Jerepan Iban- Pemegi Nuan Nadai Ganti


Ditulis : Aie

Gambar pengias

10 Ogos 2002, ari ti chukup bereti dalam pengidup aku, ari ti mai rita gaga ke semua bala tua Jang, ari tu mih tua Jang di sabung jadi melaki bini. chukup mih pengaga dalam ati aku perkara ti di anyam dalam mimpi udah nyadi nyata. Ari tua berpadu, ari tua sah bempu pangan diri. Nuan mih kelebih agi gaga dipelaba ke aku, Laban betaun-taun nuan ti udah nganti aku, nyadi ke tenggau, nyadi ke lalau dalam pengidup nuan. Tang maya nya suba aku enda rumpas, laban aku benung bepangan enggau orang bukai.

chukup mih pengerami malam nya Jang, aku chukup berasai senang lantang sereta gaga naka pengaga utai. Kelebih agi laban kaban rapat aku mega bisi datai, iya nya Evy. Terima kasih Evy…laban sudi datai ba ari bahagia aku. Nuan mih kaban aku dunya enggau serega. Kada aku tebulih ke ganti nuan enti nyema nuan lenyau ari pengidup aku Evy? Evy ukai semina datai ngulu pengerami aku, iya mega ti nulung aku gawa ba dapur, iya mega ti nulung ngari aku, lalu ke pengapit aku. Pengapit secara enda sengaja mih nya pelaba ke aku.

lebuh aku ti udah tembu disikap enggau di anta “mak andam” munyi ku jaku laut, dia Evy madah “Lawa amat nuan ngena baju pengantin serba putih tu Amy” kenu ku Evy. Aku tunduk malu lalu tuchum ngelinsum. Dia aku tepeda ke lelaki ti nyadi penyukung pengidup aku berdiri enda jauh ari bilik alai aku beradu, iya baka lampu kelita. mancar terang maya aku kapa-kapa dalam petang. iya tuchum ngagai aku, aku pun malas tuchum iya. Sigat amai iya, berbaju kot celum, bertuah mih aku ngempu nuan Jang, lelaki ti chukup mentas penuh enggau adat, budi sereta basa.

Malam kami duai ke melah pinang nya, endang chukup rami. Sida ke biak enggau ke tuai betanda datai ke pagi. Kasih tudah bakih aku Evy enda tinduk semalam-malam. Udah ga jauh pejalai tudah tuai, ari Miri ke Gelasah kira ke jauh mih nya. Ni iya ke ngintu utai..ni iya ke ngintu orang, bertuah amai aku bebakih enggau iya.
*****
Semadi nyau ngenang Evy dia aku lalu teringat ke suba aku kala nusoi ngagai Jang, “Evy siku aja mih kaban aku di dunya tu. iya ti selalu enggau aku maya aku tusah maya aku senang, enda sekali iya enda ingat ke aku” Jang nemu kaul kami duai Evy ti chukup rat sempama baka isi enggau kukut, enda mudah kami duai meleka ke pangan diri. Kaul Jang enggau Evy mega udah semakin rat. Kaul Evy ukai aja rat enggau kami duai Jang tang mega chukup rat enggau keluarga aku. Evy asai ke menyadi ada aku empu lebuh ti begulai enggau kami sebilik. Tambah mega Evy ti ngangau ke indai enggau apai aku, “mak” enggau “aba”. Nyangka iya ngasai kediri udah bekaul rapat enggau kami sebilik.

Ari beganti ari, minggu beganti minggu, bulan beganti bulan. Pengidup rumahtangga aku nadai kala bisi penyilap. Bahagia amai aku enda alah aku sebut. Tambah ke agi enggau pengada anak indu kami. iya ti diberi nama Melly Allysa Tra. Burak amai iya sereta mit baka apai enggau indai iya mega. Tang bisi nyelai mimit anak aku tu balat endar mangah enda nyenyalah baka kaban aku Evy.

Owh! Teringat baru aku ke kaban aku nya. Lama udah iya nadai ngusung kami. Kenu ku maya iya, enti Melly ada iya deka ngabas anak tu laban ku iya anak aku anak iya mega.

*****

17 Ogos 2003 kami duai Jang di sabung jadi ba gereja. Laban Jang ti baru megai pengarap kristian. Aku meri terima kasih ngagai petara laban muka pintu ati laki aku nerima pengarap kristian dalam pengidup iya. Tampak bendar pengidup, terang sereta pegari. Aku berasai gaga ati. maya nya ari minggu, mayuh mega pasangan bukai ti baru masuk kristian lalu bejadi ba gereja. Udah setaun, baru kami duai iya ulih jadi ba gereja nitih ke sakramen ti ditetap ke gereja.

