Jerpen pandak iban | Majalah iban


Cherpen kitai iban pansut baru 2014.

3 iti cerpen tu dijual enggau rega pemadu mudah

RM10 Aja.

3cover

Tajuk 3 iti cerpen iban tu ianya

1. Alisciana – Anti meh aku bujang. Pdf (Preview klik ditu)

2. Udah laun tua betemu. pdf (Preview klik ditu)

3. Pengerindu bambu Isan.pdf – percuma.

“INGAT CERPEN TU UKAI HARDCOPY & UKAI BUKU.. MINA ULIH BACHA NGENA PDF AJA TAUKA TALIPUN PINTAR KITA.”

BAKA NI KA MELI.

1. Bayar Ngagai Akaun Aku.

NAMA: JUSTINE ANAK MALAKA
NO ACC: 1111-1429-1580 (MAYBANK)
NO ACC: 10070074683525 (Cimb Bank)
No Acc : 1111-2800-1174-83 (RHB)

2. Padah Ngagai Aku ngena SMS kita udah meli. Padah ka ngena bank ni kita mayar. Taip SMS Baka tu.
Anjung { CI Maybank Nama & emel } Ngagai

No tel – o19 878 (Lapan Tujuh lapan) 2267 (Dua dua enam tujuh)

3. Aku emel kita cerpen 3 iti nya.

Cerpen Iban | Udah laun tua betemu..


UDAH LAUN TUA BETEMU | Jerita iban

Cerpen Iban udah Laun Tua Betemu

TAMPUNG DITU

Malam hari, nembiak udu kachuh ragak dalam kelas, lebih-lebih agi nembiak tahun enam, baka ka enda nemu gintir diri ka ngambi peresa UPSR ujung taun 1999. Sida berandah sebuat lembau nusi, nyau bebuka ka baju, dikena nikau indu ngingit ka nutu api. Udah ngingit nya lekat ba baju tangkap lalu asuh bemunyi, udah nya belanda baka gaya megai motosikal.

“Badu ragakkkk !!!” ko Miyah ngingar ka nyawa iya ngerara sida sekelas. Tudah tuai laban ka ketua pengawas, nya ngasai ka tanggung pengawa nya patut dikemeranka iya. “Aku tulis nama kita nya legi, awak Cikgu Tuni nyipat kita” Sambung Miyah ngeremba sida Berandah ka agi chapuh berandau.

“Amat pama miyah tu, nyepi diri ka pengawas ngumba ka diri. Ukai nya bisi gaji dek nya nulis nama kami” Tundi Jelai, kaban Berandah ka agi bediri nunga Berandah, seraya ka ngaru gatal ba pah. Ati din sigi rindu nundi sida ka indu, lebih-lebih agi sida Miyah sekaban, rindu meda sida nya sebuat ringat.

“Dek bisi meh ngau ragak, enti dek ngeriput nama kami, kami ngemai dek sekali ga legi. Haha..” Berandah mula muka laya ngagai Miyah.

“Ni aku bisi.. Kita ka laki aja sesegau ari tadi peda aku. Enda ngaku, ulih gamal jai, enda nemu malu” Saut Miyah berani, laban tudah ka besai agi ari sida nya.

“Ka bula-bula, sapa bejalai ka jamban tadi nyau sampal deh. Ukai dek indu gemuk” Ko berandah mantai ka jaku berangat, endang sengaja ngemedis ka ati Miyah. Iya pama belaya enggau siku nya, sigi jakunya dulu pantai ka iya, kena ngalah ka pangan, nadai nya nemu pemedis ati urang ka ninga.

“Ulih gamal dek jai, nya ka aja ngelaya urang. Aku ripot dek legi. Ngambi cikgu ngukum dek”

“Reput enggau sida Berandah nya, nyau Methew tau meh bai sekali, ari tadi nundi urang” Ko tudah Umban ari tisi, laban pajak dikeduan Methew ngecit ba tanchut pagi tadi. Methew pan sebaka mega, nundi nadai ngira ati urang ka malu ngetat ka.

“Auk Umban, aram tua ngereput sida nya” ko Miyah ngemai Umban, laban ati din udah pedis, ai mata asai ka labuh bai belaya enggau sida Berandah nya. Udah ga ngelaya iya besaup, ni tudah tan.

“Woi indu gemuk.. Berani amat dek neh.. Jelai tutup pintu, anang ngasuh seduai nya pansut” Ko Berandah.

“Auk, auk bos” Ko Jelai.

“Sapa indu gemu, laki langkei” Ko Miyah seraya ka nempap mija, nunga Berandah. Dini tudah ka dikumbai indu gemu, meda Miyah ka paling besai ba kelas sida, dikumbai gemu.

“Tak ngumba ka diri dek nya neh.. Tingko enggau kening dek nya legi, nemu-nemu ka ngelaban bos besai dalam kelas tu. Tak ngisin ka diri, enti dek nya enda besai sereta tinggi bakanya, nyampau meh cikgu ngasuh dek nyadi ketua pengawas. Peda dek nyin Uching nadai meh bemunyi, pengawas meh iya.” Ko kumen Berandah, laban ka baruh mimit ari Miyah. Sida ka bukai enda bemunyi meda seduai belaya. Peda aja.

“Apu bendar endar seduai melaki bini tu belaya. Kada enda ka sarak da nya deh” keduan Cecelia ari belakang. Cecelia kaban rapat Miyah, duduk sepiak mija enggau Miyah. Kebuah Cecelia berani nundi, laban Berandah nya petunggal iya.

“Uwekkk.. Kapa aku ka indu mangah baka Miyah nya” Saut Berandah ngengai.

“Bula iya nya. Udah besai ila, kumbai dek enda bajik aku tu ila. Kapa aku malik ka dek nya ila. Ka kaya, enda meh guna aku” Ko tudah Miyah muji diri, mulai ka jaku Berandah.

“Bedau temu meh wai. Kada enda dek nya terunda deka ka aku”

“Nama tak inggar tu. Nama nya Miyah, nama utai bendar pelaya ka seduai” Ko Cikgu Tuni datai negah. “Nya gaya seduai, bedau mit udah ngaku ka pangan diri” Sambung cikgu nya tadi.

“Nya Cikgu, Berandah nya dulu ngelaya aku tadi.”

“Nama aku meda seduai bekuntik-kuntik pangan diri tadi deh, enda sebaka nya” Ko cikgu mansik seraya ka nundi.

“Amat Cikgu, Sebaka tua iya tadi, sama ragak.” Saut Berandah nyaut lalu marit Miyah.

“Patut seduai tu bisi skandal. Nya gaya seduai. Jari.. Ayan ka jari seduai” Ko Cikgu Tuni lalu malu seduai.

Udah bekau nya. Cherita seduai lalu dipenyadi sida sekelas, kumbai melaki bini. Sigi gaya tundi nembiak bedau chukup umur.

“Berandah laki Miyah.. Berandah laki Miyah” Ko munyi Jaku tundi sida sekelas, beduan seduai nya.

“Piii.. Enda malu ngambu urang” Ko Berandah dulu ngelaya maya bepansa.

“Kemaya kami tu ngambu dek nya bangka!!” saut Miyah ga enggai Alah.

Jaku tundi gagai bedau nembiak sigi nadai ngira, baik ka nya ngemedis, ngenyamai sigi enda peduli. Pama alah nyabak, lalu ka ngelaya. Nembiak ka lelaki pama agi, lalu tak mantai ka kuntau tempap lalat. Jaku tundi iya tu bini sanu, laki sanu, mina tundi ka nadai ngasi, laban umur empai ngelala bungai chinta.

5 TAHUN UDAH NYA.

Diatu sida Berandah belajar ba sekondari. Rangkar tubuh iya udah tegap sereta kering, murih ka apai iya, burak kulit ngambi ari indai. Ulah Berandah bisi berubah, enda baka bedau mit kelia, mina pemandai enda senimpak enggau penyigat tudah tuai.

“Selia, ni utai kirum indai aku ari ulu deh” Ko Berandah nanya Cecelia, pengudah ka betemu ba pintu penama sekula sida. Miyah dia meh, nisi Cecelia, bela bepegai ka kambut kerus ti ngundan Mee Sarimee, mee ka pemadu iya popular maya.

“Meda kami baru datai dek.. Lubah meh” Ko Cecelia nyaut petunggal iya nya. Indai Cecelia enggau Apai Berandah diri menyadi, sama serumah berimbai pintu nguan nanga Pusai, ti dipegai aki tuai rumah Uban.

“Balat dek ngerujak ka Mee ney Miyah.. Patut enggai kurus.. Uji bagi enggau aku mee dek nya” Ko Berandah endang bisi aja ajenda ka nundi Miyah. Diatu seduai nyau sebela, tang Miyah majak bajik ka agi, panjung nyau udah dara. Kuyu pepelu enggi Miyah nya singin Berandah ka nyubit, tubuh geduk burak enggi Miyah singin ka merekuh. Baka ni meh asai beperekuh enggau dara ngemajik Miyah tu, ko dalam ati Berandah din.

“Enda kira Berandah.. bisi aja ajenda ka nundi aku.. Nyah tu enggi dek.. legi kitai kumbai bam enda magi” Ko tudah Miyah nyua ka Berandah Mee sekambut. Nyau udah besai diatu, suah agi iya ngalah ka diri, enggai agi iya bekerakar enggau Berandah. Iya indu, manah agi iya nunda chara alus, enda manah belaya enggau urang laki, ko runding iya.

“Alah enda Miyah ka tunduk ka dek.. iya ka endar nundi anak dara urang.. Kapa magi iya Miyah..” Ko Cecelia.

“Nya baru manah, kitai ga anak tukey, patut magi kami urang merinsa..hehe” Ko Berandah nundi Miyah laban ka apai Miyah bisi ngedai ba rumah panjai, dini nya tukey munyi ka ditundi Berandah. Bejaku seraya ka nerima mee ari Miyah, jari enda chechamang murus jari Miyah. Miyah pan baka nya, ngaga diri enda ibuh.

“Anak tukey, anak tukey.. dini nya baru anak tukey.. apai dek mayuh lada.. anak tukey lada..haha” Ko tundi Miyah ga bai ati geledi geram meda penyigat bujang.

