ensera iban | Muba enggau Kupa


MUBA ENGGAU KUPA

Dikarang ulih : Pilang @ Skiner anak Jubin

Sekolah Kebangsaan Sbangki,

95900 Lubok Antu.

***************************************************************************
Cherita tu nyadi di menua Batang Mandai, Kapuas, Indonesia. Cherita tu ngenang siku orang bujang ke benama Muba enggau siku indu dara ke benama Kupa. Muba seduai Kupa lama amat udah beguang. Seduai beamat-amat deka jadi melaki bini tang seruran puntan ketegal ti ditagang apai indai laban seduai sama anak tunggal. Siku enda disagi ngugi lalu siku pan enda diasuh nguai. Nya ke ngasuh Muba seduai Kupa chukup tusah ati. Sedua enda nemu jalai ke ulih ngasuh begulai sejalai.
Nitih ke cherita, Muba tu chukup sigat sereta kering. Nadai pungka laki ngelingi menua nya ngenyigat sereta ngering iya. Baka nya mega Kupa. Pemajik mua, pemanah raras tubuh enggau budi basa iya nyadi buah kenang semua orang ke berimbai pendiau ba menua nya. Baka sema jaku tuai, Muba enggau Kupa tu patut jadi melaki bini “baka pinang ke dibelah dua”. Tang nasit seduai ke deka begulai enda ngemudah nya nitih ke cherita tu.
Bulan beganti bulan, taun beganti taun, Muba seduai Kupa ngetatka ati diri ke deka segulai tang nadai mega nemu jalai. Muba nyau suntuk penemu.Tumu pagi siti, maya indu belabuh deka nutuk, dia Muba lalu ngantung lunga baut di atas tempat iya ke deka melandai. Mata lunga baut nya nuju dada iya ke deka gali melandai. Udah nya Muba lalu berengkah melandai. Dalam leka pelandai iya, dia Muba ngading sebana diri laban ke enda ulih jadi enggau Kupa. Iya ngangauka Menti, Indu Antu, ngasuh Menti ngetas benang ke dikena nanchang lunga baut ke digitang nuju dada iya ke benung gali seraya ke melandai. Nyau kepuas iya melandai, ading iya ke ngangauka Menti pan datai , dia tali benang ti besempulang enggau lunga baut tadi lalu putus, labuh lalu nancham dada Muba. Sida serumah pan lalu begau. Bala indu ke nutuk pan lalu ngetu. Muba enda tepadahka nyawa diri, lalu mati. Mati meh tudah Muba nengali hari, parai nengali lemai.

Nyadi Kupa nadai enggau orang ngintu bangkai Muba. Iya kiruh besimpan. Semua gari baju enggau kain disimpan iya dalam seluk menarang. Datai ba maya orang ke nganjung bangkai, Kupa lalu nurun ari tuju bilik nuju pendam ngiga bangkai Muba. Lebuh tetemuka bangkai Muba , dia Kupa lalu ngerebahka diri enggau sabak-sabak. Kupa nyabak enggau pemuas ati diri laban sulu ati ti dikesayauka iya udah mati, nadai dipeda iya agi.Nyau kepuas Kupa ke nyabak dia iya tepedaka lubang tebuka ari kubur Muba. Kupa enda kakang ati lalu terus tama lubang nya. Lebuh dalam lubang, dia Kupa tepedaka jalai besai. Iya lalu bejalai sambil malik kiba, malik kanan. Iya enda takut. Iya ngiga orang endur betanyaka jalai ngagai rumah Muba. Nyau puas ke bejalai sambil gining-gining, dia iya tepedaka bala anak ampang benung bemain ba tengah laman. Bala anak ampang ngasuh iya ngetu lalu ngambu iya ke indai. Kupa lalu meri sida keindu kain lalu ke lelaki diberi iya baju. Kupa lalu mupuk bejalai baru.

