Cerpen iban | Jampat bendar nuan berubah


JEREPAN – JAMPAT BENDAR NUAN BERUBAH

“Hello” ku orang ba telipun nya. “Hello, sapa tu?” aku nyaut iya. Te enda kala aku ninga sera nyawa baka lelaki ke benung berandau enggau aku tu. Sapa enda mih iya tu nih? Aku bertanya dalam ati aku empu.

“Aku tu, Leo. Petunggal Mathew”

“Oh! Nuan nya Leo?” Nyeh…nya baru aku teringat ke petunggal suluku, Leo nya. Teringat ke maya Thew mai aku pulai ke rumah bala iya ba Tudan dia. Rumah endar iya ba Suai, Niah, rumahpanjai dih. Enti maya iya pulai ari upso (offshore) iya pulai ke rumah bala iya nya. Laban enggai pulai ke atas kin, enda alah orang tak emergency call asuh nurun ke laut enda ulih kuntik iya. Leo…sigat diri ga orang menua. Kurus tinggi, buk kuning. Sigi style nembiak diatu mih nya. Smart agi iya nya…iya ke manah endar, iya rajin sembiang ari minggu. Anang aja rajin sembiang tang rajin ga ngaga penyalah. Dini ka nyadi nya. Ngaga-ngaga penyalah udah nya ari minggu sembiang ngampun dosa. Dah diampun ngaga penyalah baru ga. Akai dai…pedis endar isi baka nya.

Tuchum-tuchum bala orang di rumah dia ngambat aku. Aku pan tuchum laban malu kediri dibai orang laki pulai ke rumah. Hai wai…sapa enda malu ti betemu enggau “bakal” ipar munyi ku laut. Akai dai…te tin burak ah di tunga orang tu. ku anak ati din. Sigi gaya kitai Iban ga, enda tau betunga ati diri. Enda tau tinggal ai bepupu’ nya ga. Enti di nah ke ai urin…suri mih sigi enda dikemuning ke orang. Heh..orang lelaki ku aku wai…hehehe…orang indu lain agi ga panjung ke indu nih..sigi ai manis nya mih diruntu..hihihi..

“Wai, agi dia nuan?” Akai…tekenyit ninga nyawa Leo. Enda ingat ke diri benung betalipaun enggau iya. nyau tembu mulai ke pengingat lama enggau sulu. Ah…enti dikenang, amat chukup pengerindu maya ti bepangan enggau nuan bujang.

“Agi Leo, ditu mih aku. Nama utai dih? Te enda kala nuan tu telipun aku. Tentu bisi endar nih?” aku tuchum-tuchum. Engka te bisi pesan berat ari apai tuai kini. Ehem! (Tuchum lelegup)

“Enda nemu aku kati ka madah. Tang enggai nyadi enda ga aku madah ke nuan. Badu mih nuan ngiga Thew agi” Tekenyit aku ninga Leo madah munyi nya. “Ya nama kebuah dih Leo?” “Thew udah bebini” Te asai ke dipandam dada, asai ke turun darah mua ninga berita ke di bai Leo. Nama tu penguji ke diberi petara? Aku enda arap ke berita tu. Nyangka sida Leo deka bemain enggau aku. Tauka sekali sida iya deka nguji ati sereta pengerindu aku ke Mathew. Tauka sekali sida iya nagang pengerindu kami?

“Amat nuan nya Leo? Anang ngemula ke aku kita” enggau sera nyawa ti begetar aku jaku.
“Amat ah! Dini mih kami tu kempang deka ngemula ke nuan. Sapa orang enda nemu seduai bepangan. Nadai mih kami deka ngemalu ke nuan…enti nyema kami ngemalu ke nuan, reti iya kami ngemalu ke diri empu”

Aruh mih ngelama tu aku selalu bemimpi rawan, bemimpi ke semetak ketupong kanan. Enda mih aku nemu nuan sulu udah beduan ti ngujung ke pengerindu tua puntan😥 Aku mina ulih nyabak dalam ati.

Aku diau aja ninga utai ke dipadah Leo. “Teruska dia mih Leo, aku sedia ninga semua iya”

“Thew madah seduai sarinya belaya, namanya amat kini?”

Aku nusoi ngagai Leo utai ti nyadi lebuh nya…

maya Mathew nurun ke laut, iya bisi telipun aku…

“Aku deka asuh apai indai aku nurun ke Miri, betemu enggau nuan.” ku Mathew ngepun ke randau tua iya.
“Ya lapa dih?”
“asuh sida iya nanya nuan. Ngambi ke jampat agi tua beterang”
“Nuan anang mayuh macham Thew. Aku tu empai bersedia deka niri ke rumahtangga. Umur agi ga biak amat, tambah mega aku deka ngiga kereja tetap”

“Nama nuan enggai jadi enggau aku? Aku enda ngira, bersedia mih nuan ari 6 tu sida iya kia”

Majak ga Mathew ngansak. Aku udah enda nemu agi. Petang asai dunya tu. Puas aku berunding. Enti aku nerima utai ku iya, tanda iya aku mina ngancur ke pengidup aku. Enti aku enda nerima iya, mesti iya ngumbai aku enda beamat dalam besulu nanggam pengerindu enggau iya.

“Enda ulih aku Thew. Anang ngemalu ke apai indai aku, kelebih agi apai indai nuan. Enti nyema bala nuan datai sekali pan, aku tetap enda nerima. Ari sida apai indai nuan pulai enggau jari kusung. Manah agi anang datai sekali. Legi rita aku ga jai di kumbai deka bemain aja enggau nuan. Enti nuan bangat enda tedanti ke aku, nadai ku enggau mih.”

