CERPEN PENGINGAT 1996


Tegenung lebuh aku tepedaka pancar terang bulan kembung ba malam ti chukup sunyi tu. Tak diasaika udah nenggau semua penusah dalam ati aku ngelama-lama tu. Baka ke nemu ga bulan malam tu aku tusah ati, nya alai pancar terang ia jauh endar nyelai ari malam ti ke udah-udah. Terang asai ti aku ngenang, lalu tekenangka penusah ti majak entudi jalai pengidup aku ngelama tu. 12taun udah ditanggam tang ke diatu tampak bendar nyau anchur nyau luluh. Tebuka nganti kemaia pen aku enda nemu. Kada makin ari makin lela sempama baka gula. Anang aja dan kayu enda nyumbuk, daun pen enda naruk tang batang ke majak repuk serepuk……

Meruan ku kenang pengingat dalam taun 1996 sampai sari tu. Nya meh keterubah iya aku bekelala enggau siko indu, Marinda nama iya. Mula betemu rambau pengerami ba Kampus kami. Bepun ari nya meh kaul kami duai rapat. Balat pemajik mua indu tu ku anak ati ku bejaku. Endang lama udah aku merati ke ulah iya enggau aku ngelama tu. Tang aku enda peduli laban nya engka sagam ati ku aja. Taja pen baka nya, runding aku tetap enda tekuing ke bukai kelimpah ari belajar. Aku enda sanggup ka ngelebu apai enggau indai ti udah bendar ngiga belanja kena aku nampung pelajar ku datai ditu. Nya meh penanggur alai aku enda nyanggup diri ka besulu nanggam pengerindu enggau Marinda. Ruang bilik kami di menua din pen bedau entu pemisi endar. Bala kami semadi pen mayuh ga lalu aku anak ti ke tuai ari 7 iko diri menyadi. Agi mayuh amat pengurang ia ba ruang bilik kami, bala menyadi agi bedau mekang ga besekula. Mina menyadi aku ke numbur dua ke enda sekula agi, Wat Mancha aja meh ke udah ngati kediri laban enggai nampung pelajar tegal pemutus peresa SPM iya enda tentu manah. Kapa pen enda nyurut kediri meh tudah madi ku nya ari nampung belajar. Baik ga iya, manah nasib lalu diterima orang bekerja ba siti palan opis perintah di menua Sibu. Enda ga begaji besai tang chukup meh kena melanja kami sebilik. Lempung mimit ga tanggungjawap apai enggau indai laban bisi orang enggau besaup ngiga belanja. Berasai lantang ga dada aku maia ninga rita Wat bulih kereja. Kepuas terunda-runda baka nya, dia bala bakih aku pen nemu ga cerita antara aku enggau Marinda. Nyentuk ke bala pensyarah pen nemu mega pasal kami duai begulai. Tang suah agi aku nyalam laban nangi ke Marinda bisi pangan. Taja pen pia ati aku seruran enda betah enti sari nadai betmu mua enggau iya.Tekenyit aku ti benung ngelamun lebuh ditepap ari belakang unggal David ti datai mai siti sampul suarat bewarna biru. Lalu disua ke ia ngagai aku.
“Bakih, tu surat nuan. Ari peminat nuan.”Pia ko unggal David, bakih saum bilik enggau aku. Enda ku berumban nyengkau surat laban runding aku mina ka ngaga keja aku ti betugung atas meja. Tak nadai ati ku ka nemu isi berita dalam surat nya. Kepuas-puas ku gegining, dia enda berasai jari aku tejinkau ke sampul surat bewarna biru nya.
Begau darah miya lebuh tebaca ke surat nya. Ngeremang bulu pegu laban tegepang meda pendatai surat nya. Enda panjai isi surat nya tang udah chukup ngasuh ati miya kesal. Kesal laban miya enda nemu nama agi utai ti patut di gaga. Nadai ribut nadai kudi, tiba-tiba aja iya tak madahka diri dah labuh pengerindu enggau entakit. Mayuh ga indu bukai tang nama ga kebuah iya deka milih miya ti orang merinsa tu? Lemai nya ari pen diadang manah amat. Nyangka udah bekau ujan dua tiga ari ti keudah-udah. Ari jauh udah dipeda mua Marinda ti lama dah nganti aku ba taman bungai nya. Kening iya majak ngeriut, nyangka bisi endar utai ti ngasuh iya enda nyamai duduk. Puas amat iya kalat-kalat baka ukui ti ka beranak.