“Tu duit kirum indai dek. Nya kena melanja urang indu, kena meli arak meh, ko indai dek” Ko Cecelia nyindir adi tuai iya nya.

“Auk.. ngelanjur endar neh.. Udah nya mupuk aku.. Ka main bol kami tu legi.” Ko Berandah ninggal ka seduai dua nya, tetabun naban ka belanja ka dikirum ari menua.

Datai ba asrama sida Miyah.

“Wai selia, amat ka Berandah diatu bepangan enggau Corina” Ku Miyah nanya Cecelia maya seduai makai asi ka dibai seduai ari rumah panjai, lauk ikan baung enggau daun empasa.

“Nama deh, dini dek ninga berita nya”

“Enda nemu, bisi aku ninga sida empenai besebut ka”

“Jeles pia. Kan aku udah meri dipeluang ngelamatu.”

“kia ga iya. Sapa madah aku ka petunggal deh nya. Dini ulih begulai, enda meda tua iya belaya belama maya bepansa” Ko Miyah ngenggai ka tuduh Cecelia. Dalam ati, Miyah lama udah nyimpan pengerindu ngagai Berandah, mina Berandah aja enda nemu pengeran dalam dada, taja mayuh chara ditantai ka iya, tang sampai ka saritu, ati Berandah ka tebuka ka nerima iya.

“hemmm.. Bula dek nya wai.. Kumbai dek enda nemu aku rasia dek nya. Berapa taun tua udah bekaban, enda patut enda ngelala pangan.”

“Eeee.. Nemu-nemu ka muka rasia urang. Kapa aku ngiruh diri ka bepangan, enda alah tangkap cikgu, pechuma kumbai sida indai sida apai gatal ka belaki tumu.”

“Tang ati dek keran ka iya ney wai Miyah?.. saut saut. Tua aja nemu rasia dek.. enda ibuh berasia meh”

“Ka pan aku enti urang enggai, nadai meh guna” Saut belalai Miyah enggai enggau terang ngining petunggal kaban iya nya.

“huhu.. Kasih amat kaban aku tu ney..haha.. Udah putus seduai iya wai.. Enda lama aja seduai, cinta monyet aja bah.. senang ati dek wai” ko Cecelia ketawa beduan pangan kumang sekula sida nya.

“Amat kah?” ko saut Miyah gaga. Dalam ati, enggai iya ninga Berandah dempu urang, enti ulih chinta iya siku aja. Tang bakani meh chara iya ka madah ka diri rindu, iya pan temati kutu, takut dikumbai Berandah perasan.

Berita nya tadi bisi ngemai ati gaga ba pengidup Miyah. Enti suba maya bedau primary, tak Berandah nya meh urang pemadu dibenchi iya, sikunya meh ti kala ngasuh ai mata iya naya, ti selalu ngasuh ati iya telih bepedi. Tang makin lama, pemenchi nya nyau pulai ka pengerindu ba ati iya din. Puang asai enti nyema Berandah enda nanya iya maya ka bepansa, sari nadai mut (mood) enti nyema Berandah enda ibuh ka iya maya betemu. Kala sekali suba, Berandah kena spindit seminggu, seminggu nya meh pengidup iya asai ka enda betali. Mayuh ulah nyelai iya sekumbang ka mabuk pengerindu ditantai ka iya enggau ulah gaya.

“Miyah.. o Miyah.. Nulung aku auk.. Ngaga ka aku kerja rumah aku.. anu cikgu aku enti enda temu” Ku Berandah minta tulung siku nya, laban Berandah sigi nemu, Miyah sigi ka nulung iya.

“Ngaga ka diri empu meh.. Ngaga ka dek enda aku. Enti minta ajar baru aku ka ngajar.” Saut Miyah, laban ti ka begulai enggau Berandah. Nya meh peluang ka digiga iya. Taja iya nemu Berandah endang sengaja ngambi ulih enggau pementas iya, tang runding din enda kala limpang berasai ditepan.

“Emm ok meh..” Ko Berandah lalu ngenuduk ka diri semak Miyah dia. Bau rengut buk indu dara nya ngasuh Berandah ka berambi ulih betegu-tegu bepegai-pegai enggau Miyah.

“Bakatu, bakatu.. Kini ka perening dek” Ko Miyah meda siku nya enda mempesap mata meda iya. Ati Miyah sigi gaga digaga bujang dikerindu baka nya. Sejam dua jam sanggup meh iya nisi Berandah dia, panjung ka bujang dikerindu.

“Merening dek wai.. Bajik endar dek diatu neh.. enda agi manggah baka suba”

“Bajik!!.. enda meh tau kachau.. peda aja tau” Ko waning Miyah, sengaja ngasuh sikunya asa aja. Iya nemu Berandah sigi empai beramat-amat keran ka iya, mina ka bayam iya aja. Nganti meh iya udah nganyam tali pengerindu tegguh dalam ati Berandah, nya baru iya sedia nerima sikunya. Taja pan iya empu keran, tang meh iya empu enggai berumban, takut ka iya empu kena empa pengasa nyabak sesedan.

“hemm.. Nya meh aku meda aja..haha.. kayam tau ??..”

“Nama meh ngayam aku deh.. Ukai aku anak patung.. Nyaaa.. Baru dek nemu diatu.. Suba ka endar dekk ngemeli ka aku..” Ko saut Miyah tuchum geligit seraya ka nyindir siku nya, iya indu bisi rega, enda mudah dipanjuk Berandah sekali dua.

“Nya suba.. Diatu lain.. Kitai udah bujang dara.. Lain ga”

Enti maya makai, di anti-anti iya seretai enggau Berandah, kadang-kadang iya ngemai pinggai siku nya. Belajar malam pan, iya meseti semak enggau Berandah. Nyema endur sida Berandah ba dewan, iya pan kin ka, laban enggai enda meda sulu ati. Nadai pen enggau buku siku nya, beri iya.

“Miyah.. Nginjau pen dek.. enda ingat ngemai aku tadi”

“Ba dek buruk, nya anang pajuh bejegau nguntik indu, pen enda ga alah bai.. Nya tu.. empu dek tau meh.. Anang muai pen beri aku.. pama dek ngena pen tu, ingat ka meh aku.. Belajar anang tak sesegau” Ko Miyah nyeriri Berandah, laban ati iya din ka jejeles meda berandah betundi enggau indu bukai.

“Auk bos.. Nya baru kaban”

“Kaban!!!.. kapa aku bekaban enggau dek nya” ko Miyah, enggai iya nerima kaul kaban antara seduai, enti majak ka kaban, kemaya ni meh iya nulih nukar nya nyadi pengerindu.

“Auk..ga.. Nyadi sulu aku ka..” Ko Berandah ngayah..

“Kapa aku nya.. enti nya main-main.. Nemu aku dek nya lelaki pemudi..”

Kadang-kadang Miyah ngemula ka Berandah ngumbai diri enda ibuh, taja nya ukai dikedeka iya ngelamatu. Suah iya ngarap ka ila lusa Berandah tau sedar penuchi pengerindu dalam ati iya din. Taja pan Berandah udu ngambi ulih ba pemanah iya, tang semuanya dibalas Miyah enggau penelap ati, nadai sekali dalam ati iya din deka malas enggau pemedis. Mayuh iya udah bekuban, nanam mudal ba siku nya, nyentuk ka sanggup ngelalai ka penyalah Berandah.

“Wai Berandah, nama dek mabuk pulai ari pasar” Tanya Miyah belalai maya ka ngaga spucik ba get pintu sekula.

“Enda aku mabuk deh..”

“Bula dek nya, aku ripot ngagai pengetua nama dek, enti dek majak bakatu”

“Shiii.. Anang ragak wai Miyah.. Ari suba dek nyadi pengawas, enda nemu nadai ngachau aku.. diatu pom 5 kitai agi ka dek kiruh ka aku..”

“Ka enda kiruh.. aku enggai ka dek salah jalai pengidup.. Enda ulih aku ngelalai ka penyalah dek belama, pemuas ila temu urang meh..”

Ka pan enggai mayuh penyalah Berandah disimpan iya, enda diriput iya ketegal penyayau iya. Tang sikunya aja enda nemu berubah.

Amat pan macham ulah, Berandah bisi sedar mimit ka belajar laban diiring Miyah enggau Cecelia. Kaban bukai Berandah tak datai peresa ngapa, chukup jam pansut. Bisi maya Berandah berunding, pedis amat pengidup iya enti nadai Miyah, laban semua utai Miyah magang ngadu ka iya. Nyentuk ka gari iya pan, Miyah enggau Cecelia masu, nadai utai iya minta ari seduai dua nya.

PERESA SPM UDAH DATAI. Pengabis peresa nya, nya meh paling dikenakut ka Miyah, laban sampai ka saritu, iya agi empai ulih tepedah ka diri bisi nyimpan pengerindu. Tambah mega apai Miyah empu pindah ngajar ngagai menua kuching. Nya ti misah ka iya enggau bala kaban iya, lebih-lebih agi Berandah ka lalu nadai meri jaku selamat tinggal, tauka meri iya pengarap. Pengarap ti tau numbuh ka pengerindu seduai.

“Wai Miyah, seretai sapa dek pulai legi. Enda nyeretai tua Berandah dek legi” Ko tanya Cecelia, maya seduai ka dedunga duduk ba luar pintu get sekula, seraya ka nganti Berandah.

“Enda ulih aku wai. Apai aku bisi ngambi aku legi”

“Gahh.. haha. Enda terkenyit seduai.. nama utai kerandau ka seduai.. meseti berandau ka urang laki nya..” Ko tegah Berandah, datai nyubuk ari belakang, maya ari ke penudi sida ba suka sekondari.

 “Itu.. anang.. ka enda beduan urang. Jelu !!” Ko Cecelia.

“Nama gamal dek tak meredu baka jugam ka nyabak Miyah??”

“Pey.. Nadai deh..” saut Miyah ngemula. Dalam ati iya tusah bendar, laban ka nemu rita apai iya ngemai sida mindah lalu pulai ngagai asal sida ba kuching dedin. Enti udah beserara bakatu, kada meh agi ulih betemu baru.

