Cherpen Iban Bambu Isan


Cherpen Iban  

Pengerindu Bambu Isan

Ujan lemai enggai badu-badu. Nitar kudi enda ga pansut baka ngilah ensana. Mua ari agi mambam tunga kulu kin. Puput ribut agi liut maut nyepu penyelap isi kulit lembut anak mensia. Palik ka ai, ai sungai mansang besai, deras ngerarat ka diri. Duan kayu enggau batang nyau berapat-apat anyut benung ai. Buah ensurai nyau bekesepar labuh disepu ribut. Daun kayu kekepai nitih ka tiup ribut. Pun engkabang seberai rumah panjai sida Nana beguyang liut lundai ngelembai merindang babas tanda menua agi kampung empai kusi jamah lipan. Pun rian aki dadun seberai beketepak buah labuh, enda diambi, ambi pan nadai guna enda alah empa. Kadang-kadang bisi ga peda bala sida apai emah, apai ngeriut enggau aki frenky nimba perau, nangi ka karam. Pengujan nya mega ngemai rita ti enda manah ba sida Nana sebilik, belaya lemai pengudah ka Nana datai pukul 3 lemai tadi.

“Nama utai ko dek tadi mang” ko indai Nana merak anak siku iya nya. Duduk nyau ensugau, ninga rita ngenyit dibai anak dara iya nya. Enda iya nyadang endu nya bisi runding ka bakanya.

“Aku ka kawin, ka niri ka rumah tangga” saut Nana merani ka diri, nyada ka utai dalam ati iya din. Apai iya enda memunyi duduk meda astro ba tisi, bekena ka baju panjai lengan cap Petra, baju kabarol kerja ke laut iya suba, duduk ba bangku kayu.

“Kawin !!…Umur baru berapa aja dah ka kawin..Nama nyau gatal pia, nya meh aku enda ngasuh dek gawa ba kedai gari ba sibu suba. Enda apai dek nya ka ngasuh..” mata ngelintu nyeling ngagai laki iya.

“Nama enda tau pia.. Umur udah ga chukup.. ukai nya dek ka belaki.. “ ko Nana majak ngelaban indai iya. Dalam ati iya din, enda ngasuh pan indai enggau apai iya, jadi meh iya enggau sulu ati iya, bujang menua sibu, Justin.

“Ukai enda tau, tang empai maya. Enti dek bangat ka, ila tua apai dek ngiga ka dek laki. Aku enda pechaya ka laki dipilih dek nya. Lebih-lebih agi laki temu dek sengapa sebelah pasar sibu.”

“Nama sida linda bahagia meh, sida kawin enggau laki ba sibu meh. Nadai mayuh macham. Bisi anak dua ulih ngelun kereta”

“Apu dek tu anak bangat enda ninga jaku. Alai meh dek jadi enggau laki dipilih dek nya. Tang aku madah ka dek, aku sigi enda nerima seduai diau ditu. Nguai ka urang dek. Maya kawin dek enda ibuh padah kan gagai aku. Enti dek mending ka jaku, badu dek gila enggau laki nya. Padah ka aku sapa lelaki ka bangat nyayau dek”

“Nama bangat kibuh ka dek nya. Kapa iya enda belaki deh. Pengidup iya nya.” Ko apai Nana nyaut ari tisi. Iya nemu anak indu iya nya sigi enda alah tagang ka belaki. Enda alah endu nya bisi anak tang nadai apai, ngandung ngampang. Laki jai laki manah, nya meh ka deka enda, kapa iya iruh betagang ka endu Nana nya.

Nana enda nyaut jaku indai iya. Makin majak iya bejaku, makin majak indai iya meri iya leca, meri iya jaku ceramah, ngemadis ka ati empu. Jaku indai iya nyematak madah enggai, enda ngasuh iya belaki tumu. Dalam ati iya din enda ibuh sebutka, naka pemedis ati, irau ka diri enda jadi enggau laki ka deka ati iya, ka baru madu pengerindu enggau iya empat bulan ka udah. Kumbai iya pemulai nya ngemai pengaga ngagai apai enggau indai iya, nemu nya ngemai pemalu, dituduh indu gatal. Nya ti ngasuh ati iya balat kudi, tang iya enda memunyi. Panjai runding Nana malam nya, ngenang diri enda ulih jadi seidup sejalai enggau Justin.