“Lama nuan dah datai?” pia ko aku ngepun ke jaku sambil ku merati ke mua iya ti benung tusah. Tusah ati aku laban aku pen enda nemu nama utai ti aku padah ngagai iya. Marinda enda bemunyi, semina ngiling ke pala aja tanda bedau lama meh iya dah nganti aku.
“Nuan nemu nama kebuah aku mai nuan betemu baka ke lemai tu?”ko aku nanya Marinda baru. Majak panjai sintak seput aku laban iya. Makin kesal meh ati aku. Enda alah anak orang nyau gila laban aku. Takala nya dalam ati ku din berubah. Kasih amat ku meda iya. Berupai amai iya belala aus ke pengerindu ari aku. Ari gaya perening mata iya aja dah chukup ngasuh ati ku tekuing. Tang nama meh daya aku? Patut ke enda ku nerima iya? Patut ke enda ku meri iya seribu tanda Tanya? Ah! Nama meh nasib aku baka tu? Nama TUHAN nguji ati aku? Enda ke berasai salah enti aku enda nulak pengerindu iya. Menkang aku ba simpang dua iti tu, simpang ti nuju ke jalai pengidup aku. Simpang antara pengerindu enggau pelajar. Ni patut ku pilih antara tu?
Mata betentang mata,
Mua betemu mua.
Jaku nadai seleka,
Mina merati ke pangan diri aja.
“Rin, sebedau aku ngemanjaika jaku randau tua lemai tu. Ku rasa manah ku nyusun jari sepuluh ke tanda aku minta ampun tegal jaku aku bisi ngemediska ati nuan. Nadai niat ba ati aku ka ngaga nuan nya…
Pia mega ku arap nuan terima meh semua tu enggau ati ti tebuka.” ko aku nandu jaku ku baru.Kesuh angin lemai nya balat mega lalu mai semua pengirau ati aku. Kesuh baka ti meri aku samangat baru. Tang runding aku nadai ke bukai, ba Marinda aja. Makin lama makin balat degup jantung aku. Jari ku pen majak getar-getar bai penusah ati ku.
“Rin, I know that you are loving me but why you choice me to be your couple? Can you explain with me?” Majak ku ngansak iya bejaku tang iya tetap diau diri aja. Nya meh ti ngasuh runding aku majak tusut majak kusut. Nangi amat aku, enda alah anak orang tak gila lalu munuh diri laban aku. Enda ku nemu agi baka ni aku ka nerang ke ngagai ia. Ati sinu betambah sayau. Enda ku nyangka perening mata iya balat bendar narit ati aku. Ah! Nadai nya mayuh leman deh, ka pen enda tak pajak aja meh pengawa nya. Kasih amat ga aku meda mua iya, nyau sinu ati ku ngati ke Marinda ti ngarapka aku malas pengerindu iya. Enda berasai aku majak nganjak, jari iya ku pegai tubuh iya ku paut. Marinda enda engkebut, tak ngenat kediri aja. Nyau baka puyu mabuk ambuh. Nama agi deh, tubuh sama bepaut lalu mulut pen besatup. Jaku pen nadai meh gi seleka didinga. Mina kechup bunyi besium aja ke didinga. Tang kami duai nadai apa nama, enda telanjur ngaga pengawa. Seagi-agi bedau bisi ikatan ti ke sah, seagi-agi nya meh ku enda negu tubuh iya. Enda alah tak balang janji semaia ila. Ngemasau diri buya bepangan aja. Aku sayau ke Marinda ukai ketegal tubuh iya ang ketegal pengerindu aku enggau penyayau ati aku ke iya. Sebedau pulai Marinda sempat nelai aku, I LOVE U JAY, I LOVE U. Disium iya enggau chukup pengerindu, dibalas iya naka pengasih. Berupai amai pengaga ati iya pengudah nemu semua nya. Nganti aku malas pengerindu iya ti lama dah tepanggai. Tepanggai laban aku enda nerima iya. Berasai lantang ga ba dada, pengudah aku madah enggau iya. Endang nya meh utai ti diajih dianti iya ngelama tu ba aku. Amat munyi ku aku, pengerindu ati aku sigi dalam enda ulih disagam. Ati aku udah diberi aku ngagai Marinda siko aja. Aku nemu iya pen baka nya. Pengarap kami duai ke pangan diri sigi amat-amat, nadai ampa.