Nyau kepuas Kupa bejalai, iya lalu rembus ba tumpuk pendiau siti. Peratika iya rumah, peda iya rumah nya tak nyembuah kediri-kediri. Iya nadai meda orang. Menua nya chukup sunyi. Sambil iya bejalai iya meratika menua nya dia. Kupa tepedaka rumah siti ke baru amat. Iya terus nuju rumah ke baru nya lalu tepedaka Muba garing-garing gali dalam bilik. Muba tekenyit meda penatai Kupa lalu ngereduas angkat. Seduai lalu begauk beberap-berap.Sama nyabak. Nyau tepantup ati ke lelengauka pangan diri, nya baru seduai duduk.
“Nama kebuah dek nitihka aku? Aku tu orang parai”, ku Muba ngepunka randau seduai.        “Aku enda betah dek.”,ku saut Kupa enggau ai mata. Udah nya seduai pan beberap baru laban kelalu sinu sereta sayauka pangan diri. Lama seduai enda bejaku.
“Tua enda ulih begulai. Aku tu orang parai. Nuan pulai baru ke menua. Semua barang aku tu bai magang”, ku Muba ngepunka jaku iya baru.
Barang ke diasuh Muba bai Kupa nya baya iya baka tawak, tajau enggau baya bukai. Kupa nemu iya enda tebaika semua baya ke diasuh Muba.
“Enda aku ulih mai semua utai tu. Dek nganjung aku”, ku Kupa madahka Muba.
Seduai lalu mupuk bejalai. Lebuh seduai ke bejalai, dia Kupa meda Muba mansang mit-semit. Meda baka nya Kupa lalu nangkap Muba. Muba lalu disimpan iya dalam bungkan sarang ruding. Iya lalu terus bejalai lalu rembus ba temuda sida Kupa empu, umai ke baru udah dilekaka sida taun nya.
Lebuh Kupa datai semak pendai sida lemai nya, dia iya lalu ngelalaika baya Muba ke dibai iya. Bala nembiak ke meda iya beraraka iya. Kupa enda ngetu mandi laban ke ngulit. Iya terus niki ari tuju bilik sida, nelusur jalai iya ke nurun suba. Lebuh tama ke bilik dia iya meda indai iya benung nyabak dui-dui ba panggau peninduk iya. Kupa lalu beguai-guai mansang merap indai iya. Meda Kupa udah datai seduai lalu beberap sereta nyabak. Laban sabak seduai inggar bendar, dia indai Muba ke diau takah sepintu bilik ari sida Kupa, lalu beguai-guai ngesah ngagai bilik sida Kupa. Datai din dia meda Kupa enggau indai iya benung nyabak merap pangan diri. Indai Muba pan sama nyabak merap Kupa laban Kupa ke dikumbai sida parai udah datai. Udah badu sida tiga ke nyabak, Indai Kupa enggau Indai Muba lalu nanyaka pengelenyau iya sekumbang tiga hari ke udah. Kupa nusi diri nitihka Muba ke Sebayan.
“Enti orang ngumbai aku bula, baya Muba baka tawak,tajau sereta enggau semengat Muba bisi meh dibai aku magang. Muba ngasuh aku mai baya iya pulai. Tang agi tinggal ba seberai pendai kitai”, ku Kupa madah ngagai Indai iya enggau Indai Muba.
“Enti kitai deka nguji ngapa numbak bangkai Muba kitai tiga madahka kitai serumah”, ku Kupa nampung jaku iya baru.
Indai Muba setuju deka numbak bangkai Muba. Iya mega setuju deka ngambi tujuh iku manang.
Lemai nya Indai Muba lalu beranchau tikai laban deka ngempuruka sida serumah. Lebuh orang udah sampal datai, dia Indai Muba lalu bejaku madahka kebuah iya ke nguluka sida serumah. Iya lalu nusui cherita Kupa ke lenyau ke Sebayan ngiga Muba enggau baya Muba ke dibai Kupa pulai.
“Tang baya agi tinggal di seberai pendai kitai. Legi kitai nuduhka bala, sapa bagi ke diasuh ngambi baya nya pagila”, pia ku Indai Muba.
“Tang tuju aku ke bendar nguluka kitai mayuh laban aku mai kitai numbak bangkai anak aku Muba .Senentang adat ke diguna dikena ngereja pengawa tu aku enda ningkah. Aku nitihka penemu mensia mayuh”, pia ku Indai Muba nerang ngagai mensia mayuh.