Pagi nya Nana pulai baru ka sibu. Nepan perau aki Banyan. Nasib ai besai, laju undur kili nadai ibuh ringkuh-ringkuh bepegai ka suar sengayuh. Datai ba pangkalan nanga entabai, nepan van meribit dia. Bedau sangkai udah mayuh bala driba van meribit nanya ka nepan. Pangkalan nanga entabai sigi udu mayuh urang sarinya, laban ari minggu, seretai nembiak sekula pulai. Perau nyau betusun-tusun ngempit enggi pangan diri, barang perau ka mit, sigi karam diempit ka kaga. Nya meh alai apai etin ngaga perau enggai mit ko iya, nangi ka alah ayu laban sida ka bukai. nembiak sekula lembau nyebut, bisi nyamit bisi nya besai, betundi nepan perau, berandau enggai badu-badu. Ka benung ngangkat ka diri bujang dara, mata enggai badu engkining bepeda ka pangan diri, betilik engka deka ngiga sulu ati. Bisi nya udah ngegap diri ari ulu sungia nyin, nya meh enggai kena perecik ai lebuh merau, ni enda kedua lebuh mansa wong, mansa rantau bediri nangi ka diri kena imbur. Iya ka bujang lembau nusi, bepantai ka kunci kereta ngisin diri bisi keresa, ngambi bala indu dara ngining lalu teraju labuh pengerindu.

Datai ba sibu. Nana enda lalu talipun ngagai daling iya. Enda baka selama, betalipun nyau bejam-jam. Sehari enda talipun, deka dianu iya sulu ati, ni enda jam bejalai bangat tak kelalu lama pama dah labuh pengerindu. Duit kredit nadai alah kira, abis beratus ringgit sebulan, enda iya beduli janji ati bahagia ko iya. Sekalitu iya deka minta putus ari Justin, minta seduai beserara, iya lebih sayau agi ka apai enggau indai iya. Kada meh ati iya kempang. Ngelengka ka urang tuai ka ngada ngidup ka iya ngelamatu.

Ding dang dut… ko munyi hanpon Nana. Tiun hanpon lagu dangdut. Lama Nana asaika enggai ngangkat ka hanpon iya nya. Endang nya ka di anti iya bemunyi, nganti daling iya nya kol iya. Iya sengaja enggai kol siku nya dulu, ngichaka iya ulih mupuk ngelupa ka siku nya. Badu ingat ka penyingat Justin. Ko iya sigat meh Justin nya, tang ba urang bukai enda, sedang-sedang aja, pama meh nya ko jaku bala sida. Badu rindu ka cinta seduai ti udah ngerembai, tejuka ngambi bungai labuh enda nyadi.

Tang ati iya majak keran sayau ka siku nya. Sari enda betemu pan asai ka gila, asai ka disepu enggau jayau aki buban menua indonesia. Bisa penemu mabuk pengerindu sanggup mati baka julit enggau rumeo. Nyema enti dunya kena tsunami, sanggup iya mati nisi Justin, ngicha ka ulih begulai ba sebayan. Ati iya bebagi, sekali ka nerus niat iya tauka ninggal ka Justin. Semua nya pemulai ngagai pemerani seduai, enti Justin sanggup bai iya jadi tumu, sanggup iya nitih ka Justin, beridup ka diri empu. Nyema nadai rumah biar seduai nyewa. Enggai meh iya enda jadi enggau Justin. Ati iya sigi enda ulih ngemula ka iya empu. Runding iya din amat meh madah ka jalai ti rasional ko melayu, beserara aja ari Justin, laban kenu ko runding ba kamus chinta madah ka chinta enda semestinya ngempu tubuh, idup segulai sejalai, tang chinta ditangam teguh dalam ati, dibai mati. Baka ka siku Justin nya aja lelaki ti setipak enggau iya ba dunya tu. Tang ati iya takut mai enda segulai enggau bujang ati iya nya.

“Wai sulu.. lapa laun amat nuan ngangkat ka talipun.. kini ka nuan tadi..” ko sada ati Justin ka bisi merajuk mimit. Ngelamatu bedau sempat engkah ba pending talipun, udah bisi nyua didinga nyebut alau sulu. Tang sekalitu laun mimit, muti ke ka sulu iya nya nyaut.

“Nadai bejalai aku sulu… diau aja ngenang pekara tua. Tusah aku ngira”

“nama hal deh wai sulu.. “

“wai Justin.. aku rasa tua enda ulih idup sejalai.. enda ngasuh sida indai aku..”