Aku lalu ngempas ke telipun. Nama mih kebuah Mathew tu bangat te ngansak aku enda pegigak baka nya. Aku tu ukainya indu ke deka ngereja pengawa enda bebah-bah baka nya. Gila! Aku enda ngancur ke idup aku baka nya. Belaki tumu, sedangkan aku empai nemu ngintu ruang bilik, kereja pan aku empai tetap. Kada ke agi rumpas tu aku deka ngiga kereja perintah, kereja ti tetap.

***

“baka nya ku cherita iya Leo”
“Hurm…baka nya rupa iya. Tang iya madah nuan nadai call iya 2 minggu tu.”
“Ya amat Leo. Dalam 2 minggu tu mayuh penusah nuntung bala aku. aya mah ke mak aku baru udah nadai pun bulan tu tadi. Ibu mah ke aba aku nadai minggu tu kemari ga, nyau betampung ulit kami tu. Dini mih aku bisi ari deka berandau enggau iya.”

“Amat ga nya nih. iya nadai ga telipun nuan. iya te lalu madah kediri bebini. Nuan nemu, iya ti anjung diri ke rumah indunya. Indu kami serumah ditu. Biak amat indunya enda ambis peresa pom 3”

Nyeh…indu baka nya ke ka iya. Endang sigi nama udah lelaki, ngiga utai ke nyamai aja. Pengidup dudi ari enda di kira. Nasib enda jadi enggau nuan Thew.

Aku mina ulih murus dada asuh diri empu bersabar. Kapa enda ku ati aku din. Nya utai ke ka iya. Meda mih utai ulih iya ila, baka ni mih pengidup iya. Walau apa pun aku tetap besampi ke pengerai seduai iya melaki bini.

“Enda ngawa mih nya Leo. Nya jalai ti udah dipilih iya. Mina aku enda puas ati iya ninggal ke aku nadai madah. iya ninggal ke aku sedangka iya enda nemu masalah aku. iya kelalu cepat berubah ati.”

“au. Aku tu enggai nyadi enda madah, laban ngasai ke nuan nyau baka ke bala diri empu. Telipun iya pan nadai dikena iya agi. Bulan 6 tu jadi mih seduai iya, tang iya endang sigi udah nama’ kediri ngagai indunya. Apai indai iya pan enda nemu daya agi. Anang agi ga kami tu mina bala iya aja. Nyaga diri enggau manah mih nuan, kapa ngarap ke iya agi nih. Mupuk aku tu. Bye”

“Bye”

Apu apai, enda nyangka Thew bangat ngenyampat nya berubah. Enti belaya sekalipun nadai mih sampai mutus ati enda tedanti ke aku. Sapa mih aku tu. Enda ngawa mih Thew, nya utai ke ka nuan. Tua pan baru bepangan, nadai pengerugi ke pangan diri. Sayau mih maya tua puntan, pengerindu tua lebu. Enti ngenang pemanah bala nuan enggau aku, asai ka ngeransi ga ati. Tang aku naka ulih mih nyabar diri empu.

Enti ulih aku enggai betemu enggau iya agi. Enggai! Enti nitih ati ke ringat, asai ka ku keramak aja mua bini iya. Tang enggai nyadi ga..enda pia? Ukai tentu salah mah ke indu aja. iya ke lelaki baka nya mih. Jari enti betempik sepiak aja dini ka nyadi bebunyi.

Bisi ga kaban aku ti diau enda jauh ari rumah sida iya madah, kekadang tepeda ke seduai iya melaki bini. Enti tudah tuai merening enda sengaja, nguing ke bukai ga tudah Thew. Engka enggai temu orang udah bebini mih nya. Pama enggai temu orang, anang pansut, te mendam dalam rumah.

Wai bujang, hesh…laki orang nuan nya…ukai orang bujang agi. Taja di lalai ke nuan buah rian, agi mih temu bau iya wai sayau. Bungkus ke nuan abus, tekebu mih abu iya wai ambu. Tumbak ke nuan landak, cecunggak mih bulu wai sulu. Nadai guna mih nuan nyalam kediri udah bebini.

Hassss apai…enti baka burung, udah lama aku terebai ngelayang tasik, bejalai merakak menua, gegadai ngerembang babas, kejuh-kejuh nujah kampung. Ngichak ke enda tepansa ke iya ba sebelah kedai…ba sebelah rantau jalai. Tang, dini mih nya alah kelari. Tambah mega semenoa. sehari tu enda mih bepansa, pagi ila lusa kada enda berimbas bau? Hah! Pama berimbas bau, lalu aku seging iya nya awak ke lalu tetungkam, jera’ iya. Apei apai…balat dih jai aku.😆

Sinu amat asai ati lebuh ti mending ke lagu ti ditebah DJ Cats radio tu. Ah…baka nenemu aku tu benung tusah ati…

Singin ku ka nunu gari nuan sulu
Ditinggal ke nuan kena ngumpan ati aku
Ti enda asa ninga jaku manis bebungai
Nyangka ku enda nerima nuan nyadi ke ambai
Perasa ku ninga jaku manis nuan dulu
Mina ngeracun ati ku

Udah aku baka buah nadai isi
Nuan lalu nyau enda ibuh ke aku agi
Nuan jauh…jauh…jauh
Nuan ngerari kediri

Udah aku baka bungai nadai madu
Nuan lalu terebai nadai ku temu
Nuan pergi…pergi…pergi…
Lalu nadai pulai agi.

Dikarang,
a_iE