Nanga Kesindu Julau

LANSA PENGARANG (TUAI RUMAH DUNYA BARU)

PENGIDUP DIRI

Meri tabi basa ngagai semua..
ditu aku deka nusi pendiau diri..sebedau ku nerus ka tusun leka jaku ku ditu, ku enggai enda minta ampun dulu enti leka jaku ku ditu bisi mangka, negu, ngerimbas, nyeriri, ngachau, ku minta ampun amai-amai..nadai ba ati ku din deka ngereja pengawa bakatu..enggau basa ti besai ku meri terima kasih ngagai kitai mayuh ti bisi meri sukong ngagai ruai DUNYA BARU aku ditu..ka diatu ruai aku tu dibali nama LANGKAU DAMPA UMAI..ngumba ka penatai kami anak urang berumai betaun, betanam ka padi bukit..enti kami tu berumai, nyau sedandang bukit ditasau kami..

NYADI jaku ka baruh tu ditempa aku rindu ati aja..kena jaku tundi mai bekelala..

TIMANG BUJANG RERAYA

Baka ni
baka tu meh..
gaya pengidup maya bujang
begiga ka jalai nuju pemansang
ngelala dunya..
deka nebang tapang ngena lungga
nubai sungai ngena lia
ngumba Kediri tajapan nemu diri bula
dini nya alah gagai sida pungal bala ribai
nguji ngapa meh nya ngicha ka tau sangkai
Tau terebai datai sepaik menua bukai

Endang sigi dah pengawa kami deh wai
baru bujang lelajang rindang
Nyau jegak gak gak kalat kalat baka ukoi kaka
Segau segau baka mayau diau atas sadau
Ti bedau nemu deka nemu
ti udah nemu nyau balat udu
Pemanchal diri dini nya ulih kira
Kappa enda baka nya deh
Jai enggau manah tu nadai dikira laban pengeka
pengisin enggau pengeransing dibai belama
ko dalam ati din, pama meh enti dipuji sida ka dara
endun lenta kumang menua, anak aya
begiga ka endu wai sulu..

Pengisin, pengingin, peneka menawa
Nadai dikira janji julok ati tejapai
Tak nadai utai enda ditemu
selepak dinding di kerituk
lubang kebung dikerebuk
sungai deka dipansai
tanah kebuk keranjai
Ahh din utai tu belalai..di puchuk tapang
Enda alah tiki ambi ka kapak tebang
Bai pengeran ati, ati kempang.

Pama endang sigi pama
Anak bujang sida apai
Ngiga sulu ngiga ambai
endu bajik dara lawa punggung ngelentik tinchin temaga
endu dara bungai ngerembai rangkai tutu kesulai
endu dara cherara cheririk betuah
bidik bulih emperian kenu ku jaku bulaenggai
taja dirijik belama, its ok ku peransang diri
Ukai nama ahhh laban gamal ti jai makai
rangka mati enggai
laban enda sigat baka minggat keling tembawai
nya ti ngasuh pendiau runggu meleku
enda diterima sida kumang
ngumba ga sida nya
penyigat gamal dulu dipeda
pengaya reta dulu ditanya
Master degree enda tau enda
ngena kereta kancil peda sepiak mata aja
ku jaku sida ka dara
kada enda kereta sewa nya deh.
Kini meh nasit tak puni reraya
Udah nasit udah selatan anak timpang
alah enggai meh nya kini wai!!
Ka pan enggai nadai sulu nadai ambai
Nyangka dah atur selatan petara
pemisa putus pengerindu tu tak baka pulung guntin ngempat
ati bebagi dibelah dua.
Merana chukup merana
Ngingat ka pesan aki
enti urang enggai ka kitai ..
ngiga ke deka ga uchu..
nyangka diri enda laku kini
terima aja meh..
apa boleh buat..available belama ga.
Engka nya lebih manah agi..
janji idup bahagia
deka kia kia
nadai sapa deka nagang

tu meh sampi
bujang reraya sinu ngenang
dedicated to all man
with title “always available”
what to do lah..
for women, sorry please..
to someone thats not available anymore
please ignore this timang bujang reraya..