“Apuuu…ila meh aku bai ka jayau tanduk pelanduk indai nuan nya..haha””

“serius ka..urang ukai amat-amat iya main-main..”

“sori wai sulu.. kati deh..nama penyadi tua deh..”

“dek laki..dek meh bekira ka pengawa tua.. nama suba dek sanggup nengah semua penguji deh.. enti baka dek nadai runding.. putus aja meh tua..” Ko Nana meri waning ngagai daling iya nya. ka bendar iya enggai agi, ditinggal ka siku nya, nya mina jaku emba iya aja, ngambi siku berunding.

“Anang guai bakanya sulu.. bakani ka tua ka jadi enti utai bangat enggai nyadi. Nya meh aku enggai berumban bai dek jadi. Duit empai chukup ga kena tua niri ka rumah tangga…”

“Nama dek bisi indu bukai pia.. selalu aja meri alasan.. enti enggai padah enggai.. ngambi badu aku nganti dek. Dinga dek wai Justin.. enti baka tua enda tumu jadi. Aku deka ditkah ka sida indai enggau urang bukai, laki giga iya empu. Enti dek sayau ka aku.. pujur ka dek jalai tua. Aku sigi enda, enda enggau dek ngatur pengawa tua. Nya suba dek ga bangat ka aku..diatu mesti betanggungjawab. Suba enggai aku dibai dek bepangan…”

“Lapa jaku nuan munyi nya sulu. Sayau meh aku ka nuan. Enggai meh aku sanggup beserara ari nuan. Badu nuan munyi nya, anang nunda ka jaku manggah. Ila nemu meh aku berunding ka tua. “

“Nama ari suba-suba dek be-ila-ila.. Taja indai aku enggai, sanggup meh aku belaya bai iya, empa pengeran aku ka dek.. tang dek ngambi sambil lewa aja tentang tua. Enti dek amai keran.. ujung minggu tu ila. Bai bala dek nanya aku.” Ko Nana mutus ati. Enti indai enda setuju, apai ga setuju. Kenu ko dalam ati iya din, enti sida enda setuju biar iya nitih ka urang laki, jadi betaban sain ba upis perintah aja.

“Enda kelalu jampat tua tu wai sulu.. anang berumban baban.”

“Pedis amat bejaku enggau dek tu.. nama dek enda chukup umur pia. Nama dek bangat takut nunga apai indai aku pia. Enti takut lapa berani nguntik anak urang dek.. ” Ko Nana majak merak. Pama urang indu, pama ati dah kelalu keran, sigi nekan sida ka laki datai nanya.

Randau seduai ngetu nakanya. Diatu Nana baka nengah dua iti jalai. Jalai terubah iya mai Justin betaban jadi, nya pan enti Justin setuju. Jalai dua seduai putus, bela ngintu diri, merinsa sama merinsa, senang sama senang ngemai nasit diri ti lemi.

Pulai ngagai Justin. Justin anak tuai Entakit, kerja ba kompeni, pangkat asistant manager. Umur baru manggai 27 tahun. Terubah bekelala enggau Nana maya pengerami funfair ba dataran wisma sanyan sibu. Maya meda embat lala belagu meradak ka nyawa kenyut-kenyut jejengkak. Seduai bela labuh pengerindu pengudah ka bekelala nengah pesbuk. Gaji tudah tuai enda bangat besai, chukup-chukup kena ngidup ka diri lalu ngelun kerita saga. Laban ka ditekan sulu ati mai jadi, dia deh Justin pulai berandau enggau apai iya pengudah abis kerja ari enam.

“Apai.. Kati ulih dek nanya ka aku indu”

“Ulih anak.. sapa indu ka deka ati dek nya.. kati chukup belanja dek ka alai dek nyau ka nembu ka pengidup bujang dek. Kati dek amat udah sedia. Anang aja ila udah kawin enda tetupi ka bini anak. Aku sigi ulih melanja anak dek, kengka ka tusu anak dek ulih ga beli ka aku. Tang melanja seduai, enda” Ko apai bejaku meri jaku ajar ti ngemai ati Justin gaga.

“Udah sedia meh aku tu.. nya meh nyau ka ngidup ka diri. Nyau ka bebini.”