“Amat nya wai.. Baka ka bisi masalah aja dek tu” ko Cecelia nampung ngamat ka jaku Berandah.

“Emm.. Kami pindah pulai ka kuching baru wai Selia, emm wai Berandah. Ati ku tusah ninggal ka kita.” Ko Miyah nusoi utai ka bemain ba runding enggau ati iya din.

“Apuu.. Lapa ngenyit amat kita pindah kin deh” Ko selia

“Enda deh.. mina aku aja enda kala nusi ka seduai” Ko Miyah meriar ai mata.

“Nadai ngawa nya wai, mesa ga kuching nya, dudi ari betemu meh kitai” Ko Cecelia, lalu merap siku nya.

“Auk.. tapi aku agi tusah” Ko Miyah, seraya ka merening Berandah, engka ngarap ka jaku seleka dua, ti mai pengaga ati.

“Nyabak meh seduai urang ka meda. Drama endar seduai tu” Ko Berandah bejaku enggau jaku ngaga diri enda ibuh. Enda patut ga iya ka enggau merap seduai nya, tauka minta anang ninggal ka iya, laban ukai seduai iya bisi kaul, indah ka chinta pan nadai.

“Emm.. Wai Berandah. Nadai utai beri ka aku?? Aku dah ka pindah, enda patut nadai hadiah ka, jaku baibai ka. Enda patut, mayuh amat aku dah nulung dek ngelamatu” Ko Miyah nanya, ngarap ngapa.

“Emm.. Nama neh.. tu meh.. marik aku tu..nyahh..Simpan Manah.” Ko Berandah nyuaka marik regang ngagai siku nya. “Auk selamat beserara meh. Terima kasih laban udah mantu aku ngelamatu. Bebai wai dara bajik” Ko Berandah ngulur ka jari mai betabi. Seraya ka betabi, jari Miyah lalu getir iya.

“Akai ar.. nyentuk ka beserara agi meh dek beduan aku” Ko Miyah

“Jera nyamai..haha geram amai aku meda dek nya..” ko Berandah.

“Geram pan anang meh ngetir balat. Nya aku malas” Ko Miyah ngetir perut siku nya ga.

Cecelia ba tisi enda memunyi ngemata ka ulah petunggal iya nya, sengaja meri awak ngagai seduai nya begulai. Pengudah nya, sida bela beserara. Miyah lalu dibai sida sebilik pulai ka kuching, Berandah enggau Cecelia pulai ka rumah panjai sida. Seminggu udah nya, Berandah dikanggau ka enggau PLKN. Miyah sekali dua ngirum ka surat, tang surat sebulan baru bisi balas ari Cecelia.

9 TAHUN UDAHNYA.

SAMBUNG DITU – KLIK

Lirik lagu Iban – Chermin bula


Ngipak endar ga tusun lekalagu tu..nya meh engkah iya kitu..

Kasih ga tudah aku tu bakih
Ngiga sulu lalu enda bulih
Mina ngining nuan aku tu kaban
Liur aja meh ke telan
enda baka nuan bakih lantang amat bulih
nyau ka tiap ari beganti

bula amat meh chermin
maya betinjau baka ka pama
dini ati tudah diri enda ransing
enda dikemuning indu dara
laban sida meda aku nadai kerja
nadai kerja ti menyana

Ngumba amat sida ka indu
meda diri empu ka bajik
baka aku kapa sida malik
ukai lelaki kerja ka tasik
indu dara kemaya ari
enggai jadi enggau laki penyanyi
Nangi-nangi ati balat nangi
laban enggai bekunsi laki

anang ngumba kita ka indu
taja tuai agi meh nganu
nganti buk aku dichat biru
kita meda bula enda saru
bula enggai malik
malik ngagai aku
baka kerani mayar pupu

Ensera Kelulu APAI SALI NAMPAL TANAH MEREKAH


Aku ukai bempu jerita tu. Reti nya aku ukai nulis nengkebang jerita tu. Jerita tu endang diempu penulis asal

Laban menua rambau kelia menya enda baka kitai kemaia hari tu, lalu nadai maioh kedai alai bejual bebeli ke semua rengka ti di kena kitai ngidup kediri besari sari. Tang bala sida ke indu endang udah nemu chara kena ngintu pengerai diri empu baik ba rengka bilik, pemakai enggau pemeresi tubuh diri empu.

Nyadi enda mukai mukai hari siti dia tudah Enchelegit bini Apai Sali lalu nemu diri datai kain tang malu madah kediri datai kain ngagai Apai Sali lalu iya pan nemu diri nadai agi gari kain kena iya nampal pukak. Iya pan lalu berunding kati ko chara iya ngasoh Apai Sali nurun ngagai menua orang Panggau Libau ambi ke minta gari kain kena iya nyaga pemeresi diri nya tadi.

“Alai Apai Duat nuan mupok ngagai menua sida Keling di Panggau Libau, minta gari kain ngagai sida serumah. Padah ke gari kain nya ka di kena nampal tanah merekah.” Pia ko Enchelegit. “Au meh. Nganti aku tu udah badu makai lagi. Perut tu tak agi berasai lapar bender bekau ti turun ngabas taut tadi.” Pia ko saut Apai Sali.

Udah meh iya tembu makai dia iya lalu bekemas mai selabit siti laban ti ka nurun ngagai menua sida Keling di Panggau Libau, ari asoh bini iya Enchelegit ka minta gari kain di kena nampal tanah merekah. Bejalai keno ko iya berengkah ari pagi nyentok ke tengah hari nya baru iya datai ba pendai menua orang Panggau Libau Lendat Di Biau Takang Isang. Datai iya ba pendai sida Keling, dia iya meda indu dara siko ti naka iya pemajik ke benong mandi ba pendai nya. Ukai mudah ga pemanjai rumah sida Keling, ni enda maioh ga indu ke bajik dia.

Nyau leboh Apai Sali semak indu ke baru ka pulai mandi nya tadi dia Apai Sali lalu nyapa. “Oh wai. Pama ga enti nuan ngasoh aku nulong nuan mai genok nya pulai ke rumah kita kin.” ko iya. Nama agi deh tak naka iya tekenyit indu dara nya ninga iya nyapa leboh ti baru ayan ba pendai sida. Indu dara tu tadi naka iya penakut laban ti nyangka Apai Sali tu penyamun laban ti enda kala meda serta ngelala iya. Indu tu pan lalu rari enda beapai, enda beindai ka iya.

Tang sebedau iya ngelari kediri sempat ga indu dara nya nyaut iya enggau ati ti ringat. “Eh ! Gamal ke baka engkeratong nya nemu ka nundi kitai. Moa nyau pera pera baka moa kera.” ko indu dara nya nganu iya. Apai Sali pan lalu beguai ga nyaut, “Esss! Begah begah bender ga indu dara tu, iya bedau nemu sapa aku. Sebeginda Bujang tu enti nuan lalu bedau nemu.” pia ko iya.

Naka ka pemalu tudah Apai Sali di tempia ke indu dara orang Panggau Libau nya munyi nya tadi. Apai Sali lalu ngeludah ari belakang, “Poi !” ko iya. “Gamal bangkai utai baroh hari tu nemu ka ngaga aku munyi nya nganu kitai,” Indu dara nya pan lalu nyau ga pulai munyi ko ensera tadi. Udah nya baru Apai Sali ga mandi kediri ba pendai sida Keling. Udah tembu mandi dia Apai Sali lalu niki ngagai rumah sida Keling.

Sekumbang iya ti bejalai niti tempuan rumah orang Panggau Libau dia bala orang ke bisi meda iya niki lalu berebut ngelalu ke iya lalu ngasoh iya duduk. Tang iya enggai nudok kediri ngapa enti iya bedau datai ba ruai sida Keling, laban iya ti endang udah teleba enggau sida Keling serumah. Leboh iya nyau datai ba ruai sida Keling, dia Keling lalu meda iya serta ngelalu ke iya.

“Dudok Aya,” pia ko Keling. “Enda iboh di asoh pan endang ka dudok ba ruai nuan meh aku Igat,” ko Apai Sali. Nama agi deh bala orang Panggau Libau lalu beguai nungga Apai Sali laban iya ti lama udah enda nemuai ngabas menua sida nya lalu ka nemu berita sida iya menyanak. Nyau kepuas udah berandau dia baru Keling nanya ka pejalai iya meda iya jarang nemuai.

“Nama pejalai nuan deh Aya meda nuan tak jarang bendar ngundang kami kitu ?” ko Keling. “Eh tak malu bendar ga aku madah ke pejalai diri tu Igat tang ga laban ke enda tau enda ari asoh Indai Sali pagi tadi. Asoh iya nemuai ngagai kita kitu minta gari kain ka kena nampal tanah merekah.” pia ko saut Apai Sali. Orang ke nungga iya dia lalu nanya iya baru, “Kati ko nya Aya , amat beguna ka gari kain ke dipinta nuan tu,” pia ko sida dia nentu ka ngagai Apai Sali. “Amat nya deh , amat gari kain ka kena nampal tanah merekah ko Enchelegit enti kita bisi tau meri aku.” pia ko iya ga nyaut baru.

Nama agi deh Apai Sali, lalu berebut orang Panggau Libau meri iya gari kain. Ka diberi orang kain ke manah , enggai ga iya laban ukai nya ke di asoh Enchelegit laban iya nemu sayau ke kain orang nya. Nyau udah penuh selabit Apai Sali laban pemaioh gari kain ke di beri orang Panggau Libau sekayu kayu rumah, iya pan lalu madah kediri ka mupok ga mulai kediri enggai ke hari nyau majak jauh lemai.

Iya meh bedau jauh udah ngejang ke rumah sida Keling, dia Apai Sali pan lalu belaboh ga betampal ke tanah merekah ke bisi di peda iya sepemanjai jalai nya ngena gari kain. Iya meh nyau kepuas serta sepenyauh iya ke udah Apai Sali betampal ke tanah merekah nya ngena gari kain sepanjai jalai, iya pan nyau datai ga ba pala tangga rumah sida empu. Datai iya ba pala tangga, tanah merekah pan tembu ga di tampal iya tang semua gari kain ke di bai iya ngena selabit nya pan abis maggang.

