg. Saribas, Betong (1993); Mendas, Malupa, Saratok (1999) enggau Tunggal, Rimbas, Btg. Saribas, Debak (2000).

Ari pemayuh gawai ke udah alai ngabang, jalai intu ba Batang Krian enggau Batang Saribas nadai jauh ari pangan diri, laban agi ngemerankan atur kelia. Ba menua Batang Rajang, menua ulu enggau ili, jalai intu bisi lain mimit. Nitih ka niang aya Benedict Sandin dalam bup iya Gawai Antu, penatai Iban nemu niri ka Gawai Antu nya, ari ajar Apai Puntang Raga ngagai Serapuh, lebuh Serapuh kena tinggang penusah besai. Penusah sida lebuh nya kelia bejarit parai, laban bangkai sida jeman nya nadai diintu, enda dibasa enggau enda disenggai, enda baka kemaya hari tu.

Nyadi Gawai Antu ke ditumbuhka Serapuh tu besai bendar reti ba ati bansa Iban. Enti orang ke mati enda diperantu, reti nya enda dikelai enggau sungkup di pendam, dikumbai kitai enda bebasa ka lubang apai-indai ke udah parai. Ari tu meh orang dulu menya enda tau enda niri Gawai Antu nyelinting tiap serak tubuh, enti enda ulih suah, bulung sekali dalam umur sida. Ambi ka banding, rumah kami di Kedap ngintu gawai sekali aja dalam lebih tiga puluh taun.

Lalu taun 1973, kira ka penudi iya diintu nyentuk ka saritu.

Nitih ka jerita ari Kedawa, sida ari Munggu Sibau, Kalimantan, lebuh iya ngiga manuk sabung, ke lalu tesat mejuh ngagai Sebayan, lalu tetemuka niang bini iya Banun diau ba rumah nyembuah kediri, orang ke parai enda tau enda diperantu, digagaka sungkup enggai ka sida enda ulih pindah ari langkau sida pulai begulai enggau orang mayuh ba rumah panjai di Sebayan din.

Nitih ka siti agi jerita, pasal asal Gawai Antu, iya nyerita siku lelaki penama Stor ke bebini ngambi Melaya. Nyau pengelama seduai udah begulai lalu udah beranak dua iku, Melaya, enda mukai sakit ngenyit lalu parai. Iya lalu ditumbak ka Stor be siti endur ke dikumbai iya Senuan.

Nyadi udah mati Melaya, laban anak iya ke biak agi nusu, iya seruran nyabak berari laban patah tauka putus ai tusu. Nyau kepuas anak mit nya ke nyabak, enti lemai nyabak, enti lemai nyabak, endur anak ke tuai bisi ninga indai seduai ngangau.

Ku iya, “O anak! Enti adi nuan nyabak, anjung ngagai aku, lak ka aku nusu ka iya ditu.”
Ninga kangau munyi nya, alai aka anak mit nya nganjung adi iya ngagai Senuan, awakka indai nusu ka iya. Nyadi hari siti udah indai nusu ka anak mit nya, iya lalu bejaku enggau anak iya ke tuai agi.

Ku iya, “Seduai adi nuan anang sekali-kali makai buah sebengkah ke kena pansa seduai pulai mansang kitu, enda jauh ari tisau Senuan tu.”

Nya alai hari siti dianjung aka iya baka selama ga adi iya mansang nusu ngagai indai seduai ka Senuan. Lebuh iya nganti adi iya ke nusu, iya bemain sebelah Senuan. Lebuh bemain, dia iya tepansa ka pun lemayung semadang, ke bebuah lebat. Ambi iya buah nya lalu diempa iya, laban perut iya nyau engkerau lapar. Sekeda buah nya bisi dibai iya pulai ka rumah. Udah adi iya tembu nusu, iya lalu mai iya pulai ka rumah baka selama. Datai di rumah, aka lalu meri adi iya makai buah lemayung nya tadi.

Nyadi pagi siti nyau lapar adi iya, aka iya mai tudah nurun ngagai Senuan baru. Datai seduai din, seduai nadai meda indai agi. Dikangau ka seduai nadai ga iya nyaut. “Kati alai indai nadai temu?,” ku anak tuai iya gut-gut bejaku kediri nyabak. Udah nya bisi iya ninga nyawa indai tang iya nadai meda tubuh iya baka selama. “Badu enda meh. Ni seduai agi ulih meda aku, seduai ga udah makai buah lemayung, ke enda diasuh aku empa,” ku saut indai. “Laban selupu buah lemayung nya, nya kebuah kita ke idup enda tau meda kami ke udah mati,” ku indai seduai.
Indai lalu ngasuh seduai pulai, “Tang tusui ngagai apai seduai, aku ditu nyau puas diau laban ujan, tegal iya lalu enda ngaga ka aku sungkup.”