“Pia..manah meh nya jang. Sapa indu nya deh.. enda tua indai dek milih menantu deh..ni ka deka dek”

“Tang apai….Bisi tusah mimit. Laban indai iya enggai ka aku..Nama indu nya Nana..urang menua ulu mujok..diau ba nanga kesindu.”

“Apu..Lapa meh iya enggai ka dek deh anak..Pantang amat aku ninga urang bangat enggai ka peturun aku. Nama peturun aku tu umang. Peturun aku tu urang merinsa pia. Ila iya ensepi aku laya iya.. kumbai iya bangat ka anak iya endar kita tu.. kumbai iya bangat anak iya aja indu menua tu.” Ko saut Entakit nyau ka ringat ninga urang enggai ka anak iya.

“Anang munyi nya dek apai”

“Kati deh.. enti iya enggai ka anak aku..aku enggai meh ka anak iya. Kapa nya jang. Kapa milih anak iya. Enti dek amat ka bebini, aku ngiga ka dek indu. Nya entayang dulu nya, anak ibuk dek, naka iya nya. Nya tau meh diambi dek ka bini. Enda lebu dek jadi enggau iya, staf nas nya. udah ga bajik.”

“Apai..anang munyi nya dek. Aku ka jadi enggau iya setegal chinta. Iga ga dek enda faham.”

“Faham aku anak.. kapa nya enti urang enggai. Nyau ka jai munyi jaku.. belaya tua iya enti aku nanya anak iya.. enggai aku nanya iya jang..enda aku nyagi dek jadi enggau anak iya. Kumbai dek nyamai jadi enggau anak urang mangah.”

“Anang munyi nya apai..tulung meh aku.. “

“Jang.. iga ga dek lalu enda mereti ka jaku aku. Enggai aku jang be-isan ka urang mangah bakanya. Reti nya aku enda ngasuh meh seduai jadi. Aku enggai meh kumbai iya deka amat ka anak iya. Enda alah kumbai urang kitai tu enda nemu diri”

Justin enda nemu bekira agi. Iya enggai majak ngumbuk apai iya nanya indu. Iya nemu apai iya sigi enggai, indai iya enda ibuh kira agi, enda ibuh ka iya. Selamatu apai iya aja kiruh ka sida madi, indai iya nama, gauk ka kerja aja. Besari-sari bejual ba maket sibu. Pulai lemai nyau ka ngintu utai ka dijual pagi siti da ga. Ni nya nemu ibuh ka bala anak. Jauh ka baka enggi urang, ngemai anak bejual. Biar anak betegaring gali ba maket, sambil bejual.

Pemulai ari ka betemu enggau apai iya. Justin ngemai ati ti enda lantang. Semalam-malam mata iya enggai tinduk ngenang nama penyadi pengerindu seduai iya Nana. Nitih ka ati iya, singin meh iya mutus aja badu betundi enggau Nana. Badu kiruh ka utai ti bangat enggai nyadi. Tang dalam dada iya sigi sayau ka Nana, ni meh iya ulih tetemu ka indu ngemajik Nana nya, engka tak nadai indu ulih nganti siku nya. Enda sanggup iya meda indu dara nya diempu urang bukai. sanggup iya enda bebini ngapa enti siku nya diempu urang, sema jaku enti udah dikerenkunka urang, sanggup iya nganti siku nya janda.

“Bakani deh” ko Miya nanya Justin lebuh seduai betemu malam hari ba wisma sanyan, seraya ka bediri nilik ka baruh meda kedayau bala mensia ka datai ngundang.

“Nadai jalai tua sulu..Apai aku munyi indai nuan meh dara..Enggai nanya nuan. Ko iya enti indai nuan enggai, iya pan enggai. Nadai penyadi tua sulu”

“Enti pia. Betaban jadi ga tua. Kapa kiruh ka sida..” ko Nana kempang ngelengka ka apai indai iya setegal chinta pengerindu ka empai temu tuju laun. Rarat kili enggai mudik kulu dientung batang melintang ngempang pengerindu ti agi kitang-kitang.

“Enda berani aku bakanya wai dara. Enda sanggup aku ngelengka ka bala aku. Enggai aku muai sida. Budi sida empai ulih ku balas. Enti enda sida, enda aku bulih pangkat baka ka diatu, bulih degree baka tu. Enda aku kempang wai dara” Ko Justin megai jari siku nya.

“Enti pia.. badu dek ngiga aku. Badu tua bepangan enti dek bangat enda kempang. Penakut” Ko Nana jaku tinggi seraya ngusaika jari siku nya.