Sereta Apai Sali nya tadi niki pala tangga, dia bini iya Enchelegit lalu beguai nanya meda selabit ke di bai iya nurun nya tak puang di bai iya pulai. “Ni gari kain ke asoh aku pinta nuan deh Apai Duat?” ko iya. “Esss ! Dini nya ka bisi agi, ga udah abis di kena aku nampal tanah merekah sepemanjai jalai aku pulai kitu tadi. Ninga nuan ke ngasoh aku nampal tanah merekah nya ngena gari kain ke di beri sida Keling serumah.” ko saut Apai Sali.

“Keba nuan tu tambap,” ko Enchelegit nganu iya. Apai Sali lalu ringat laban iya ke naka iya pengelelak kin kitu di asoh Enchelegit lalu beguai iya nyaut, “Nuan ke tambap. Aku nama penambap. Minta gari kain ka kena nampal tanah merekah ko nuan. Nya alai tanah merekah ga di tampal aku ngena gari kain nya.”

Enchelegit seduai Apai Sali pan lalu belaya ketegal gari kain ke udah di beri orang Panggau Libau nya udah abis kena iya nampal tanak merekah. Enchelegit pan lalu bejako, “Ukai utai enggau begulai orang baka nuan tu ! Sarak tua !” pia ko iya. “Enti sarak ko nuan Indai Duat, nya sarak meh tua. Aku nadai maioh jako, enda aku tu tak ngenyadi ke nuan ke bini,” ko Apai Sali nimbal. “Sarak meh tua,” pia ko Enchelegit ga majak mai sarak laban ringat ke semua gari kain nadai di kena iya maia ti datai kain nya.

“Au, sarak meh. Nuan di bilik. Aku di ruai. Semua keresa di bilik di empu nuan tang semua keresa ke di ruai di empu kami duai Sali maggang,” pia ko atur Apai Sali magi reta seduai iya Enchelegit. Enchelegit seduai Apai Sali pan lalu besemaia sarak melaki bini. Siko tindok di ruai lalu siko tindok di bilik. Iya meh hari nyau udah jauh malam, kejang orang maioh nyau ka tindok maggang dia Apai Sali lalu bejara di ruai merindang diri laban mata ti bedau ka tindok laban ti bedau nyamai ati.

Nyadi baka tu ko munyi jara Apai Sali ke di dinga orang malam nya :

“Sembang ke enda jayong,
Sembang ke enda jayong,
Lapa partong Jawai tak nyerungkong,
Kena rundung singgai pulai,
Aih lah Jawai, Wai,”

Leboh Apai Sali ke bejara di ruai dia Enchelegit pan baka iya ga sama lalu bedau ka tindok. Indai Sali pan lalu bejako ninga bejara Apai Sali nya tak lain munyi. “Eh, bisi bendar utai di temu Apai Duat sehari tu tadi,” pia ko iya.
Apai Sali lalu nyaut, “Nama enda utai ke di temu kami, kami ga mindah tadi. Kami ga bujang baru,” pia ko iya nimbal bini iya ba petang. Apai Sali pan lalu nampong leka bejara iya nya tadi munyi tu nganti mata iya ti ka tindok :

“Sium lah tachak,
Upa kimbit pakau kara,
Perasa aya pungga meda,
Ka nyium lah enggai ga nuan wai,”

Nyau kepuas Enchelegit ninga Apai Sali bejara di ruai ba petang, dia Enchelegit lalu mai Apai Sali jadi baru. Nyah ! Lapa deh ! Kumbai iya mudah anak lelaki siko tu. Apin nya ! Baru ninga aku bejara iya lalu udah ka mai aku jadi baru,” ko iya. Enchelegit seduai Apai Sali pan lalu jadi baru ga malam nya lalu semina sarak selemai aja ketegal ti belaya ke gari kain kena nampal tanah merekah.

 

 

 

Ensera kelulu iban Apai Saloi Nurun Nyumpit


Aku ukai bempu jerita tu. Reti nya aku ukai nulis nengkebang jerita tu. Jerita tu endang diempu penulis asal.

Nyau udah setengah tahun udah bekau Apai Sali ke di asoh bini iya Enchelegit ngagai menua sida Keling di Panggau Libau minta gari kain kena Indai Sali nampal tanah merekah dia iya pan lalu berunding ka ngiga lauk laban iya tetengok ka makai burong. Apai Sali pan lalu ngangau ke bini iya Enchelegit.

“Oh Indai Duat ! Uji nuan nungkus ke aku asi, semakau, garam enggau machis. Tetenguk bendar aku tu ka makai burong. Ka nyumpit ngagai pun kara ke ba antara umai kitai enggau umai sida Keling laban hari nya leboh aku ke pulai ngabas panjok meda burong tak maioh bendar makai buah kara nya.” pia ko iya bejako ngagai Enchelegit.

Udah meh tembu Indai Sali nungkus bekal ke tudah Apai Sali, dia Apai Sali pan lalu mupok bekejang nurun nyumpit munyi ko iya nya tadi. Tang Apai Sali tu tak ke bukai ke pejalai iya nurun nyumpit nya, enda ngagai antara umai sida iya Keling munyi ko iya tadi. Iya lalu nyemerai sungai siti sampai ke datai di seberai nyin lalu bejalai baru ga iya. Nama tetemu ke sungai baru lalu nyemerai baru ga iya sungai nya sampai ke datai ba seberai nyin. Lalu uyut ke di ema iya nya endang enda di leka ka iya ari belakang.

Apai Sali pan nyau enda ingat ke bekal diri abis basah bai iya nyemerai sungai di serantu jalai nya tadi. Iya meh kira nyau tengah hari, iya lalu ngetu ba tuchong bukit siti. Sereta iya ngetu, iya lalu ka nginsap laban ti lelak serta chelap bai iya nyemerai sungai. Tang leboh iya ngambi sarang insap iya ari uyut ke di ema iya nya tadi peda iya semua insap iya enggau semakau nyau abis basah. Apai Sali pan lalu muchau bejako kediri meda semua bekal ke di bai iya nya abis basah maggang.

“Ka ngumbai hari bisi ujan nadai ga ujan tadi. Ka ngumbai diri empu laboh ke ai nadai ga laboh ke ai tadi. Nama antu ke ngajih ka semua bekal aku tu tak abis basah. Deka nunu burong lagi nadai ga machis. Nyah parai meh nyawa nama asai tu,” ko iya kutap kutap bejako nudok kediri ba pun kayu.

Badu meh Apai Sali ke kutap kutap muchau munyi nya dia hari pan enda mukai mukai lalu ujan serta kudi naka iya pemalat. Meda hari ujan bengat ngemalat nya, dia iya lalu berunding ka mulai kediri ka rumah. Tang leka ujan tak naka iya pemalat nadai nemu nyebut lalu jalai pan nyau repa enda olih di peda iya agi. Iya lalu merening jalai, makin iya merening makin nyelai agi ga gaya jalai nya di peda iya. Udah nya baru Apai Sali nyau nemu diri empu udah tesat lalu nadai nemu jalai pulai ke rumah.

“Akai Indai, Akai Apai ! Enda kala umor di keduan antu baka tu. Perut ga nyau geriok lapar, agi ga nyau getar getar chelap laban ujan. Iya ga tesat enda nemu jalai pulai agi. Kasih meh tudah bini anak aku tu nganti aku pulai ngapa di rumah din enti aku tu tak parai tesat enda tepulai kediri,” ko iya bejako kediri, berandau nengali.

Iya meh hari kudi enggau ujan udah tedoh dia Apai Sali lalu mupok bejalai baru ka mulai kediri enggai ke hari nyau majak lemai selemai. Nyadi iya ke mulai ke diri nya bepandu nitih ke tunga tuju ulu duku ke di tangkin iya ba punggong iya nya tadi serta enggau tunga pala patong iya leboh ke nyingkang ba serantu jalai. Laban ulu duku enggau pala patong iya nya nemu madah ke tunga tuju jalai mulai kediri pia ko runding tudah Apai Sali

Nyau ka majak petang sepetang hari, kira nyau maia silau manok, dia Apai Sali lalu bisi ninga orang nyau tachoh balat bender. Sereta ninga nya iya pan lalu bejalai beguai guai nuju ngagai tunga orang ke di dinga iya nya tadi laban iya ke nyau lepi laban ti kelalu balat lapar serta chelap laban ujan sekumbang hari ti kudi.

Datai iya ba kaki tangga rumah orang nya dia Apai Sali lalu ngangau nyanya ke penyadi rumah orang nya.
“Oi Unggal ! Nyadi rumah kita tu ?” ko iya nganggau.
“Oh nyadi. Lalu niki meh Aya Apai Sali, niki meh nuan !” ko orang nya nyaut iya.
“Apo ! Iga ga orang ba rumah tu tak ngelala nama aku. Kada enda rumah antu, rumah jelu tu,” pia ko iya bejako kediri.

Apai Sali pan lalu enda chamang chamang niki rumah orang nya. Orang ba rumah nya pan nyau berebut ngasoh iya dudok, tang iya enggai nudok kediri ngapa laban iya ke nyau getar getar chelap laban ujan. Iya pan lalu beguai guai bejalai nuju ruai apai tuai orang siko ke benong bekindu ngimbai bedilang ba ruai.

“Dudok Apai Sali, dudok. Ditu kitai berandau,” pia ko orang bukai ke di pansa iya nya tadi.
“Eh, enda aku dudok enggau kita ditu. Nyin din aku dudok lagi. Ngagai ruai apai tuai orang ke benong bekindu nyin,” pia ko iya nyaut orang ke nyapa iya.