Lama sida serumah berandau malam nya. Sapa ke bisi penemu endang diasuh mansutka penemu magang. Kebuah pia laban pengawa ke deka dikereja sida baka ke deka numbak baru bangkai orang ke udah mati bedau kala dikereja sida tauka orang bukai. Ninga orang ngereja pengawa nya pan enda kala. Nya alai pedis amat sida bejakuka adat laban nadai chuan tauka teladan ari orang bukai. Enggai enda pan nengkebang adat kediri ga sida sebuat lebuh ke mutuska bagi adat ke diguna dikena numbak bangkai Muba.
Ba pemutus randau, dia Indai Muba serumah setuju deka ngena adat piring tujuh, jani enggau manuk tujuh iku sereta begunaka tujuh iku manang. Manang diguna kena belianka bangkai Muba enti iya udah ditumbak ila. Sida pan belaturka sapa bagi ke ngambi baya Muba, ngambi kereban dikena manang belian, kayu api enggau begigaka lauk laban apai Muba empu enda pengerai. Udah randau sida nyentuk malam nya sida Indai Muba serumah mulaika diri ngagai bilik diri.
Pagi nya sida ke udah dipaduka ngereja pengawa pan nurun magang-magang. Sida ke diasuh ngambi baya Muba nurun diuluka Kupa enggai ke sida enda nemu napatka alai baya ke dilalaika iya ba seberai pendai. Ngalih hari nya, sida ke ngambi manang pan udah sampal mega datai. Manang ke diambi sida bisi enggau sida magang. Bala sida indu pan lalu nengkira begagaka tumpi, rendai sereta bepansuhka pulut dikena bedara numbak bangkai Muba. Sida nangkap babi tujuh iku, lalu manuk mega tujuh iku. Udah bedara enggau bebunuhka tujuh iku babi enggau manuk nya baru sida berengkah numbak kubur bangkai Muba. Udah nya sentubung Muba pan lalu dibuka. Dipeda sida bangkai Muba sigi agi meruan manah, nadai bot. Pendiau iya baka ke tinduk. Bangkai iya lalu dibai sida pulai ke rumah. Di rumah bangkai Muba lalu diengkah ba ruai nganti manang ke belian. Pua kumbu digantung dikena ngerayung bangkai Muba. Tuju ngerayung bangkai laban enggai ke diperaka uduk.
Udah makai lemai, pengawa bemanang pan deka berengkah. Sida ngepunka pengawa enggau piring tujuh. Udah nya baru tujuh iku manang lalu berengkah bekelingi. Terubah manang bekelingi, bala manang nadai meda semengat Muba. Kupa lalu ngasuh manang bekelingi kedua kali. Lebuh manang bekelingi kedua kali dia Kupa lalu mantaika bungkan sarang ruding. Iya lalu muka bungkan sarang ruding endur iya nyimpan Muba. Manang lalu tepedaka semengat Muba, lalu nangkap iya. Udah nya, manang nya tadi lalu namaka semengat ba pala Muba. Kaki Muba lalu kekasak. Telih ba dada Muba pan suman kena leka pelian manang. Muba pan lalu ensugau angkat. Sambil iya ngusuk mata iya lalu bejaku.
“Sapa orang ke ngerak aku ke tinduk jenak. Sapa orang ke ngerau aku tinduk ngandau?”.
Kupa ke duduk semak bangkai Muba, angkat lalu merap Muba. Sambil iya merap Muba enggau sabak-sabak iya sempat nelai Muba.
“Eh, nadai dek tinduk wai ambai. Mati dek tadi sulu kunsi. Parai dek tadi wai. Peda dek pemayuh orang ditu ngidupka dek”.
Muba pan malik kiba, malik kanan. Udah nya iya nensamka mua diri lalu mejamka mata. Mua iya lalu ditutup enggau jari dua piak. Udah nya dilepaska iya jari, buka iya mata. Lama Muba enda bejaku.
“Udah parai aku pia”, ku Muba baka ke enda pechaya.
“Au, udah parai meh dek. Tang diatu udah idup baru”, ku Kupa nelai iya.
Meda Muba udah idup baru, apai enggau indai Muba sama-sama angkat merap Muba. Sida merap Muba enggau sabak-sabak laban kelalu gaga. Rumah nyau richah. Bisi ke nyabak gaga, bisi mega ke manjung..Pengawa sida ke ngulit nyau betukar nyadi rami. Semua orang ke bisi dia beserekap ngasuh Muba seduai Kupa jadi. Apai indai Muba enggau apai indai Kupa pan setuju. Sida nadai mantah agi. Sida chukup gaga meda Kupa udah ulih nyaup ngidupka Muba ari mati pulai idup baru. Muba seduai Kupa lalu disabung jadi malam nya. Bilik sida dirakup. Seduai sama ngibun apai enggau indai seduai. Seduai jadi melaki bini lalu bulih anak, bulih telesak sampai ka tuai.