“Wai sulu… anang munyi nya. Ukai nya maksud ko aku. Belubah meh tua, ngiga jalai bukai ga kena nunduk ka sida.”

“Dinga dek wai Justin… Enti pagila lusa dek enda mutus ka runding diri. Enti dalam kandang seminggu tu tua enda jadi, enda ngira nya chara betul tauka salah. Enti dek agi be-ila-ila, tinggal ka meh aku. Bakani tua deka jadi bakani tua kawin, nya pemandai deh meh. Aku enda ngira. Nya dek ka endar nyebut diri bisi degree.. urang pandai kunon, masalah tua enda ga alah adu ka dek.. Enti enda.. nemu-nemu meh dek…ingat Justin” Ko Nana lalu ninggal ka Justin ka agi kapa-kapa berunding ka sulu dikesayauka iya nya. Lama iya sigi nemu, sulu ati iya Nana sigi mangah, sigi enggai alah, nah iya kala dianu Nana maya iya nguntik siku nya suba, tang iya nemu indu nya sigi indu mereti, patut diambi ka sulu enggau jadi.

Seminggu udah nya. Seduai bela jadi diri melaki bini. Kawin kuboi aja. Nadai bepadah ka urang bukai. seduai diau serumah baka urang bukai meh, baka ka udah jadi. Ninga nya tadi apai Justin datai ngesah berita nya, ngabas ngagai sibu deka betagang ka pekara nya. Ati bisi ka ke kudi ninga anak bujang iya nya enda jaku, majak ka runding diri, melakang ka urang tuai deka jadi.

Indai Nana lebih agi. Pemedis ati asaika ka nganu urang aja. Nya abis laki iya endur iya mantai ka pemedis ati iya. Kenu ko iya, apai Nana nya meh kelalu ngasi ka anak, sampai enda ninga jaku. Iya pan deka nitih ka sibu kin. Deka datai lalu nyarak seduai, nyema enti dua iku nya udah telanjur, sanggup meh iya ngempu uchu, ka nadai apai. Nana meseti dibai iya pulai ke menua, badu nurun gawa di sibu agi, diau mendam ba menua aja.

Datai indai Nana ba rumah sewa Justin enggau Nana, iya lalu ngeleca seduai nya. Anu iya meh seduai ka jadi bakanya. Iya sigi enda nyagi seduai jadi. Enda ngaku seduai jadi, enda sah ko iya. Ati naka pengeringat ingin meh ati iya ka malu seduai nya. Tang bangat enda kempang.

Penatai apai Justin ba endur nya. Iya lalu enda checamang muka jaku.

“Ni jang.. sapa bangat ngelaya dek penapat inat. Uji aku enggau ngelaya” Ko Entakit meda anak iya dilaya indai urang indu.

“Tu aku.. Kitu meh dek.. Nama dek nya apai Justin.. nama dek nya ngajar anak dek enda mereti, naban ka anak urang jadi sengapa” Ko Indai Nana.

“Apu amat pama indai tuai urang tu” Ko apai Justin ga nyaut..apai Justin mansang semak ka agi. Ngelanda sida tiga nya tadi.

Makin semak indai tuai urang nya, apai Justin makin asai ka ngelala indai tuai urang nya. Gamal agi bajik tuai, agi bulih tahan. Iya ngetu enda lama. Untak iya berunding enda lama sapa meh tu. Asai ka ngelala, ingat-ingat lalat, gamal ka bakanya suba asai ka idup ba tali pengingat untak iya din. Tang sapa meh indai nya. Indai Nana pan baka nya. Iya nyau enda nunda ka pemangah iya deka ngelaya apai urang bujang, taja ati iya agi angat. Sapa meh apai tuai urang tu ko iya ga, nama meh gamal bujang tuai nya baka rambang sulu ati iya menya.

“Ukai Miya dek tu” ko apai Justin, Entakit dulu nanya seraya ka nunjuk ka jari, mua mantai ka tanda tanya, agi ngingat ka pekara ti lama.

“Dek sapa dek.. Kada enda Entakit” Ko Miya ga nyaut bela peli-peli, baka ka amat ngelala.