Datai semak bedilang ba ruai apai tuai orang nya, iya lalu nudok kediri bekindu lalu berandau enggau apai tuai orang nya. Apai tuai orang ke enggau iya berandau nya tuai bendar nyau burak repok uban bulu pala iya. Leboh ke bekindu nya Apai Sali sigi enda malu lalu bejako enggau apai tuai orang nya minta diri di perapi ke orang laban perut iya bengat udah kelalu balat lapar bendar. Orang ke indu lalu tama ka bilik, lalu beguai guai ga berapi kasih ninga iya ti ngumbai diri lapar serta lepi. Nama agi deh gamal tudah Apai Sali nyau digak digak chelap bekindu ba ruai nungga bedilang ngimbai apai tuai orang nya tadi. Dia iya lalu bejako ko iya.

“Akai rai Aya. panjai umor asai tu. Udu meh penyamai bekindu baka tu. Isi nyau asai batang pisang, kaki nyau lupis pa penyelap. Tapa jari enggau tapa kaki nyau ngeriut lalu kukut pan puda. Pending nyau baka pending chit keno ko asai. Perut nyau sembong laban angin laban ke lapar serta lepi.” pia ko iya ngerandau apai tuai orang nya.

Tak sereta ninga Apai Sali ke nyebut pending iya nyau baka pending chit, dia deh orang serumah rumah nya lalu bebali nyadi chit maggang maggang. Rumah sida pan nyau nadai agi di peda iya tak lalu lesap sekijap mata. Dia tuai chit nya lalu bejako enggau Apai Sali.

“Nuan nyau besema ke pending chit. Kami tu meh peturun bunsu chit,” pia ko jako tuai chit ke dudok ngimbai iya bekindu ba ruai nya tadi.
Nyadi rumah ke di tiki Apai Sali nya tadi, iya ke bendar sigi rumah peturun bansa sida chit. Tudah Apai Sali pan nyau majak lapar selapar lalu perut iya pan nyau begeriok inggar agi, laban ti sehari enda makai lalu agi ga nat ke chelap laban ujan. Iya lalu bejako muchau nganu mulut diri empu ke chebul barang utai sebut ngagai tuai chit nya tadi.

“Dek tu mulut bengat maioh macham utai di sebut. Makin perut tu lapar, hari nyau majak malam, agi ga nuan nyebut pending chit,” ko iya lalu enda berasai jari iya ngetil mulut diri empu.
“Akai ! Pedis bendar ga mulut tu di getil aku tadi,” pia ko iya ga bejako kediri.

Mupok Apai Sali ngejang ke rumah peturun bunsu chit lalu bejalai besagam betenggau ke penerang bulan nitih ke tungga tuju ulu duku enggau pala patong iya ke nyingkang nya tadi. Enda lama udah iya ke bejalai, iya lalu bisi meda kenaya api rumah orang. Iya pan lalu berumban bejalai ka napat ke rumah orang nya. Datai iya ba kaki tangga lalu ngangau, “Oi Unggal ! Unggal nyadi rumah kita ditu !,” pia ko iya ngangau.

“Nyadi ! Niki meh nuan Aya Apai Sali! Niki meh!,” pia ko orang nyaut iya ari rumah nya.
“Apo! Aku enda kala meda orang ba rumah tu, kati ko orang ditu tak nemu ngelala aku. Dek mulut badu agi maioh utai sebut ba rumah orang lagi. Anang beli beli!” pia ko Apai Sali bejako kediri.

Apai Sali pan lalu niki. Bejalai iya betiti ke ruai ba rumah orang nya endang lalu nuju ruai apai tuai orang siko ke benong bekindu nungga bedilang ba tengah rumah. Orang bukai pan nyapa iya ngasoh dudok ba ruai sida ke bukai.

“Dudok Aya! Dudok!” ko orang ngasoh iya ngetu ba ruai sida.
“Enggai aku dudok sengapa, din aku dudok lagi ba ruai apai tuai orang ke benong bekindu nyin,” pia ko iya nyaut tanya sida.

Datai Apai Sali ba ruai apai tuai orang nya iya lalu nudok kediri. Tuboh iya nyau getar getar, getak getak laban udah kelalu balat chelap bekau iya ke ngelaban ujan sehari nya. Leboh iya ke bekindu ngimbai apai tuai orang nya, dia deh orang ke nungga iya lalu nanya iya.

“Udah makai nuan Apai Sali?” ko orang nya.
“Eh, bedau lalu enda nemu seleka asi aku tu sehari hari tu. Anang ke agi makai asi, deh leka asi aku tu lalu bedau meda. Ka makai enggai ga nyadi laban asi ke bekal nyau abis basah, ka menyadi ke api pan machis nyau basah ga dalam uyut ke di ema, semua utai abis basah maggang maggang. Ngumbai diri laboh ke ai nadai ga aku tadi. Semina aku ke nyemerai sungai ba serantu jalai tadi,” ko Apai Sali becherita ke pemerinsa diri sehari hari nya ngagai orang ke nungga iya dia.

“Dini enda semua bekal nuan Apai Sali nyau abis basah maggang maggang enti nuan nyau nyemerai sungai,” ko orang ke nungga iya nya nyaut.
“Oh! Pia deh Unggal. Enda meh aku tu nemu tadi” pia deh ko Apai Sali.

Orang ke indu pan lalu mupok ga berapi nanggar ke asi ke iya. Iya meh asi nyau ka mansau di bilik din, Apai Sali pan lalu bejako baru laban gaga ati nyepi diri nyau udah badu agi chelap.

“Akai rai Unggal! Tu baru nemu seput diri empu idup. Tadi nyau asai ke ka parai. Mata nyau chipit, mulut nyau bgeriut, pending nyau mit lalu betis nyau lupis baka betis pelandok,” ko Apai Sali.

Ninga iya nyebut betis diri lupis baka betis pelandok, dia semua orang ke di peda Apai Sali dalam rumah nya lalu bebali maggang maggang mali diri nyadi pelandok. Orang ke dia pan naka iya pemedis ati ngagai iya ninga iya besema ke betis diri lupis baka betis pelandok.

“Nuan nemu besema ka kami. Kami tu meh bansa bunsu pelandok. Lapa nuan besema ka kami pelandok,” ko orang nya nganu Apai Sali. Pelandok lalu nungas ka idong serta lalu rari maggang maggang ninggal ke Apai Sali kediri diri dalam petang nat ke perut lapar.

Tudah Apai Sali lalu mupok ga bejalai baru lalu bejako nganu mulut diri ke sebarang utai sebut ngagai bansa bunsu pelandok serta enggau sabak sabak dalam petang.

“Nuan mulut tak naka iya pemeli. Badu agi nuan maioh utai sebut baka nya tadi ila.” ko iya ngeransi. Iya lalu malu mulut iya nya enggau ulu duku, “Akai ! Pedis amat ga mulut aku tu,” ko iya. Sereta iya udah badu muchau ngeransi diri, iya lalu mupok baru angkat ari menua bunsu pelandok. Bejalai meh keno ko iya nya tadi nitih ke tungga tuju ulu duku enggau tungga pala patong iya ke nyingkang ba serantu jalai.

Laban ke nadai makai sehari hari nya dia Apai Sali nyau lapar bendar lalu hari pan nyau ka teberingkas tawas. Pejalai iya pan nyau lubah selubah laban perut iya nyau udu lapar.
Bedau lama udah iya bejalai dia iya lalu tepeda ka api rumah orang ba bukit siti enda jauh ari endor iya ke bediri. Datai iya ba rumah orang nya dia iya enda nanya agi tang tak lalu niki tama ke dalam rumah orang nya.

“Dudok Apai Sali!” ko orang nya nganu iya.
“Apo! Tentu tu ukai rumah Iban tauka anak mensia. Salah tu. Ditu aku dudok enggau ini ditu,” pia ko runding iya. Iya lalu nudok kediri semak indai tuai orang nya. Dia Apai Sali meda gaya bansa orang nya nyelai bender. Tuboh sida tak chelum maggang lalu begalau ka kukut panjai bendar. Indai tuai orang nya lalu nanya iya.

“Udah makai nuan Dom?”
“Bedau Ibu, sigi lalu bedau makai sehari tu laban ke nyau tesat bejalai. Ngenah ke aku makai enggau jampat meh nuan dia. Lapar bendar perut aku tu Ibu,” pia ko iya.
Udah nya indai tuai tadi lalu mansang tama ke bilik lalu ka ngenah ka Apai Sali Makai. Udah nya pintu lalu tetukang.

“Makai Dom, udah aku tembu ngenah ke nuan di bilik din,” ko indai tuai nya madah ka iya.
Tama meh tudah Apai Sali ke bilik dia iya tekenyit bendar ati meda gaya utai di empa ke di enah ke indai tuai orang nya. Nyadi asi ko jako nya tak buah berangan, lalu lauk ke ka asoh di empa dia tak sampok ngerang.

“Apo!’ ko Apai Sali.
“Nama asi tu tak lain amat. Tu asi ko kita. Enti enda salah peda aku tu tak buah berangan. Tu ke lauk ko kita. Lalu peda aku enti enda salah tak indu sampok ngerang. Enda aku nemu enggau kita makai semua utai tu,” ko iya madah ngagai indai tuai orang nya.

Sereta ninga Apai Sali madah kediri enda nemu makai buah berangan enggau sampok ngerang nya, dia deh indai tuai orang nya tadi lalu manjong.
“Wap! Wap! Wap-ap-ap! Kami tu meh ke di kumbai bunsu jugam. Kati ko kami enda makai nya deh. Nya ga sigi pemakai kami bansa jugam,” ko indai tuai orang nya. Apai Sali lalu takut bendar meda indai tuai orang nya tak ringat bendar sereta ngeransi.

“Anang! A…A…anang mu…mu….munoh aku bunsu jugam,” ko iya. Apai Sali lalu beguai guai mansut ke diri rari ke ruai. Datai iya di ruai dia iya meda semua orang serumah nya lalu bebali maggang maggang nyadi jugam. Iya lalu terjun muai diri ari tanju laban kelalu takut sereta rari ke jugam.

“Parai apai, parai indai! Perut ga lapar, lalu ga enda makai sehari hari tu,” pia ko iya bejako kediri nengali. Apai Sali lalu mupok bejalai baru. Leboh ke bejalai nya iya nyau nadai daya agi tak sebarang utai empa. Mansa daun, daun lalu di empa, mansa upa, lalu diupa sereta di empa mata. Nyau ngalih hari nya baru iya rembus ba pendai sida iya empu baru iya nemu diri empu idup laban ke tesat nurun nyumpit.

