Adat Iban Belaki Bebini


ADAT BELAKI BEBINI

  1. Ngayap sigi adat asal Iban. Enti orang bujang bejarit ngayap ngagai indu dara, apai indai indu nya bisi kuasa nagang laki nya ngayap. Enti orang bujang nya agi mekang ngayap, apai indai indu tau bedawa ngagai Tuai Rumah. Sebarang sapa enda ngasi ke jaku tangkan Tuai Rumah, kena tunggu Mungkul 50.
  2. Adat ngayap semina dipegai bansa Iban aja. Sebarang bansa bukai ngelanggar adat tu, kena tunggu Mungkul 100.
  3. Sebarang sapa apai indai indu, nyalam ka bansa bukai bisi udah ngelanggar adat tu, kena tunggu Mungkul 50.
  4. Enti apai indai tauka anembiak redak udah bedawa ke bansa bukai bisi udah ngelanggar adat tu ngagai Tuai Rumah, lalu Tuai Rumah enda beduli ke dawa nya, iya kena tunggu Mungkul 50. (Kuasa Chief’s Court)
  5. Sebarang sapa nganjung tauka ngulu ke bansa bukai ngelanggar adat tu, kena tunggu Mungkul 50.
  6. Sebarang sapa ngayap ngerusak pintu tauka kunchi, jenila sekalika dinding tauka utai bukai dalam biliknya, lebuh ngiga jalai ngayap, kena tunggu Mungkul 50. Nambah ke nya nganti semua pengerusak.
  7. Sebarang sapa naban ke indu ngena jalai bujuk tauka pejal, melakang ke aapai indai indu kena ukum sepikul lalu ngisi tunggu Mungkul 150.
  8. Indu dara majak tauka nama ke diri ngagai lelaki, kena ukum sepikul ngisi tunggu Mungkul 150.
  9. Sebarang sapa mungkir tunang lalu enggai jadi udah chukup timpuh, nadai enggau kebuah ke patut, enda tau enda mulai ke tinchin tauke keresa bukai ke udah diberi ke tanda tunang, sereta meri adat pemalu mungkul 50.
  10. Enti seduai ke betunang sama enggai agi ke pangan, nadai kena tinggang adat. Tinchin tauka keresa tanda tunang tau disimpan sekalika dipulai ke ngagai pangan diri.
  11. Sebarang sapa ninding laki tauka bini iya nadai penerang, dikumbai Ninding Ngapa, lalu kena tunggu Mungkul 50.
  12. orang bujang naban ke indu dara ngelaban tagang apai indai, kena ukum sepikul enggau tunggu Mungkul 50.
  13. Jadi enggau isan mali, tang tau begulai melaki bini enti ngisi adat Pelasi Menua Mungkul 16 siku-siku, babi siku enggau kering semengat.
  14. Jadi melaki bini nitih ke adat Iban enda tau enda beterang ba orang mayuh ba pengerami dikumbai Melah Pinang tauka bebiau ba mua Tuai Rumah. Pengulu tau ngeluar ke surat tikah ngagai seduai ke baru jadi melaki bini.
  15. kelimpah ari jadi melaki bini nitih ke atur ba genteran 148, lelaki enggau indu tau mega udah dikumbai jadi melaki bini enti seduai udah begulai tinduk enam (6) malam beturut, amat ga beterang ba Tuai Rumah lalu bebiau. Enti nadai beterang ba Tuai Rumah udah lepas enam malam, apai indai kena tunggu Mungkul 50. (Tunggu pulai ke pemali rumah)
  16. Sebarang sapa indu Iban jadi enggau bansa bukai enda nitih ke Adat Iban, nadai kuasa agi enggau bempu tanah, buah tauka perengka bukai ke di empu rumah panjai nya begulai, kelimpah ari buah, kebun enggau tanah ti bepala tauka enda bepala ti endang enggi apai indai iya empu.