“ekkk… iya meh..aku meh Entakit”

“Apuuu… mit amat meh dunya tu.. aku meh Miya”

Seduai bela ketawa ka pangan diri. Ngenang diri ka kala bekelala dulu suba. Enda seduai ibuh ka anak seduai bela tegenung meda pendiau seduai. Ko jaku ka belaya nemu nya enda nyadi. naka meh pengirau ati anak seduai ti ka meda seduai nya ti ka belaya. Nemu nya laya betukar ketawa ti enggai badu-badu.

“Lapa deh apai..” Ko Justin nundi meda apai iya majak tuchum tuchum ketawa meda pendiau indai tuai ka bela betunga mua enggau iya duduk ba ruang tamu.

“ehhh..nadai..”

“Ngelala aya nya dek indai.. Nama seduai bangat baka nya” Ko Nana ga nanya indai iya ti benama Miya.

“Nadai endu.. sigi baka dini kitai belaya bakatu” ko Miya ngemula ka anak iya nya. Naka meh pemalu iya ti udah dulu ngelaya, enda nemu nya apai tuai nya tadi urang ti kala dikelala iya.

“Aku ngaga ai dulu indai.. berandau meh seduai,, anang aja belaya “ ko Nana meda indai iya baka chukup gaga nyabak pengudah ka betemu enggau bakal entua iya.

Lebuh Entakit enggau Miya berandau kediri. Pulai baru meh pengingat antara seduai. Pengingat ti kala nyadi lebih 30 tahun ti udah. Sapa meh enda ingat ka rambang sulu ati ti kala idup ba pengidup siku-siku mensia.

“Endai anak dek nya tadi wai.. enda nyangka tua tau betemu baru baka kediatu” Ko Entakit dulu nanya.

“Iya wai..” Ko Miya agi malu-malu ngingat ka utai ti udah lama. Lama chukup lama cerita antara seduai kala nyadi. nya diatu anak seduai udah besai. Baka ka diambi mimpi seduai betemu, kira seduai siku antara seduai udah mupuk dulu ngejung ka batang madai, nya meh alai nyau enda betemu dalam kandang 30 tahun.

“Berapa lama udah wai..err tua enda kala betemu.. bisi 30 taun kini?” ko Entakit

“Bisi jangka aku.. juduh anak tua ngemai betemu baru..haha” ko Miya agi geledi ati enti iya mikir ka utai kala nyadi antara seduai.

“Emmm.. ulih aku betanya wai Miya” Ko Entakit asai ka umur biak baru, agi ngeromantik ka diri..

“Nama nya wai?” ko Miya..

“Nadai tentang pengawa tua suba..Kati ulih”

“Tanya ka dia meh”

“Kati amat dek suba nadai pengerindu ngagai aku suba.. Lama amat udah aku berunding ka nya. Lalu nadai jaku saut.. amat kini dek suba nadai chinta ngagai aku” Ko Entakit ingat ka pekara ti empai kala apus dipansik iya.

“Enda ibuh meh tua berandau ka utai udah..utai udah udah meh”

“Kati deh.. enda alah aku parai enda nemu saut nya. Suba bedau biak enda kempang nanya dek.. surat aku nadai ga dibalas dek. “

“Kapa nya wai.. perandau ka nadai meh guna.. tua udah ga tuai..udah nadai daya mutar ka jam ke pun baru” ko Miya agi enggai nyaut. Iya agi malu ka penyalah diri, penyalah diri suba ti udah ngemula ka siku nya. Ngumbai diri nadai chinta, tang selalu meri pengarap ngagai Entakit betitih ka iya berumpan-umpan. Ni enda Entakit terunda-runda deka ka iya.

“Saut meh wai.. sekali ka suba aku amat nempap jari sepiak tauka enda. Nadai dikenggai nya wai, enti amat dek enggai suba, ngambi aku nemu ga.”

Miya agi ingat, iya pan baka Entakit sama ngemai ati keran deka idup segulai sejalai. Tang iya enda milih siku nya, ketegal nitih ka jaku bala iya. Iya lebih sayau agi ka bala iya ari chinta, kapa enda chinta iya mati mendam jauh ditaruh selepak ati iya din. Jadi pan iya suba enggau Entakit enti bala iya enggai nguna. Enda alah iya nadai apai nadai indai nadai kaban aya ibuk. Pulai baru ngagai pengingat lama 30taun ka udah…………

“Endu aku ukai nagang dek ka jadi enggau laki sulu ati dek nya. Tang nama aku ninga cerita tusi urang iya nya nadai pelajar, balat ngenchuri lalu jai pendiau. Nadai aku ka bemenantu ka urang baka nya” Ko apai Miya nagang.