 

 

 

Cherpen Iban Bambu Isan


Cherpen Iban  

Pengerindu Bambu Isan

Ujan lemai enggai badu-badu. Nitar kudi enda ga pansut baka ngilah ensana. Mua ari agi mambam tunga kulu kin. Puput ribut agi liut maut nyepu penyelap isi kulit lembut anak mensia. Palik ka ai, ai sungai mansang besai, deras ngerarat ka diri. Duan kayu enggau batang nyau berapat-apat anyut benung ai. Buah ensurai nyau bekesepar labuh disepu ribut. Daun kayu kekepai nitih ka tiup ribut. Pun engkabang seberai rumah panjai sida Nana beguyang liut lundai ngelembai merindang babas tanda menua agi kampung empai kusi jamah lipan. Pun rian aki dadun seberai beketepak buah labuh, enda diambi, ambi pan nadai guna enda alah empa. Kadang-kadang bisi ga peda bala sida apai emah, apai ngeriut enggau aki frenky nimba perau, nangi ka karam. Pengujan nya mega ngemai rita ti enda manah ba sida Nana sebilik, belaya lemai pengudah ka Nana datai pukul 3 lemai tadi.

“Nama utai ko dek tadi mang” ko indai Nana merak anak siku iya nya. Duduk nyau ensugau, ninga rita ngenyit dibai anak dara iya nya. Enda iya nyadang endu nya bisi runding ka bakanya.

“Aku ka kawin, ka niri ka rumah tangga” saut Nana merani ka diri, nyada ka utai dalam ati iya din. Apai iya enda memunyi duduk meda astro ba tisi, bekena ka baju panjai lengan cap Petra, baju kabarol kerja ke laut iya suba, duduk ba bangku kayu.

“Kawin !!…Umur baru berapa aja dah ka kawin..Nama nyau gatal pia, nya meh aku enda ngasuh dek gawa ba kedai gari ba sibu suba. Enda apai dek nya ka ngasuh..” mata ngelintu nyeling ngagai laki iya.

“Nama enda tau pia.. Umur udah ga chukup.. ukai nya dek ka belaki.. “ ko Nana majak ngelaban indai iya. Dalam ati iya din, enda ngasuh pan indai enggau apai iya, jadi meh iya enggau sulu ati iya, bujang menua sibu, Justin.

“Ukai enda tau, tang empai maya. Enti dek bangat ka, ila tua apai dek ngiga ka dek laki. Aku enda pechaya ka laki dipilih dek nya. Lebih-lebih agi laki temu dek sengapa sebelah pasar sibu.”

“Nama sida linda bahagia meh, sida kawin enggau laki ba sibu meh. Nadai mayuh macham. Bisi anak dua ulih ngelun kereta”

“Apu dek tu anak bangat enda ninga jaku. Alai meh dek jadi enggau laki dipilih dek nya. Tang aku madah ka dek, aku sigi enda nerima seduai diau ditu. Nguai ka urang dek. Maya kawin dek enda ibuh padah kan gagai aku. Enti dek mending ka jaku, badu dek gila enggau laki nya. Padah ka aku sapa lelaki ka bangat nyayau dek”

“Nama bangat kibuh ka dek nya. Kapa iya enda belaki deh. Pengidup iya nya.” Ko apai Nana nyaut ari tisi. Iya nemu anak indu iya nya sigi enda alah tagang ka belaki. Enda alah endu nya bisi anak tang nadai apai, ngandung ngampang. Laki jai laki manah, nya meh ka deka enda, kapa iya iruh betagang ka endu Nana nya.

Nana enda nyaut jaku indai iya. Makin majak iya bejaku, makin majak indai iya meri iya leca, meri iya jaku ceramah, ngemadis ka ati empu. Jaku indai iya nyematak madah enggai, enda ngasuh iya belaki tumu. Dalam ati iya din enda ibuh sebutka, naka pemedis ati, irau ka diri enda jadi enggau laki ka deka ati iya, ka baru madu pengerindu enggau iya empat bulan ka udah. Kumbai iya pemulai nya ngemai pengaga ngagai apai enggau indai iya, nemu nya ngemai pemalu, dituduh indu gatal. Nya ti ngasuh ati iya balat kudi, tang iya enda memunyi. Panjai runding Nana malam nya, ngenang diri enda ulih jadi seidup sejalai enggau Justin.

Pagi nya Nana pulai baru ka sibu. Nepan perau aki Banyan. Nasib ai besai, laju undur kili nadai ibuh ringkuh-ringkuh bepegai ka suar sengayuh. Datai ba pangkalan nanga entabai, nepan van meribit dia. Bedau sangkai udah mayuh bala driba van meribit nanya ka nepan. Pangkalan nanga entabai sigi udu mayuh urang sarinya, laban ari minggu, seretai nembiak sekula pulai. Perau nyau betusun-tusun ngempit enggi pangan diri, barang perau ka mit, sigi karam diempit ka kaga. Nya meh alai apai etin ngaga perau enggai mit ko iya, nangi ka alah ayu laban sida ka bukai. nembiak sekula lembau nyebut, bisi nyamit bisi nya besai, betundi nepan perau, berandau enggai badu-badu. Ka benung ngangkat ka diri bujang dara, mata enggai badu engkining bepeda ka pangan diri, betilik engka deka ngiga sulu ati. Bisi nya udah ngegap diri ari ulu sungia nyin, nya meh enggai kena perecik ai lebuh merau, ni enda kedua lebuh mansa wong, mansa rantau bediri nangi ka diri kena imbur. Iya ka bujang lembau nusi, bepantai ka kunci kereta ngisin diri bisi keresa, ngambi bala indu dara ngining lalu teraju labuh pengerindu.

Datai ba sibu. Nana enda lalu talipun ngagai daling iya. Enda baka selama, betalipun nyau bejam-jam. Sehari enda talipun, deka dianu iya sulu ati, ni enda jam bejalai bangat tak kelalu lama pama dah labuh pengerindu. Duit kredit nadai alah kira, abis beratus ringgit sebulan, enda iya beduli janji ati bahagia ko iya. Sekalitu iya deka minta putus ari Justin, minta seduai beserara, iya lebih sayau agi ka apai enggau indai iya. Kada meh ati iya kempang. Ngelengka ka urang tuai ka ngada ngidup ka iya ngelamatu.

Ding dang dut… ko munyi hanpon Nana. Tiun hanpon lagu dangdut. Lama Nana asaika enggai ngangkat ka hanpon iya nya. Endang nya ka di anti iya bemunyi, nganti daling iya nya kol iya. Iya sengaja enggai kol siku nya dulu, ngichaka iya ulih mupuk ngelupa ka siku nya. Badu ingat ka penyingat Justin. Ko iya sigat meh Justin nya, tang ba urang bukai enda, sedang-sedang aja, pama meh nya ko jaku bala sida. Badu rindu ka cinta seduai ti udah ngerembai, tejuka ngambi bungai labuh enda nyadi.

Tang ati iya majak keran sayau ka siku nya. Sari enda betemu pan asai ka gila, asai ka disepu enggau jayau aki buban menua indonesia. Bisa penemu mabuk pengerindu sanggup mati baka julit enggau rumeo. Nyema enti dunya kena tsunami, sanggup iya mati nisi Justin, ngicha ka ulih begulai ba sebayan. Ati iya bebagi, sekali ka nerus niat iya tauka ninggal ka Justin. Semua nya pemulai ngagai pemerani seduai, enti Justin sanggup bai iya jadi tumu, sanggup iya nitih ka Justin, beridup ka diri empu. Nyema nadai rumah biar seduai nyewa. Enggai meh iya enda jadi enggau Justin. Ati iya sigi enda ulih ngemula ka iya empu. Runding iya din amat meh madah ka jalai ti rasional ko melayu, beserara aja ari Justin, laban kenu ko runding ba kamus chinta madah ka chinta enda semestinya ngempu tubuh, idup segulai sejalai, tang chinta ditangam teguh dalam ati, dibai mati. Baka ka siku Justin nya aja lelaki ti setipak enggau iya ba dunya tu. Tang ati iya takut mai enda segulai enggau bujang ati iya nya.

“Wai sulu.. lapa laun amat nuan ngangkat ka talipun.. kini ka nuan tadi..” ko sada ati Justin ka bisi merajuk mimit. Ngelamatu bedau sempat engkah ba pending talipun, udah bisi nyua didinga nyebut alau sulu. Tang sekalitu laun mimit, muti ke ka sulu iya nya nyaut.

“Nadai bejalai aku sulu… diau aja ngenang pekara tua. Tusah aku ngira”

“nama hal deh wai sulu.. “

“wai Justin.. aku rasa tua enda ulih idup sejalai.. enda ngasuh sida indai aku..”

“Apuuu…ila meh aku bai ka jayau tanduk pelanduk indai nuan nya..haha””

“serius ka..urang ukai amat-amat iya main-main..”

“sori wai sulu.. kati deh..nama penyadi tua deh..”

“dek laki..dek meh bekira ka pengawa tua.. nama suba dek sanggup nengah semua penguji deh.. enti baka dek nadai runding.. putus aja meh tua..” Ko Nana meri waning ngagai daling iya nya. ka bendar iya enggai agi, ditinggal ka siku nya, nya mina jaku emba iya aja, ngambi siku berunding.

