Pengidup iban dulu kelia | Chara bepadah maya tusah


Terantang tawak kena minta sah bala beguai maya tusah, temuku tali kena mai nurun ngayau

Sebedau ngena jalai tulis tauka panggil ngena surat, tuai kitai Iban baka Pengulu enggau Tuai Rumah dulu menya endang ngena jalai asal kitai bansa kena manggil tauka ngangauka mensia mayuh, tauka manggil sekeda mensia datai ngulu pechara sereta mega pengawa bukai tauka maya minta bantu beguai ari bala mayuh lebuh bisi penusah.

Sekalika iya maya penusah bisi angus rumah, bisi orang mati bebadi, kena pangka kilat, kena tambun tanah tusur, taban tanah runtuh, ampuh bah tauka kena serang kayau anak tauka minta sah laban kena alah ulih munsuh enggau mayuh bengkah penusah bukai, orang tuai kelia endang ngangau tauka manggil ngena chara tauka jalai kitai empu. Jalai nya nyelaie tang ngasi ba raban bansa kitai bansa Iban empu, laban nya meh chara enggau jalai ti endang dititih sereta dikemeranka aki ini kitai dulu kelia, lalu ngasi ba sida.

“Dulu menya, enti tuai kayau tauka tuai serang deka ngangauka mensia mayuh awakka sama nurun ngayau sereta sebala, iya ngirumka temuku tali ari rumah iya lalu dibai ari endur siti ngagai endur siti. Nyadi sama ditanchang enggau temuku tali nya selambar bulu manuk enggau siti rangkang ke udah angus ditunu setengah,” ku aya Matthew Banyin Nyaru, 68, siku tuai ke endang dikelandik mensia mayuh nemu bebiau enggau beburung ba menua Batang Krian. Banyin tu sida ari Rumah Robert Lin Malina di Kedap dalam Malupa, pati Krian. Penemu nya dipansutka iya ngagai penulis lebuh ke ditanya pasal sekeda pekara tentang adat asal bansa kitai Iban apin lama.

“Reti selambar bulu manuk nya semua utai ke ditanchang sama dia enda tau enda dipejalaika ari rumah siti ngagai rumah siti enggau naka penyampat,” ku iya nampung penerang iya pasal pengawa bejalaika temuku tali nya.

Bulu manuk nya ka tanda tauka nyadi lambang iya mesti lempung sereta laju dipejalaika. Bakanya mega rangkang tauka kayu mit ti udah setengah angus ditunu nya ngayuka baka reti sempun ulih ambika tenggau lebuh bejalai malam. Reti nya semua perengka nya enda tau enda mindah dipejalaika ari rumah siti ngagai rumah siti siang malam petang.

Lalu pia mega semua utai nya endang enggau naka penyampat asuh bejalai ngichaka iya lengkas datai ba adan iya tauka orang ke dipadah sama enggau nurun ngayau. Semua rengka enggau kelapung iya enda tau ngetu enti sida bedau datai nuntung ba rumah ke batang d’ambi sama dibai enggau ngayau enggau mulau.

Pesan pasal penurun ngayau nya mesti ditusui tauka dipadah enggau jaku. Barang sapa ke ngenataika utai nya tadi enda tau enda nusui ngagai orang ke dituju kangau tauka panggil nya. Siti temuku ba tali nya baka reti sehari ba penyauh iya ngagai timpuh pesan nya.

Tiap pagi siti temuku enda tau enda dibuka simpul iya sampaika iya abis. Ba senentang tu, lebuh pengabis temuku tali nya dibuka, semua bala anak pungka laki enggau bala manuk sabung ke deka nurun ngayau enda tau enda udah sama datai begelumu ba rumah tuai kayau ke ngirumka panggil nya tadi.

Nyadi dulu menya orang ke nyadi tuai kayau bisi ga udah kala ngena jalai nyelaie mimit ari nya tadi, kena nesau bala anak pungka laki enggau bala manuk sabung iya ke chukup taluk, awakka sama nurun sereta ngayau ari rumah tuai sida. Jalai siti ti bisi udah dikena sekeda tuai kayau kelia iya ngena jalai ngirum ka sangkuh ke tajam lalu dibalut ngena buok munsuh.

Lebuh tanda panggil nya datai ba sebuah-sebuah rumah bala manuk sabung enggau bala pungka laki, orang ke kena tuju tesau nya enda tau enda nyendiaka diri bengepan sereta siap enggau senjata perang sida, baka terabai, sangkuh, nyabur, gansai, sumpit, ipuh, pemalu beduri, pedang, ilang, sereta keresa bukai ke diguna lebuh maya besatup enggau munsuh.

Sekeda ari perengka enggau senjata bukai ke disediaka sida mega nyengkaum langgai tingang, bujak, perambut sereta mega berayang.

Sekeda ke bisi lalu nyendiaka pengaruh kebal, empelias enggau utai bukai baka batu tauka ubat engkerabun ngambika enda dipeda munsuh.

Sehari dua apin nurun, semua bala ke udah kena kangau nya patut udah datai dia. Sida mega udah dibekalka bini sida enggau penganan, penyaram, salai jelu sereta asi. Nyadi jalai kangau beperang ke munyi nya tadi udah diketuka ba taun 1900.