************************
Diatu nyau ka masuk setaun dah aku bepangan enggau Marinda. Tekenang maia nya suba kami duai suah bekirum surat, nya meh ngasuh kaul kami duai majak rapat. Jaku achuk jaku kutuk pen nyau enda dipeduli. Terunda-runda mai ati diri. Nama-nama penguji pen aku enda nangi. Biar nyawa ba ujung senapang, enda meh aku ngasuh janji tua iya balang. Ka iya bechukak mata pedang ilang, nadai ngasuh aku lari biar pen aku lesi midang. Janji semaia sumpah setia, sigi tetap diingat belama. Amat pen Marinda orang menyana tang iya endang amai-amai deka ke aku taja pen iya nemu aku anak orang merinsa. Pengidup antara kami duai telalu mayuh beza. Ukai baka aku mina idup seranta aja. Tang ku nangi, kada enda bala iya ke penanggur tua iya ka jadi ila. Penanggur iya ti ke satu, bala iya enggka enggai meda aku laban sida pilih kaban pilih bulu ke menantu jangka ku. Lalu penanggur iya ti ke dua, bala ia orang kaya. Sapa ga aku tu enti di banding enggau sida. Entah la, kemaia meh aku ulih nemu pengujung semua tu? Anang aja bepangan ngemuni diri, besulu mina ngasa ke ati.
************************
Enda berasai masa ngeyampat nya ga udah mupuk. Peresa semester pen enda jauh agi dah tu. Aku nyau kiruh agi laban mayuh pengawa ku apin tembu. Nya ti ngasuh aku sibuk amat maia tu. Seminggu dah ku enda betemu enggau Marinda. Dalam ati ukai agi main pengelelenggau tang nama meh daya. Lengka ke dulu meh ati ti rindu. Tak pelajar nya meh utai ti patut dipendulu. TAKKAN LARI GUNUNG DIKEJAR…… Taja pen ku sibuk, mina gambar Marinda meh nyadi ke penawar rindu ku ke iya.
Lemai siti nya unggal David datai nganjung siti surat ngagai aku. Unggal David tu sama bekelala enggau kami duai Marinda maia pengerami ba kampus suba. Diatu benung syok bekaban enggau Ophelia Jane Liew. Anak penakan iban menua Sri Aman, ti saum bilik enggau Marinda.
“Bakih, tu surat nuan beri buah ati peremban dalam nuan tadi, Marinda . Lapa nadai meda nuan maia kuliah tadi? Mayuh amat ga pengawa nuan.”ku iya lalu mulai kediri.
Enda sabar aku lalu muka surat nya……
Dear my hubby Jayson,
Lama nuan nadai ngusung aku kitu sulu. Lelenggau amat aku deka betemu enggau nuan. Anang-anang nuan udah bisi orang bukai. Ukai nya mimit indu ba kampus kitai dia. Anang nuan bulaka janji tua sulu taja pen nuan jauh ari aku. Anang ngelebu pengerindu ati aku laban aku ditu seruran nganti nuan.
Ari aku,
Marinda Laura Bansang.
Enda panjai isi surat nya tang udah chukup endur aku mantupka pengelelenggau ati aku ke iya. Bepuluh kali aku ngulang macha surat nya tang enda meh aku berasai leju. Udah nya aku lalu ngambi pen enggau kertas lalu nguji malas surat nya.
Dear my love Marinda,
Lelenggau aku sulu deka betemu enggau nuan. Nuan pen nemu diatu nyau ujung semester, tua pen sama bela sibuk nyediaka diri deka ngambi peresa.