Leka jaku iban universal | Iban makin maju


Amat sebut enda sebaka di sekayu dunya tang orang ngena iya mereti jaku pangan

Di Ambi ari mysarawak.com
Jaku Iban tau dikumbai universal laban sebaka ba semua menua.

Enda ngira iya di Sarawak, di Sabah, di Brunei, di Semenanjung tauka di Kalimantan, Indonesia jaku Iban enda sebaka, lalu mina bisi bida ari jalai sebut enggau sekeda nama jelu, kayu, buah enggau sekeda nama utai bukai.
Reti nya dalam jaku ribai, jaku kitai Iban tu ‘universal’ laban semua orang ke bejaku tauka bekomunikasi enggau jaku Iban endang sama mereti utai ti dikejakuka pangan diri nya.
Iban ari Temburong, Brunei mereti nama utai ku Iban ari Layar di Betong tauka nama utai ke dipadah Iban ari Anap di Bintulu. Reti nya enda ngira ari dini asal penatai semua kitai Iban endang mereti utai ku pangan.
“Bida jaku kitai nya mina dalam bunyi sebut iya, laban nya nitihka penatai kitai, ari ai siti-siti tang kitai nadai mayuh bida dalam jaku enggau nama kena kitai nganu utai siti-siti.
“Ambika banding, kami di Saratok enggau Betong ngena jaku ‘nuan’ tang bala di Sibu enggau ai Batang Rajang enggau sekeda menua bukai ngena jaku ‘dek’ lalu bala di Kuching enggau sida ari Lundu bisi nya jaku ‘kua’,” pia ku siku bekau pemesai ba opis betanam betupi ke mega kala nyadi Chermin Pepper Marketing Board Datu Henry Jantum Bakit lebuh berandau enggau Berita Iban apin lama.
Jantum ke berasal ari Nanga Luau, Saratok diatu diau mendam di Kuching.
Endang amat munyi ku Jantum nya, bala Iban ari Temburong tauka di Tutong enggau Belait di Brunei ke mayuh berasal ari menua Layar enggau Krian di Sarawak endang nadai bida jaku baka kitai di menua tu.

Berita Iban ngelamatu bisi dikempelin orang laban jalai sebut bisi kasar mimit.
Pengarang enda mereti ba senentang ni jaku nya bisi kasar.
Ba jalai nyepil tauka ba jalai bukai? Ambika penemu pemacha mayuh Berita Iban kenyau ari pun endang ngena sistem sepil ti stindit ke mega lalu ditunda ulih sida ba Opis Pelajar lebuh berengkah ngena Sistem Jaku Iban ba kurikulum sida dalam kelas berengkah ari taun 2007 suba.
Ka tambah nya, sepil dikena Berita Iban mega nitihka sanding penemu bala sida ari Jugah Foundation.
Pelaba pengarang reti jaku kasar nitihha kempelin – pengarang nadai ninga kempelin nya ari pending pengarang empu tang mina ninga padah ari bala sama gawa ke bukai – engka laban pemacha ke ngempelin nya ari ai bukai kelimpah ari Krian tauka Saribas.
Kebuah pia, sebut ari menua Krian enggau ai Saribas enda sebaka enggau sida ari Batang Rajang, Kemena tauka Batang Baram.
Ambika banding, nitih sepil dulu suba, ‘jaku’ disepil ngena ‘jako’ lalu pia mega ‘tulung’ disepil ngena ‘tulong’ laban nya nitihka sebut orang terubah mungkal sepil nya kelia baka sida niang Gerunsin Lembat (Tan Sri Datuk), niang Michael Buma (Datuk) tauka niang Benedict Sandin enggau bala sida bukai.