*****

Takah sehari, ukai…ukai sehari tang mina beberapa jam aja manggai ari siti iya nya kena 18 Ogos 2003. Ari ti enda ulih lenyau ari pengingat aku. Ari ti asuh aku asai ke enggai idup agi. Ari ti asuh aku baka tangga ti nadai lalau baka burung ti patah sayap. Mawa pengidup aku, nadai sapa nemu, nadai sapa ulih ngasai nama utai ti di asai aku maya nya. Nama mih bangat tumu nuan Jang ninggal ke aku? Igak enda kasih ke aku sereta anak tua? Melly empai nemu utai Jang. Aku mega empai puas idup enggau nuan.

*****

Lemainya Jang nurun bemain bul baka selama enggau kaban iya. Sebedau iya nurun nya, iya ensium aku, sereta ensium anak iya. Entah berapa kali mih iya ensium anak iya nya. Madah kediri sayau ke anak iya. Nya mih pementas iya enggau anak bini. udah nya nyau mih tudah tuai ngena moto kaban iya laban bekau moto iya ke jai.

Sampai jam 6 lemai, Jam lalu bedau pulai. Alit ga ati aku laban ngelama tu iya pulai ke rumah sebedau jam 6, tudah tuai ukai ka laun makai. Aku mega udah teleba nyedia ke pemakai kami menyanak sebedau jam 7 malam.

Kira pukul 7 malam, endur kami dia (Gelasah) dikejut ke enggau rita ti chukup sinu. Jang mati dilantak bas ari belakang. Bas Borneo Highway. iya di irit bas 10 meter ari tempat iya ke dilantak. Naka mih penyinu ati meda tubuh iya ba baruh bas enda engkebut agi. Aku nyerauh nyabak meda tubuh iya dibai niki ke rumah. Aku ngeransi sereta engkuda meda tubuh orang ti dikesayau ke enda kekebut sereta biru ba semua tubuh. ka aja asai aku merekuh ke tubuh iya, merap iya ke penudi. Tang aku di tan bala mayuh, ketegal Melly agi mit bendar empai tumbuh ngeli. Dia aku enda tau megai tubuh iya. Tuhan aja nemu pengancur dalam ati aku, Tuhan aja ngasai pemerinsa aku. Aku enda kala ngadang ujian baka tu diberi Tuhan ngagai aku.

Kasih mih tudah aku ditinggal ke Jang pergi enda pulai agi. Sinu aku meda mua anak kami. Baru 6 bulan empai nemu reti utai ke mati, tudah iya ditinggal ke apai iya. Nama mih bangat jampat nuan Jang pergi? Baru setaun tua jadi, baru setaun tua bempu pangan diri. Nama petara ngambi org ti aku sayau? Nama petara enda kasih ke aku? Aku mina mampu nyabak deduie. Beserara mih tua tu Jang, beserara selama-lama iya. Gambar tua jadi meruan di simpan aku ngambi ke bisi dipeda anak tua jemah ila. Ngambi ke iya nemu sapa apai iya. Ngambi ke iya agi sayau ke apai iya taja iya enda kala ngasai bisi apai enggau begulai.

*****

Evy… terima kasih wai, laban ti udah datai maya ngetas ulit suba. Nuan mih bakih aku selama-lama iya. Enti nuan nadai, betambah puang mih pengidup aku. Nuan bisi maya aku senang nuan mega bisi maya aku tusah. Tang aku deka minta ampun ngagai nuan, laban enda ulih madah ke nuan maya ari Jang ke lesi bebadi. Ukai aku enda madah tang aku enda tepadah. Nuan pan tentu nemu maya aku tusah baka nya, aku enda nemu nama utai ti patut digaga aku. Aku nyau enda nemu dunya agi. Aku nemu nuan bisi ngeransi mimit laban enda dipadah ke hal nya. Tang syukur mih nuan agi sudi datai maya ngetas ulit niang. Setaun nuan enda ngabas kami Evy…setaun.

*****

Jang selalu nanya “maya Evy ka kitu? Pia iya udah besemaya deka nemuai enti Melly ada”

“Amy, bisi nuan telipun ngagai Evy? Tanya ke berita iya”

Selalu endar iya nanya ke nuan Evy. Aku nemu nuan bekereja, nuan pan nadai ari ka mindah kin kitu. Tambah mega menua kitai tu jauh. Enti pulai ari tentu nuan lelak. Terima kasih Evy laban nemu keadaan aku. Nemuai mih ngagai kami udah tu.

Jang, ngarap ke petara selalu enggau nuan. Anang nuan irau ke kami menyanak ti ditinggal ke nuan ditu. Aku enggau pengabis daya ngidup sereta ngemesai ke anak tua. Tu mih tanda penyayau sereta pengerindu tua. Enda sekali aku ngelengka ke iya, chukup mih nuan aja ti ninggal ke aku, pedis endang chukup pedis mih aku nerima tu Jang, tang tu mih perkara ti patut diterima aku. Enti nyema tu penguji ti diberi petara ngagai kami duai menyanak, aku nadai daya. Aku nerima penguji iya.