Pendiau iban rumah panjai dulu menya


MENYA… NEMU KITA ?? Nama batang pengawa kitai iban lebuh nadai pengawa..lebuh diau ba rumah panjai…

Aku agi ingat lebuh lemai sida enik betungkun ka api kelita lemai ari. Kami ka nembiak sibuk belanda kin kia. Ni ka betundi pangan diri, begagai kulu kili nengah ruai nengah tanju. Bisi nya nyabak ketegal alah, bisi nya ketawa gaga menang. Sida ka indai-indai urang kisuk mandi dai, bepangka ka kain baju, nadai main berus baka ka diatu. Jauh ka ngena mesin basu baka ka diatu. Mandi dai mega chapuh. Sida kisuk betusi ka cerita pangan diri, bepuji ka sekeda urang tauka bejai siku-siku. Mandi dai nyau bejam-jam, ni kedua berendam lama-lama. Bisi kedua bebai ka pemansai deka mansai. Sida enik rindu ngelekat, ngumpul sida raban kelekat ka nusu batu. Bisi sekeda enik mandi betipuk aja, masu tubuh aja, tang buk enda ibuk basu, nangi ka pisin teberarak, kenuka. Ukai nya aja, bisi nya besimpu ka buah ranggil. Enti kita enda nemu tau nguji besimpu ngena buah nya, amat bepupu ar.

Ukai nya aja, sida aki rindu ngenan pukat kulu kili, maya silau ari. Ba seberai rumah gaga ka tampun bubu, ngambi nyamai ngetan lalu ngabas tiap hari. Aku pan ampit betan ka bubu, rindu ngabas pagi hari. Begaga ka tampun bubu enggau sida aki, enggai pulai-pulai lemai hari. Bubu digaga ari buluh perin, gaga manah-manah enggai ka ikan nemu menselit. Baka ni ka ngetan bubu? Enti kita enda nemu kumbi kita tan mua tunga kulu ai, tang nya salah. Tunga kili ia.

Pulai mandi lemai hari sida indai mupuk ngadu ka pemakai. Bepanduk ka lauk. Panduk lauk babas baka sida paku tubu, sida kemeding, sida subung, sida daun rampu entekai, sida daun sabung enggau macham lauk babas ka bukai. Panduk rebus aja, mina digulai enggau garam enggau miching. Ikan pan pia, nadai mayuh kira, tunu tauka rebus aja. Makai lemai suah agi begempuru enggau bilik sepiak-sepiak ngambi ka makai kenyang enggau terenah. Maya makai rindu agi berandau. Randau mayuh leman, kad eka agi rindu berandau pasal pemansang, berandau ka urang bukai, tauka berandau ka pekara politik.

Pulai ngagai gambar ba atas nya, peda kita indai urang ngenyut ka anak ba ruai. Kitai iban rindu agi diau ba ruai, duduk nungu lemai. Gali tindok tutu indu utai, tutu kerengit. Tang budaya tu chukup rindu dikereja. Uduk pan sama enggau gali dia. Penulis enda entu rindu gali nisi sida ukoi, bau udah nya ngemai kerengit.

Gambar sida agi ka rindu duduk berandau enggau pangan diri. enda bebaju endang udah sigi pengidup. betanchut pandak ngayan ka betis nyau bekurai empa pemendar gawa.

Baka tu meh budaya penghidup kitai suba. Diatu udah jauh beza. Kitai rindu agi nunga tv lebuh lemai ari. Siang hari pan baka nya, sibuk begiga ka anak belanja, sibuk gawa. Engka nya meh pemansang ko perdana menteri kitai. Oh ha.. terima kasih ngagai bala pemesai kitai ti udah ngemai kitai mupuk nyingkang, nuju dunya pemansang. Anang kitai tinggal ulih urang, anang kitai agi nunda pendiau lama, ubah meh batang penghidup bilik kitai. Enti suba sida aki enik kitai bumai, tang jarang bulih utai, diatu kitai mesti ngaga iya bisi bulih. Beli ka sum. Suba enti meda umai enda mayuh bulih padi kumbai sida aki enik enda tulung petara, tang diatu lain, ka ia enda baka nya deh, laban tanah enda subur. Nya meh mansut ka asil ti mimit. Uji tabur ka sum cap jambatan, peda asil…
Nya berita sariitu……ngarap kitai bela mujur taun tu.