Pendiau Pengidup Bujang


Gambar lebuh aku bejalai ngiga penemu datai dimenua urang. Gambar aku enggau enik bangsa Kelabit ba Long Lellang Baram miri.

Bakatu Meh serebana tudah diri…..

PENGIDUP BUJANG kumbai temporary, nganti maya aku bebini, tang agi meruan baka nya ga ninting ari ninting taun silih beganti. Bisi kerja diau ba mengeri, kerja kuli makai gaji, nurun gawa tumu pagi sampai dini ari, tulang lembau angkat pagi, nanggie dianu bos ngemedis diri. Diau kediri nadai urang ngintu, nadai urang emparu, ngati kediri sunyi seilu-ilu ninting ari baka urang tuyu. Peda urang bukai bisi ga anak bini enggau segulai bekin-kia, bejalai lemai ngena kereta, enggi tudah lembau nyebut kediri meh bejalai kaki nadai urang nyendi enggau berandau. Maya lapar panduk ka maggie mee, deka ngelimat belanja, makai ba kedai engka enda alah ga belama. Manduk kediri tulang bangat lembau, lelak pulai gawa deka diau, ka bekesegau nadai meh kaban enggau, nyamai gali tindok enggai ka majak mamau. Malas nuchi gari, pancit enggau minyak wangi, beli aja ba kedai economi, rega murah bisi diskaun jenama follow me. Utai dipakai sigi cincai cincai, ti lapar perut makai ruti canai, order aja ruti kusung sepinggai, ai irup ai bungai. Kuchik kusung ninting ujung bulan, mula ngetu bebeli ka utai nyamai. Sewa rumah meseti dibayar, legi diburu tukey tangkap pulis tindok ba balai.

Dalam ati ingin meh ka ngena kereta lawa baka enggi urang bukai, tang nama daya rega bangat enda alah pegai. Gaji kumbai besai enda ga, nangie pagila lusa nadai belanja nama penyadi, simpan mimit engka tak nyadi bukit ko jaku sida. fikir runding bangat kelalu panjai, sampai malam enda tindok jenak, ngigau ngenang nasit diri anak bujang sengapa rembang. Nama meh penyadi diri. Nama meh kebuah bakatu belama, enda patut tulah sumpah antu. Lalu nadai pemansang baka enggi urang lantang senang entuchung baka bukit, ngebung tinggi baka langit. Lebuh ati berandau kediri, asai ka bisi tubuh no 2 nyebut nibar ka jaku “nama gaga dek ditu, alai kin ka nitih ka urang, din besai gaji, bisi penyenang, lapa meh dek beli-beli ditu”. Tekenang ka nya, berasai sinu dalam ati, sida apai sida indai endang ngarap ka tudah diri senang lantang besai gaji dimenua urang, tang ba tudah diri endang selalu rawan.

Lebuh berandau enggau bala kaban, ni pangan dek deh, dini bini dek deh. Nyau malu mua diri ka nyaut, laban tudah ka nadai, solo belama. Bisi ga bala kaban enda pechaya, meda tudah ka gawa menyana bisi pemandai, enda patut kenu ka, nadai endun perabayu datai nutu. Ngenang nya ngumbai diri jugau belama meh tudah diri, enda megai bungai ka bisi dipansa lebuh bejalai belelang menua urang. Ka meh ati din nunda urang bukai, belaki bebini maya umur agi biak, tang nama daya utai bangat enggai nyadi. kaban serambau nyau bisi anak dua tiga, enggi tudah calon pan nadai.

Ngarap ka tudah diri ulih belubah-lubah nitih ka singkang urang ti mansang. Enda patut petara bangat enda meda enda nengkila serta mantu diri. Panjai runding nadai meh guna, enti enda mupuk nyingkang, ngadu, ngadang, nyikap diri enggau penemu kemaya ari, enda alah tinggal ulih urang, enggai ka diri ngining pemansang urang. Badu agi tak lungga-lungga betungkat dagu, nadai tuju-tuju, ko dalam ati din bisi meh juluk, tang ninting ari agi ga enda berubah, nama penyadi baka tu deh. Suah runding bepusin ngiga geliga ti tau nulung nyaut tanya ti enda besaut.

Ooo petara ninga meh peminta anak bujang pala menua ti datai belelang diau menua urang, beri meh kami tu pengelantang, pemintar, sikar lalu bulih reta pengaya baka enggi urang. Saup meh kami tu napi penusah ti bisi datai nuntung, nyangka pagila lusa kami tu tau enda kering kebal ngesai ka ia. Anang bangat meri penguji ngagai kami, engka ila penguji nya tau mai penanggul ba kami. Tang peda meh pejalai kami, atur meh nitih ka peneka nuan ti bempu kuasa. Ngajih taun tu ulih mai penyenang, lebih agi maju ari tuan ka udah, ngulih ka utai gerah mudah, munyi ko leka lagu..

Sada Ati Lebuh Ngenang Pendiau diri..
Timberland, J. 2012. Iban2u.