Jejuluk urang bujang….
Nyadi bujang tu endang baru angkat bujang. Bejuluk ka ”bujang ngumba, semina rindu beduan aja..keda dipansa,sigi ditawis ngapa..bujang runggu,dikumbai enda nganu,tang udah ditegu,sigi beraie nyabak minta sinu”. Bujang pala menua tu ngelar diri entakit ba dunya internet..nama glemar kunun..

Penatai….
Penatai menua kami ari menua pelilih JULAU,SARIKEI..Diau nguan pala menua, ulu sungai nadai jalai, ili sungai enda bernanga.. Menua jauh ulu sungai, batang mujok enda alah semerai,enda mudah rangkai.. Alai penatai batu kerangan ai sungai, meraka wong batak rangkai.. Alai penyangkai tanah temuda repa pala menua.Menua jauh enda alah anti enda alah japai, menua semak enda alah gagai enda alah pegai..Menua tinggi enggi kami, nadai jalai peniki, menua baruh tau ngasuh tepuruk empa jayau pengaruh.

Pengidup diri empu..
Maya lepa rindu ke pengawa ngasu beburu, sebelah kampong neresa temuda. Mukat ngelekat sebelah sungai. maya bumai rindu enggau beduruk, laban nyengulai sida ka dara..hehe..rindu mega bejalai sebelah kampung, ngiga jelu enggau upa..maya ngabang sigi datai enti nadai penanggur, kenu ku ati din, ngicha ka bulih ambai.. Pulai  permisi selalu enggau sida indai ngintu lada, ngintu getah.. nadai endur lepak bukai selain lepak ba kebun.. Enti di mengeri maya lepa sigi dikena neresa internet.. rindu mega meda movie.. Rindu amat berkelala enggau sapa-sapa aja..

Maya agi mit anak rumah panjai lama baka aku suah ngejera pengawa baka manjuk,nyetik, nyempulut burung sebelah rumah sebelah sungai..maya bejalai ka tanah enggau bala kaban, rindu begiga ka buah kemunting, buah lemba, buah entimau, buah lengki, buah senggang, buah lengkan, buah jugam, buah ensurai, buah engkabang mega,buah ridan, buah wee enggau mayuh agi..bisi nya nyamai bisi nya enda..empa aja..

Agi mit aku teleba dibai sida indai bejalai ke tanah.teleba diempa nyemetak, gigit nyamuk,semut gatal,tutu kerengit..teleba mega diau dikampung, tindok dalam babas..sigi baka urang ke nguan pala menua.. agi mit rindu amai main sebelah baruh rumah, ujan panas nadai diperduli, bekaban enggau bala bakih ari pagi datai ke lemai.. mandi ba sungai nadai nemu pulai, ulih urang tuai ngemba enggau muam..nya baru pulai..maya nurun sekula, ulih apai indai nganjung belama..kadang-kadang pulai rari ari sekula, tegal enda betah..agi mit mega, enggai amai besekula, main ti numbur satu..

Aku mega nemu ngelala buah babas ke tau diempa. ngelala kayu-kayu kampung, ngelala upa ti tau diempa..bujang rumah panjai tu, sigi chulin..sigi anak iban..Tang semua pengawa nya sigi nadai ulih kena ngiga kerja ka dudi ari ila, ukai nya bisi sijil..ukai nya aya pengulu ngeluar ka sijil pandai nginti, pandai nubu pandai ngasu, pandai bumai, pandai belada..