Sistem sepil kelia engka ari setuju semua sida, tang nadai tentu sistem ke nyemetak.
Enti kitai macha dalam mayuh bup cherita Iban ke bisi baka ke ditulis ari mayuh penulis nyengkaum Benedict Sandin, Alli Majang, Edward Kechendai, George Garai, Thomas Bangit, Lawrence Senoun Ijau, Henry Gerijih, George Jimbai, Andrea Ijau, Joshua Jali, Jimbun Tawai, Janang Ensiring, Jimmy Donald sereta enggau mayuh penulis bukai, dia kitai meda sistem sepil kena sida pan nadai sebaka tang jaku Iban kena sida nadai bida ari pangan diri.
Mina ke bisi nyelaie mimit nya enggi Jimmy Donald laban nya jaku Iban Balau ke endang batang jaku bala kitai Iban di menua Sri Aman ke mega semak bendar enggau jaku Iban bala sida Dayak Kantu ari menua Kalimantan.

Ngerichau mimit ngenang jaku sida Kantu ari Kalimantan, sida enda ngena ‘selamat datai’, laban kebendar iya jaku ‘selamat’ tu asal jaku Melayu. Sida ngena jaku ‘gaga amat temuai datai’ ba pintu kuta tama ngagai rumah panjai sida.
Bala sida Kantu mega agi ngena jaku ‘begerangi’ ke jarang dikena laban kitai diatu ngena jaku ‘begagai’ tauka ‘bebuti’ enggau pangan.
Jaku ‘berami’ kitai ditukar sida ngagai ‘beramai’ lalu jaku ‘ukai’ sida kena jaku ‘bukai’ ti deka sama semunyi enggau ‘bukan’ dalam jaku Melayu ti sama reti mega.
Nya alai enti kitai bejaku enggau sida Iban, sida Kantu, sida Maloh ari menua Kalimantan kitai nadai penanggul bekomunikasi enggau sida laban kitai endang sama ngena jaku Iban, lalu sama mereti utai ku pangan taja pan jalai sebut kitai enda semunyi, enda sebaka.
Ketuai pengarang Berita Iban angkun bendar ati laban bisi awak ngerembaika pengena jaku Iban belalauka jaku Iban stindit ti dipelajar di sekula kenyau ari taun 2007 suba.
Diatu bala kitai Iban patut temegah ati laban Jaku Iban udah diajar ba 48 buah sekula sekonderi serata menua Sarawak ngagai nembiak ke belajar ba Pom Empat enggau Pom Lima berengkah ari taun nya.
Kena 1 Disember, 2006 suba Sapit Kepala Menteri Datuk Patinggi Tan Sri Alfred Jabu ak Numpang udah diberi basa bejadika atur pengawa nyain sempekat pemetul enggau pengena jaku ‘Deklarasi Sistem Jaku Iban Di Sekula ba hotel Crowne Plaza Riverside di Kuching ditu.
Dulu ari tu, ku Jabu, pelajar Jaku Iban sigi udah diajar ba sekula sekonderi, tang mina naka tikas Pom Tiga aja.

Bisi lebih sepuluh taun ti udah tu, pelajar nya diajar ba sekeda sekula sekonderi menua tu.
Taja pia, ukai semua sekula bisi ngajar nya.
Ku Jabu, ke nyadi Menteri Pemansang Infrastruktur enggau Penyambung sereta mega nyadi Menteri Pemansang Pesisir mata pelajar Jaku Iban tu ukai enda tau enda dambi, ukai kompulsri.
“Dalam 48 buah sekula nya, bisi 144 iku pengajar enggau 1,440 iku nembiak deka ngambi pelajar Jaku Iban tu,” ku Jabu lebuh bejaku maya nya.
Jabu madah, semua atur baru tetap deka bisi penanggul, tang bala kaban komiti kereja nya deka seruran betatika sistem lalu nginsit pemanah iya mimit-mimit sampaika iya nyadi chukup ngena sereta manah.
Siku ari kaban Komiti Pengatur pengajar Christie Duin Tanggi, siku pengajar bisi degree ke diatu ngajar ba SMK Jalan Arang, ditu madah, sida lama bendar udah selalu bekelikuh pasal pengena jaku nya.