“Ukai nya kita ka jadi enggau iya..aku”

“Alai meh enti dek ka jadi enggau laki baka nya. Tang enti dek keluar ari rumah tu. Badu ngembu aku apai agi dek” Ko apai Miya.

Nya ti ngasuh Miya enda kempang nitih ka Entakit. Taja iya nemu sulu ati iya ukai bangat ngenyai nya, tang jaku petenah urang, iya alah. Nya alai iya kempang ngemula ka sulu ati iya, iya nadai pengerindu. Taja ngelematu seduai selalu begulai kin kia, enda melengka, mina iya enda kala madah ka chinta diri. Tang ari gaya iya nyengulai Entakit, sapa enda nemu iya sigi keran besulu enggau siku nya. Tang apa daya engka nadai juduh kini.

“Wai Miya..wai Miya.. Lapa dek enda nyaut” Ko Entakit meda siku nya tegenung enda bemunyi.

“Nama utai ko dek tadi.. nyau enda ninga..mar nyau udah enda entu ninga aku diatu” Ko Miya ngemula..

“Auk..Amat dek nadai chinta ngagai aku suba”

“Ohh.. terubah aku minta ampun ngagai dek wai Entakit.. Ukai aku enggai ka dek suba.. tang bala aku enda nerima. Amat aku bisi pengerindu ngagai dek, tang aku alah, aku lebih sayau ka urang tuai aku. Chinta enda ibuh sebut, chinta aku suba asai ka sanggup munuh diri nelan racun, empa penalam chinta aku. Tang ukai ko munyi jaku wai.. tua ga nadai juduh suba..”

“Pia.. sangka aku bangat enggai dek suba wai.. nadai ngawa ga.. tua udah ga bela tuai. Kapa enda jam nulung tua nelan ai sungai chinta tua suba.”

“Aku minta ampun amat-amat wai.. taja aku ngemula dek suba. Tang seumur idup tu aku nesal diri tegal muai dek ari pengidup aku. aku nyau asai ka nadai pengidup agi tegal chinta lama udah mati.”

“kapa nya wai. Lama utai nya dah lenyau ari pengidup aku. urang bukai bakanya meh, bepangan andal ka jadi, enda meh jadi”

“auk pia meh”

Pagi siti sida empat bela betugung ba rumah sewa Justin enggau Nana.

“Bisi endar rahsia antara seduai apai enggau ibuk nya” Ko Justin dulu muka jaku.

“Bisi anak.. cerita lama..”

“cerita nama nya ayak, enda ibuh berahsia agi” ko Nana ga nanya.

“ehh.. lembau ka nyebut..pandak jaku. Kami duai suba kala buya baka seduai. Tang ditagang jadi bala apai indai” ko Entakit nusi.

“ohh.. pia.. nya baka nya meh kami duai Justin ka ditagang seduai jadi. Kami duai enggai baka seduai.” Ko Nana ngungkit ka jaku nya

“Aku enda nagang endu.. indai dek nya dulu ngengai ka anak aku.. enti urang aku pan enggai.. indai dek nya tanya, enti iya ngasuh aku pan ngasuh” Ko Entakit nyaut bakal menantu iya nya, seraya nyeling ngagai rambang temawai lama iya kelia, mantai ka tuchum geledi asai ka agi ka ngempu.

“Ehh aku ga disalah ka iya.. seduai jadi.. nadai nya alah tagang agi..” ko iya enggai agi nagang anak indu iya ka deka belaki, laban iya kala ngasai ka diri kala ditagang apai indai kelia, ni enda idup merampau sepemanjai idup.

“Reti nya ngasuh meh tu” Ko Justin, ati gaga. Kira iya tak naka nya aja meh seduai ulih begulai, nemu nya nyau ngasuh seduai tau jadi agi.

“Ngasuh aku igat.. Aku minta ampun udah nganu seduai. Enti bakatu gawai 2012 tu.. datai meh ngerami seduai ba rumah kami.”

“haha..pia meh endu.. ila aku datai nanya lalu ngemai dek ka menantu aku..Kira ka BAMBU ISAN tua wai.. taja suba kala buya, chinta turun ngagai darah getah tua ga.. haha’

Abis..

DOwnload ditu..PDF..

KLIK DITU

http://www.ziddu.com/download/18203756/PengerinduBambuIsan.pdf.html