Ari taun 1900 ngagai taun 1922 enti Pengulu deka manggil orang bechara, iya ngirumka labung pengulu iya ngagai orang ke d’asuh datai bechara. Labung nya ke tanda kuasa pengulu ngatur chara. Udah nya pengulu manggil orang datai bechara ngena jalai bekirumka tungkat rutan ke bisi ngundan gambar makota Rajah ba ujung ari pala tungkat nya. Tungkat tu d’anjung ari rumah panjai sebuah ngagai rumah sebuah nyentukka iya datai ba orang ke dituju iya.

Awakka orang nemu pesan tauka panggil nya beguai, iya dikelapung enggau bulu manuk sereta rangkang tauka kayu mit ti udah setengah angus kena tunu. Reti nya semua utai nya enda tau enda dipejalaika siang malam petang. Semua utai nya nadai tau diketu ngapa, enti iya apin nuntung ba orang ke dituju iya.

Enti rumah panjai bisi ditemu enda bejalaika pesan nya, tuai rumah nya deka ditinggang ukum tunggu lima kati (RM3.60) ari pengulu. Enti nyema iya enda ulih mayar tauka enggai mayar tuai rumah nya ulih kena ukum jil empat bulan.

Ari taun 1930, tungkat (4″x2″x1″) ari pengulu dikelapung ka enggau siti surat. Iya mega dikirum ngena jalai dulu ari nya, ari siti endur ngagai siti endur nyentuk ka iya datai ba orang ke dituju iya. Nyadi utai tu lama udah diketuka laban dunya nyau udah jauh mansang. Kebuah pia semua utai diatu dipanggil enggau surat kangau nitih atur ke diletak perintah kemaya haritu.

Utai ke udah dikenang aku nya tadi atur jalai manggil bekangau minta orang nya datai semua, datai sereta baka lebuh maya bisi penusah, tauka minta sah lebuh deka nurun ngayau.

Tang siti jalai ngemegau orang mayuh minta sah, minta bantu, minta tulung orang datai beguai, kelebih agi menua, iya nya rumah panjai ke numbas penyauh ari pangan diri, nya ngemegauka orang ngena terantang tawak.

Nyadi dalam atur tu dulu menya, nyentukka seharitu, setawak sigi agi dikena ngemegau diri serumah, diri segenturung menua, enggau orang rumah panjai ke agi ulih ninga munyi terantang setawak nya.

Penanggul ke suah agi dikemegauka ngena terantang setawak nya penusah orang ninggalka dunya injau tu, tauka ngena madah sereta ngemegau bala mayuh orang bisi parai. Reti nya, enti orang nya sigi udah ditemu lama sakit, nama orang bisi ninga terantang setawak panjai tiga kali bejurut, reti nya orang ke sakit nya udah ngapuska seput. Tawak nya diterantang baru enti bangkai iya udah dipansutka ngagai sapat ba ruai. Lalu pia mega dalam adat pemati ke dikena ba ai Krian enggau Saribas, setawak nya diterantang panjai tiga kali bejurut lebuh bangkai orang nya baru deka nurun d’anjung ngagai pendam.

Atur terantang tawak munyi nya tadi agi dikena ngagai seharitu di menua pegai Betong, Debak, Saratok enggau Roban, lalu bisi mega dikena ba sekeda kandang menua bukai baka ba Batang Rajang, Kemena, Batang Lupar enggau Baram enggau pati ai sida.

Kelimpah ari penusah parai, setawak mega diterantang orang rumah panjai kelia enggau diatu kena minta sah dalam semua penusah ke udah disebut aku dalam perenggan tumu tadi baka penusah rumah angus, ampuh bah, kena serang munsuh (dulu menya) tauka penusah bukai baka kena taban tanah tusur, tekusai pangka kabut sereta enggau penusah sereta tasah bukai.

Tau mega kena ngemegau bala bukai minta sah enti diri serumah bisi penusah lenyau, lemas tauka lesap ba ai baka diterekam baya, enggau penusah bukai.

Taja pan semua utai tu jarang bendar nyadi rambau kediatu, utai tu sigi suah nyadi kelia, lalu pangkung tauka terantang setawak nya meh ke udah chukup beguna besau kena ngemegau sereta nesau bala diri sebala ke numbas penyauh alai diau, sereta disadang mudah ulih datai ngesah sereta mantu dalam penanggul ke dikemegauka.

Bepun ari tu meh, setawak nya enda tau diterantang ngapa enti nadai kebuah. Lalu pangkung tauka terantang begau nya mayuh bengkah bunyi, laban sebengkah nya ngayuka sada ke enda sebaka reti. Ngambika banding, enti terantang panjai enda ngetu nya, reti iya madahka bisi penusah besai minta bantu tauka sah tekala nya sereta chukup beguai.

Nyadi kemaya haritu, mayuh bala nembiak rebak baru ke enda nemu ulu ili senentang pekara tu. Tang nadai ga nya ngawa laban semua pekara tu nadai dikena kitai agi. Laban menua udah mansang, semua diatu ngena jalai moden magang – ngena surat, talipaun, internet tauka media massa.