“Ni gamal utai ke benama sungkup, deh indai?,” ku tanya anak iya ke tuai.

“Gamal iya berayuk-ayuk, betangkal enggau bepenyuang,” ku saut indai. “Udah sungkup nya tembu gaga iya, asuh unsut iya enggau kapu champur beting enggau buah jelagam, awakka iya bisi linsu,” ku tampung indai seduai.

“Udah tembu sungkup lalu anjung kitu, tanam atas lubang aku.
Tang apin iya nanam, sungkup nya enda tau enda digenselan enggau darah manuk,” ku iya.
Udah pulai anak iya ari Senuan, seduai lalu nusui pesan indai ngagai apai. Ninga nya Stor lalu ngiga kayu ambi kena ngaga sungkup. Udah tembu sungkup nya diukir enggau dilinsu iya, sungkup nya lalu dianjung iya ngagai Senuan nitih ka pinta bini iya Melaya.

Nitih ka asal, ukir ke patut dikena ba sungkup nya Balu Menyagu ke berasal ari Sengalang Burung. Ukir bansa nya kena orang ngukir perabung sungkup lalu iya enda tau di baruh laban pendiau Sengalang Burung tu tinggi di langit din. Ukir Balu Menyagu ke diajar Sengalang Burung tu lalu dikingatka Iban ninting serak tubuh datai ka ujung taun 1970an suba lebuh agi bisi orang ke nemu ngukir nya. Iya dikingat aku, ukai semua Gawai Antu ke endur ngabang bisi ngena ukir asal Balu Menyagu.

Semina di Sungai Belung ba Rumah Leman, ukir sungkup bisi ngena nya, iya nya ba bilik niang Ligong anak Rambuyan, lalu diukir niang apai tuai aku Ngauh anak Narang ke bensumbar ’Layang Mandi Pukul Lapan’. Ba Gawai Antu rumah sida aki aku Jembu di Munggu Embawang bisi ga sungkup ke manah ukir, tang mayuh gerinek lalu ukai Balu Menyagu asal. Ukir nya digaga bala sida ke landik ngukir ari Batang Rimbas.

Ku sekeda orang tuai ke nemu pasal ukir, mayuh ukir ke kena orang nya ngukir pemanjai sungkup ba Munggu Embawang nya ukir ke dikumbai sida Daun Rajang. Nitih jerita kelia, ukir Daun Rajang nya siti asal ukir bansa Iban ke diajar Bunsu Babi ngagai Selamuda anak Jelenggai.

Kebuah alai Bunsu Babi ngajar Selamuda ukir tu laban iya udah bebini Dayang Manis Muka anak pangkuan Bunsu Babi.Ukir nya mudah agi, lalu manah dipeda tang baruh agi penuduk ari Balu Menyagu.

Nyadi lebuh kami niri Gawai Antu di Kedap dalam taun 1973, niang apai tuai Ngauh agi ga idup maya gawai nya tang enda tentu pengerai. Nya alai ipar aku Pengulu Kandau setuju ngukir sungkup kami. Laban Kandau udah disumpah antu ngembuan pengelandik ke jauh nyulut ari enggi orang bukai, naka pemanah meh Balu Menyagu gaga iya. Enda nemu agi pemalat tambun puji bala pengabang ke meda.

Tudah pangan udah ga bisi ngembuan pengelandik ngukir lebuh nya tang enda berani enggau ika Pengulu ngaga laban umur aku maya nya apin manggai 20 taun lalu takut alah ayu. Mayuh bala nembiak kemaya haritu nyangka semina ninga orang nyebut Gawai Antu tang bedau ampit enggau ngabang. Nya alai ti bisi awak anang enda ngabang taja pan gawai abad 21 tu nyangka jauh lebih moden ari empat puluh taun ke udah.

Ngabang Gawai Antu meh pemadu ngerinduka ati laban maya ngabang nya meh bala kitai bansa ngena ngepan ti naka pemanah, sekalika iya ngepan asal bansa Iban tauka ngepan moden diatu, nyentukka bisi ngena baju luar ke maar rega baka Lanvin tauka Versache enggau Valentino. Maya orang ke nyadi Gawai Antu nya, tiga iti renggat pengawa ti balat ngerindu ati.

Tu nyengkaum nikika pengabang, ngalu petara enggau nuntungka jalung.