Enti bisi bilun mansa ngerimbas menua kami, rindu kami beterauh sambil nujuk ka ari penatai bilun..ukai nya kala meda bilun semak..ba ati din kati meh bilun besi tau terebai..alit ati meda utai nya..ku ati din negu aja pama meh, enda ibuh ka nepan.. julok dalam ati din, dah besai aku mesti ka nepan bilun.. nadai jalai bukai enti ka nepan bilun enti enda belajar bendar..tang diatu semua nya ukai agi fantansy tang dah nyadi reality..terima kasih tuhan, terima kasih apai enggau indai, terima kasih aki enggau ini..ti udah ngidup ka aku sampai ka tahap diatu.. dah besai bulih pemandai mungga mit ari tuhan..

ukai nyamai sida apai enggau indai ngidup ka bala kami menyadi, kerja berambun ka nyawa, indai kerja belama enda ngira lelak sakit..aki kerja ba kebun berari ngiga anak duit kena nulong nyengula ka aku..ngicha ka menyana baka urang bukai..amai tusah kami anak urang pala menua ngidup ka diri empu, deka ngagi julok ati.. enda liat ati tau tinggal, baka kaban aku ti bukai, sanggup badu sekula, enda terabis ka pom 5.. pengeliat ati, kering semengat ngemai aku tau datai ba tahap tu..
huhu…sinu amai meh asai ati ku lebuh nulis tu..ngenang apai indai di rumah jauh tinggal di menua..NGERAH TULANG, begiga ka anak duit dikena melanja sekumbang ka sekula, dini enda deh, di mengeri makai nyamai, makai KFC, meda wayang, tang sida dimenua nama deh, ka enda makai daun kemiding, daun paku, daun empasa..leju meh nya, tang ngira bala kami ka agi sekula, ditagang meh pengeran sida.janji kami chukup kereban baka anak urang bukai..

DIATU..
Umur baru manggai  25 tahun(2012)..
Aku Udah abis pelajar ba siti palan pelajar tinggi ba UiTM sarawak..Naka meh penyamai belajar ba universiti, lebih-lebih agi kami anak menua ulu sungai jauh ari pemansang.. ba kami, ngembuan pelajar tinggi, baka utai ti mustahil ku laut..
nyadi diatu aku nyambung pelajar aku tinggi ka agi, ba UMS (sabah)..ngicha ka pengidup dudi ari nyamai baka urang bukai..tuju ati deka ngasuh apai enggau indai senang lantang..enti ku bisi kerja tetap gaji besai..hehe..

EMPAI LAMA TU UDAH..
BULIH PANGKAT LEFTENAN MUDA PSS TUDM..HEHE BANGGA AMAI NYADI TUAN.. hehe bekas agung meri tanda pangkat.. ukai nyamai-nyamai ulih betemu enggau bala sultan enggau agung..dalam ati din, huh..bangga amai-amai…

Ke penudi aku meri besai terima kasih ngagai kita ke bisi DATAI NERESA DUNYA BARU aku tu. taja ruai kami tu enda tentu manah, sigi baka ruai digaga ari  kayu ramu tanah lama ditanchang sengkilung ngena papung wee, diatap ka ngena atap daun mulung,  guyang-guyang puput ribut liut lemai..BAKA TU MAH YA..

PUCHAU LELENGGAU SERIBU JAYAU..

hooohaaaa..hhoooohhhaaaa..saa..dua tiga empat lima enam tujjjuuuuhhh..ni kita petara aki..petara ini..petara apai petara indai..tu aku manjung minta tulung..aku ngangau minta tenggau..minta bantu..minta turu..ngasuh lansik..ngasuh bidik..ngasuh kena..ngasuh ngena..nguntik dara bunsu dunya..nguntik ambai bunsu ruai..mai bebakih mai bekaban..mai besulu mai bepangan..ngasuh beraie merampau nyadi..nyabak deduie mai jadi..ti nda jadi sanggup mati ba pedang besi..ti nda begulai sanggup parai ke batang mandai..”

ANANG NGANU AUK..
Ari aku empu

“Timberland, J. 2012”