Kebuah pia laban mayuh sistem nyepil jaku Iban nitihka sebut ari menua siti-siti.
Ku iya, diatu udah bisi 20 iku pengajar ke udah bempu diploma dalam pelajar jaku nya, lalu sida tu meh ti udah dipilih asuh mungkal ngajar mata pelajar nya.
“Sekeda pengajar ti udah bisi latih ngajar jaku (nyengkaum pelajar jaku bansa bukai), ulih mega diasuh ngajar Jaku Iban, laban sida udah bisi pengelandik ngajar siti-siti jaku,” ku iya.
Christie Duin empu siku ari pengajar ke udah nulis bup Iban pasal jaku sempama.
Manah bendar ga pelajar Jaku Iban nya laban beduduk ari nya bala nembiak ke ngambi nya, baik sida di Julau, di Saratok, di Limbang tauka di Kuching, sida tetap deka ngena sistem sepil ti sama lalu berengkah ari nya deka ngasuh sebut sida nadai jauh bida ari pangan.
Taja pia, siti utai ti ngasuh Berita Iban tekenyit nya pasal sekeda bala kitai Iban ba nengeri ke malu bejaku ngena jaku Iban laban enggaika ditemu orang bansa Iban.
Tu meh pekara ti balat ngasuh tekenyit, laban enda nemu kebuah malu ngumbai diri bansa Iban.
Nadai kebuah malu. Kitai Iban patut temegah ati enggau jaku kitai empu laban jaku meh ti nyadi tanda pengalala bansa Iban.

Jarang bansa di dunya ngembuan pengaya jaku bebanding enggau enggi kitai Iban.
Keba Professor Clifford Sather, bekau chair of Asian Studies ba Unimas, Kuching ditu kala madah kitai Iban ‘Master of Language’, reti nya chukup kaya sereta landik dalam jaku.
Kelimpah ari Sather, Professor Derek Freeman, siku anthropologist tebilang ari Australia – iya menya ngajar ba Australian National University (ANU) lalu nyadi mentor ka James Jemut Masing (diatu Dato Sri Dr James Jemut Masing) – ke mayuh nulis bup pasal raban bansa Iban, mega keran bendar madah kitai Iban siti bansa ti chukup kaya sereta landik dalam jaku enggau penemu asal.
Nitih ripot ari pemberita Utusan Borneo Edwin Raoh di Lubok Antu apin lama, Kaban Kunsil Nengeri sitak Bukit Begunan Mong Dagang munyi ke berupai enda lantang ati ninga sekeda bala kitai Iban enggai bejaku ngena jaku Iban lebuh betemu enggau diri sama diri di pasar tauka di nengeri.
Kebuah enggai, laban irauka orang mayuh ngelala sida nya bansa Iban.
Serimbai enggau nya, Mong nangi bendar, enti ulah nya (malu bejaku ngena jaku Iban enggau pangan diri ba nengeri) terus nyadi kemeran bala sekeda sida tu, nembiak rebak baru deka kelama-lama lenyau pengelala diri, nadai agi identiti bansa Iban laban enda nemu bejaku ngena jaku nya agi.
“Enti kitai Iban empu malu bejaku ngena jaku Iban enggau diri sama diri enda ngira di nengeri tauka sebarang alai endur, belabuh punas meh jaku kitai Iban ari diatu.
“Enti jaku punas, bansa pan punas ga.
“Nama penyadi kitai?” pia ku Mong sereta madah raban bansa Iban meh ke pengabis mayuh nguan menua Sarawak diatu bebanding enggau bansa bukai.

Nya alai, ku Mong nampung jaku iya, enti kitai enggi ngemeranka jaku kitai empu, bakani ku kitai ulih terus ngemeranka adat enggau main asal kitai Iban baka besanggai, beramban, bepantun, berenung, mengap enggau main benyawa ke bukai.

Taja pia, ku iya nadai salah bansa kitai bejaku ngena jaku bukai maya ke betemu enggau pangan diri tang enda tau enda ingatka jaku enggau identiti diri empu, ku Mong nambah nitih ripot ari Edwin nya.
Berita Iban ngarapka bala nembiak rebak baru diatu anang enda beratka jaku pesan ari Mong nya, lalu ngicha bala kitai ke bukai sama bela anang malu ka jaku diri empu, laban nya meh batang pengelala bansa. Enda ku jaku orang tuai, punas jaku, punas meh bansa.