“Anang guai bakanya sulu.. bakani ka tua ka jadi enti utai bangat enggai nyadi. Nya meh aku enggai berumban bai dek jadi. Duit empai chukup ga kena tua niri ka rumah tangga…”

“Nama dek bisi indu bukai pia.. selalu aja meri alasan.. enti enggai padah enggai.. ngambi badu aku nganti dek. Dinga dek wai Justin.. enti baka tua enda tumu jadi. Aku deka ditkah ka sida indai enggau urang bukai, laki giga iya empu. Enti dek sayau ka aku.. pujur ka dek jalai tua. Aku sigi enda, enda enggau dek ngatur pengawa tua. Nya suba dek ga bangat ka aku..diatu mesti betanggungjawab. Suba enggai aku dibai dek bepangan…”

“Lapa jaku nuan munyi nya sulu. Sayau meh aku ka nuan. Enggai meh aku sanggup beserara ari nuan. Badu nuan munyi nya, anang nunda ka jaku manggah. Ila nemu meh aku berunding ka tua. “

“Nama ari suba-suba dek be-ila-ila.. Taja indai aku enggai, sanggup meh aku belaya bai iya, empa pengeran aku ka dek.. tang dek ngambi sambil lewa aja tentang tua. Enti dek amai keran.. ujung minggu tu ila. Bai bala dek nanya aku.” Ko Nana mutus ati. Enti indai enda setuju, apai ga setuju. Kenu ko dalam ati iya din, enti sida enda setuju biar iya nitih ka urang laki, jadi betaban sain ba upis perintah aja.

“Enda kelalu jampat tua tu wai sulu.. anang berumban baban.”

“Pedis amat bejaku enggau dek tu.. nama dek enda chukup umur pia. Nama dek bangat takut nunga apai indai aku pia. Enti takut lapa berani nguntik anak urang dek.. ” Ko Nana majak merak. Pama urang indu, pama ati dah kelalu keran, sigi nekan sida ka laki datai nanya.

Randau seduai ngetu nakanya. Diatu Nana baka nengah dua iti jalai. Jalai terubah iya mai Justin betaban jadi, nya pan enti Justin setuju. Jalai dua seduai putus, bela ngintu diri, merinsa sama merinsa, senang sama senang ngemai nasit diri ti lemi.

Pulai ngagai Justin. Justin anak tuai Entakit, kerja ba kompeni, pangkat asistant manager. Umur baru manggai 27 tahun. Terubah bekelala enggau Nana maya pengerami funfair ba dataran wisma sanyan sibu. Maya meda embat lala belagu meradak ka nyawa kenyut-kenyut jejengkak. Seduai bela labuh pengerindu pengudah ka bekelala nengah pesbuk. Gaji tudah tuai enda bangat besai, chukup-chukup kena ngidup ka diri lalu ngelun kerita saga. Laban ka ditekan sulu ati mai jadi, dia deh Justin pulai berandau enggau apai iya pengudah abis kerja ari enam.

“Apai.. Kati ulih dek nanya ka aku indu”

“Ulih anak.. sapa indu ka deka ati dek nya.. kati chukup belanja dek ka alai dek nyau ka nembu ka pengidup bujang dek. Kati dek amat udah sedia. Anang aja ila udah kawin enda tetupi ka bini anak. Aku sigi ulih melanja anak dek, kengka ka tusu anak dek ulih ga beli ka aku. Tang melanja seduai, enda” Ko apai bejaku meri jaku ajar ti ngemai ati Justin gaga.

“Udah sedia meh aku tu.. nya meh nyau ka ngidup ka diri. Nyau ka bebini.”

“Pia..manah meh nya jang. Sapa indu nya deh.. enda tua indai dek milih menantu deh..ni ka deka dek”

“Tang apai….Bisi tusah mimit. Laban indai iya enggai ka aku..Nama indu nya Nana..urang menua ulu mujok..diau ba nanga kesindu.”

“Apu..Lapa meh iya enggai ka dek deh anak..Pantang amat aku ninga urang bangat enggai ka peturun aku. Nama peturun aku tu umang. Peturun aku tu urang merinsa pia. Ila iya ensepi aku laya iya.. kumbai iya bangat ka anak iya endar kita tu.. kumbai iya bangat anak iya aja indu menua tu.” Ko saut Entakit nyau ka ringat ninga urang enggai ka anak iya.

“Anang munyi nya dek apai”

“Kati deh.. enti iya enggai ka anak aku..aku enggai meh ka anak iya. Kapa nya jang. Kapa milih anak iya. Enti dek amat ka bebini, aku ngiga ka dek indu. Nya entayang dulu nya, anak ibuk dek, naka iya nya. Nya tau meh diambi dek ka bini. Enda lebu dek jadi enggau iya, staf nas nya. udah ga bajik.”

“Apai..anang munyi nya dek. Aku ka jadi enggau iya setegal chinta. Iga ga dek enda faham.”

“Faham aku anak.. kapa nya enti urang enggai. Nyau ka jai munyi jaku.. belaya tua iya enti aku nanya anak iya.. enggai aku nanya iya jang..enda aku nyagi dek jadi enggau anak iya. Kumbai dek nyamai jadi enggau anak urang mangah.”

“Anang munyi nya apai..tulung meh aku.. “

“Jang.. iga ga dek lalu enda mereti ka jaku aku. Enggai aku jang be-isan ka urang mangah bakanya. Reti nya aku enda ngasuh meh seduai jadi. Aku enggai meh kumbai iya deka amat ka anak iya. Enda alah kumbai urang kitai tu enda nemu diri”

Justin enda nemu bekira agi. Iya enggai majak ngumbuk apai iya nanya indu. Iya nemu apai iya sigi enggai, indai iya enda ibuh kira agi, enda ibuh ka iya. Selamatu apai iya aja kiruh ka sida madi, indai iya nama, gauk ka kerja aja. Besari-sari bejual ba maket sibu. Pulai lemai nyau ka ngintu utai ka dijual pagi siti da ga. Ni nya nemu ibuh ka bala anak. Jauh ka baka enggi urang, ngemai anak bejual. Biar anak betegaring gali ba maket, sambil bejual.

Pemulai ari ka betemu enggau apai iya. Justin ngemai ati ti enda lantang. Semalam-malam mata iya enggai tinduk ngenang nama penyadi pengerindu seduai iya Nana. Nitih ka ati iya, singin meh iya mutus aja badu betundi enggau Nana. Badu kiruh ka utai ti bangat enggai nyadi. Tang dalam dada iya sigi sayau ka Nana, ni meh iya ulih tetemu ka indu ngemajik Nana nya, engka tak nadai indu ulih nganti siku nya. Enda sanggup iya meda indu dara nya diempu urang bukai. sanggup iya enda bebini ngapa enti siku nya diempu urang, sema jaku enti udah dikerenkunka urang, sanggup iya nganti siku nya janda.

“Bakani deh” ko Miya nanya Justin lebuh seduai betemu malam hari ba wisma sanyan, seraya ka bediri nilik ka baruh meda kedayau bala mensia ka datai ngundang.

“Nadai jalai tua sulu..Apai aku munyi indai nuan meh dara..Enggai nanya nuan. Ko iya enti indai nuan enggai, iya pan enggai. Nadai penyadi tua sulu”

“Enti pia. Betaban jadi ga tua. Kapa kiruh ka sida..” ko Nana kempang ngelengka ka apai indai iya setegal chinta pengerindu ka empai temu tuju laun. Rarat kili enggai mudik kulu dientung batang melintang ngempang pengerindu ti agi kitang-kitang.

“Enda berani aku bakanya wai dara. Enda sanggup aku ngelengka ka bala aku. Enggai aku muai sida. Budi sida empai ulih ku balas. Enti enda sida, enda aku bulih pangkat baka ka diatu, bulih degree baka tu. Enda aku kempang wai dara” Ko Justin megai jari siku nya.

“Enti pia.. badu dek ngiga aku. Badu tua bepangan enti dek bangat enda kempang. Penakut” Ko Nana jaku tinggi seraya ngusaika jari siku nya.

“Wai sulu… anang munyi nya. Ukai nya maksud ko aku. Belubah meh tua, ngiga jalai bukai ga kena nunduk ka sida.”

“Dinga dek wai Justin… Enti pagila lusa dek enda mutus ka runding diri. Enti dalam kandang seminggu tu tua enda jadi, enda ngira nya chara betul tauka salah. Enti dek agi be-ila-ila, tinggal ka meh aku. Bakani tua deka jadi bakani tua kawin, nya pemandai deh meh. Aku enda ngira. Nya dek ka endar nyebut diri bisi degree.. urang pandai kunon, masalah tua enda ga alah adu ka dek.. Enti enda.. nemu-nemu meh dek…ingat Justin” Ko Nana lalu ninggal ka Justin ka agi kapa-kapa berunding ka sulu dikesayauka iya nya. Lama iya sigi nemu, sulu ati iya Nana sigi mangah, sigi enggai alah, nah iya kala dianu Nana maya iya nguntik siku nya suba, tang iya nemu indu nya sigi indu mereti, patut diambi ka sulu enggau jadi.

Seminggu udah nya. Seduai bela jadi diri melaki bini. Kawin kuboi aja. Nadai bepadah ka urang bukai. seduai diau serumah baka urang bukai meh, baka ka udah jadi. Ninga nya tadi apai Justin datai ngesah berita nya, ngabas ngagai sibu deka betagang ka pekara nya. Ati bisi ka ke kudi ninga anak bujang iya nya enda jaku, majak ka runding diri, melakang ka urang tuai deka jadi.

Indai Nana lebih agi. Pemedis ati asaika ka nganu urang aja. Nya abis laki iya endur iya mantai ka pemedis ati iya. Kenu ko iya, apai Nana nya meh kelalu ngasi ka anak, sampai enda ninga jaku. Iya pan deka nitih ka sibu kin. Deka datai lalu nyarak seduai, nyema enti dua iku nya udah telanjur, sanggup meh iya ngempu uchu, ka nadai apai. Nana meseti dibai iya pulai ke menua, badu nurun gawa di sibu agi, diau mendam ba menua aja.

Datai indai Nana ba rumah sewa Justin enggau Nana, iya lalu ngeleca seduai nya. Anu iya meh seduai ka jadi bakanya. Iya sigi enda nyagi seduai jadi. Enda ngaku seduai jadi, enda sah ko iya. Ati naka pengeringat ingin meh ati iya ka malu seduai nya. Tang bangat enda kempang.

Penatai apai Justin ba endur nya. Iya lalu enda checamang muka jaku.

“Ni jang.. sapa bangat ngelaya dek penapat inat. Uji aku enggau ngelaya” Ko Entakit meda anak iya dilaya indai urang indu.

“Tu aku.. Kitu meh dek.. Nama dek nya apai Justin.. nama dek nya ngajar anak dek enda mereti, naban ka anak urang jadi sengapa” Ko Indai Nana.

“Apu amat pama indai tuai urang tu” Ko apai Justin ga nyaut..apai Justin mansang semak ka agi. Ngelanda sida tiga nya tadi.

Makin semak indai tuai urang nya, apai Justin makin asai ka ngelala indai tuai urang nya. Gamal agi bajik tuai, agi bulih tahan. Iya ngetu enda lama. Untak iya berunding enda lama sapa meh tu. Asai ka ngelala, ingat-ingat lalat, gamal ka bakanya suba asai ka idup ba tali pengingat untak iya din. Tang sapa meh indai nya. Indai Nana pan baka nya. Iya nyau enda nunda ka pemangah iya deka ngelaya apai urang bujang, taja ati iya agi angat. Sapa meh apai tuai urang tu ko iya ga, nama meh gamal bujang tuai nya baka rambang sulu ati iya menya.

“Ukai Miya dek tu” ko apai Justin, Entakit dulu nanya seraya ka nunjuk ka jari, mua mantai ka tanda tanya, agi ngingat ka pekara ti lama.

“Dek sapa dek.. Kada enda Entakit” Ko Miya ga nyaut bela peli-peli, baka ka amat ngelala.

“ekkk… iya meh..aku meh Entakit”

“Apuuu… mit amat meh dunya tu.. aku meh Miya”

Seduai bela ketawa ka pangan diri. Ngenang diri ka kala bekelala dulu suba. Enda seduai ibuh ka anak seduai bela tegenung meda pendiau seduai. Ko jaku ka belaya nemu nya enda nyadi. naka meh pengirau ati anak seduai ti ka meda seduai nya ti ka belaya. Nemu nya laya betukar ketawa ti enggai badu-badu.

“Lapa deh apai..” Ko Justin nundi meda apai iya majak tuchum tuchum ketawa meda pendiau indai tuai ka bela betunga mua enggau iya duduk ba ruang tamu.

“ehhh..nadai..”

“Ngelala aya nya dek indai.. Nama seduai bangat baka nya” Ko Nana ga nanya indai iya ti benama Miya.

“Nadai endu.. sigi baka dini kitai belaya bakatu” ko Miya ngemula ka anak iya nya. Naka meh pemalu iya ti udah dulu ngelaya, enda nemu nya apai tuai nya tadi urang ti kala dikelala iya.

“Aku ngaga ai dulu indai.. berandau meh seduai,, anang aja belaya “ ko Nana meda indai iya baka chukup gaga nyabak pengudah ka betemu enggau bakal entua iya.

Lebuh Entakit enggau Miya berandau kediri. Pulai baru meh pengingat antara seduai. Pengingat ti kala nyadi lebih 30 tahun ti udah. Sapa meh enda ingat ka rambang sulu ati ti kala idup ba pengidup siku-siku mensia.

“Endai anak dek nya tadi wai.. enda nyangka tua tau betemu baru baka kediatu” Ko Entakit dulu nanya.

“Iya wai..” Ko Miya agi malu-malu ngingat ka utai ti udah lama. Lama chukup lama cerita antara seduai kala nyadi. nya diatu anak seduai udah besai. Baka ka diambi mimpi seduai betemu, kira seduai siku antara seduai udah mupuk dulu ngejung ka batang madai, nya meh alai nyau enda betemu dalam kandang 30 tahun.

“Berapa lama udah wai..err tua enda kala betemu.. bisi 30 taun kini?” ko Entakit

“Bisi jangka aku.. juduh anak tua ngemai betemu baru..haha” ko Miya agi geledi ati enti iya mikir ka utai kala nyadi antara seduai.

“Emmm.. ulih aku betanya wai Miya” Ko Entakit asai ka umur biak baru, agi ngeromantik ka diri..

“Nama nya wai?” ko Miya..

“Nadai tentang pengawa tua suba..Kati ulih”

“Tanya ka dia meh”

“Kati amat dek suba nadai pengerindu ngagai aku suba.. Lama amat udah aku berunding ka nya. Lalu nadai jaku saut.. amat kini dek suba nadai chinta ngagai aku” Ko Entakit ingat ka pekara ti empai kala apus dipansik iya.

“Enda ibuh meh tua berandau ka utai udah..utai udah udah meh”

“Kati deh.. enda alah aku parai enda nemu saut nya. Suba bedau biak enda kempang nanya dek.. surat aku nadai ga dibalas dek. “

“Kapa nya wai.. perandau ka nadai meh guna.. tua udah ga tuai..udah nadai daya mutar ka jam ke pun baru” ko Miya agi enggai nyaut. Iya agi malu ka penyalah diri, penyalah diri suba ti udah ngemula ka siku nya. Ngumbai diri nadai chinta, tang selalu meri pengarap ngagai Entakit betitih ka iya berumpan-umpan. Ni enda Entakit terunda-runda deka ka iya.

“Saut meh wai.. sekali ka suba aku amat nempap jari sepiak tauka enda. Nadai dikenggai nya wai, enti amat dek enggai suba, ngambi aku nemu ga.”

Miya agi ingat, iya pan baka Entakit sama ngemai ati keran deka idup segulai sejalai. Tang iya enda milih siku nya, ketegal nitih ka jaku bala iya. Iya lebih sayau agi ka bala iya ari chinta, kapa enda chinta iya mati mendam jauh ditaruh selepak ati iya din. Jadi pan iya suba enggau Entakit enti bala iya enggai nguna. Enda alah iya nadai apai nadai indai nadai kaban aya ibuk. Pulai baru ngagai pengingat lama 30taun ka udah…………

“Endu aku ukai nagang dek ka jadi enggau laki sulu ati dek nya. Tang nama aku ninga cerita tusi urang iya nya nadai pelajar, balat ngenchuri lalu jai pendiau. Nadai aku ka bemenantu ka urang baka nya” Ko apai Miya nagang.

“Ukai nya kita ka jadi enggau iya..aku”

“Alai meh enti dek ka jadi enggau laki baka nya. Tang enti dek keluar ari rumah tu. Badu ngembu aku apai agi dek” Ko apai Miya.

Nya ti ngasuh Miya enda kempang nitih ka Entakit. Taja iya nemu sulu ati iya ukai bangat ngenyai nya, tang jaku petenah urang, iya alah. Nya alai iya kempang ngemula ka sulu ati iya, iya nadai pengerindu. Taja ngelematu seduai selalu begulai kin kia, enda melengka, mina iya enda kala madah ka chinta diri. Tang ari gaya iya nyengulai Entakit, sapa enda nemu iya sigi keran besulu enggau siku nya. Tang apa daya engka nadai juduh kini.

“Wai Miya..wai Miya.. Lapa dek enda nyaut” Ko Entakit meda siku nya tegenung enda bemunyi.

“Nama utai ko dek tadi.. nyau enda ninga..mar nyau udah enda entu ninga aku diatu” Ko Miya ngemula..

“Auk..Amat dek nadai chinta ngagai aku suba”

“Ohh.. terubah aku minta ampun ngagai dek wai Entakit.. Ukai aku enggai ka dek suba.. tang bala aku enda nerima. Amat aku bisi pengerindu ngagai dek, tang aku alah, aku lebih sayau ka urang tuai aku. Chinta enda ibuh sebut, chinta aku suba asai ka sanggup munuh diri nelan racun, empa penalam chinta aku. Tang ukai ko munyi jaku wai.. tua ga nadai juduh suba..”

“Pia.. sangka aku bangat enggai dek suba wai.. nadai ngawa ga.. tua udah ga bela tuai. Kapa enda jam nulung tua nelan ai sungai chinta tua suba.”

“Aku minta ampun amat-amat wai.. taja aku ngemula dek suba. Tang seumur idup tu aku nesal diri tegal muai dek ari pengidup aku. aku nyau asai ka nadai pengidup agi tegal chinta lama udah mati.”

“kapa nya wai. Lama utai nya dah lenyau ari pengidup aku. urang bukai bakanya meh, bepangan andal ka jadi, enda meh jadi”

“auk pia meh”

Pagi siti sida empat bela betugung ba rumah sewa Justin enggau Nana.

“Bisi endar rahsia antara seduai apai enggau ibuk nya” Ko Justin dulu muka jaku.

“Bisi anak.. cerita lama..”

“cerita nama nya ayak, enda ibuh berahsia agi” ko Nana ga nanya.

“ehh.. lembau ka nyebut..pandak jaku. Kami duai suba kala buya baka seduai. Tang ditagang jadi bala apai indai” ko Entakit nusi.

“ohh.. pia.. nya baka nya meh kami duai Justin ka ditagang seduai jadi. Kami duai enggai baka seduai.” Ko Nana ngungkit ka jaku nya

“Aku enda nagang endu.. indai dek nya dulu ngengai ka anak aku.. enti urang aku pan enggai.. indai dek nya tanya, enti iya ngasuh aku pan ngasuh” Ko Entakit nyaut bakal menantu iya nya, seraya nyeling ngagai rambang temawai lama iya kelia, mantai ka tuchum geledi asai ka agi ka ngempu.

“Ehh aku ga disalah ka iya.. seduai jadi.. nadai nya alah tagang agi..” ko iya enggai agi nagang anak indu iya ka deka belaki, laban iya kala ngasai ka diri kala ditagang apai indai kelia, ni enda idup merampau sepemanjai idup.

“Reti nya ngasuh meh tu” Ko Justin, ati gaga. Kira iya tak naka nya aja meh seduai ulih begulai, nemu nya nyau ngasuh seduai tau jadi agi.

“Ngasuh aku igat.. Aku minta ampun udah nganu seduai. Enti bakatu gawai 2012 tu.. datai meh ngerami seduai ba rumah kami.”

“haha..pia meh endu.. ila aku datai nanya lalu ngemai dek ka menantu aku..Kira ka BAMBU ISAN tua wai.. taja suba kala buya, chinta turun ngagai darah getah tua ga.. haha’

Abis..

DOwnload ditu..PDF..

KLIK DITU

http://www.ziddu.com/download/18203756/PengerinduBambuIsan.pdf.html